JAMITA, JUMAT AGUNG – 7 APRIL 2023

Heber 5 : 7 – 10

JESUS SIHORHON HALUAON SALELENGLELENGNA

I. Patujolo
Di Jumat Agung sadarion, marnigot do hita dipangkopkop ni Tuhan Jesus Kristus Sipalua hajolmaon sian dosa dohot hamatean marhite hamamateNai, ibana do Naposo ni Debata na tumaon na bernit alani ni dosanta. Dipaandar tu hita hadirion ni Jesus i uju mangadopi angka sitaonon na bolon i Ibana. Asa gabe tiruan di angka na mangolu ima panindangionta taringot tu haporsuhan nang parungkilon di ngolunta. Debata sandiri nama di bagasan Jesus Kristus na mangggarar utang dosa ni jolma i, asa saut malua jolma sian dosa dohot hamatean. Marhite hamamate ni Jesus natigor i boi hita saor dohot Debata, di patigor Jesus hita tu Debata. Ibana do patupa haulaon diangka naporsea di Ibana. Alani lam naeng tangkas panandaonta di Tuhan Jesus asa lam bagas haporseaonta mangoloi Ibana mandapothon haluaon na manontong i.

II. Pembahasan
Sian mamaungka jongjong huria na parjolo i tongtong do adong situhukon mangoloi Kristus i. ido nang na masa di halak Kristen na adong di luat parserahan. Masa do ditongatonga ni huria angka ragam ni hamaolon alani panggomgomi, lumobi na ro sian horong Jahudi. Dilelei, dipukkili jala dipusa pola torop sian nasida na agoan hosa. Ala borat ni sitaonon i gabe torop do sian nasida na gabe sumurut sian haporseaonna laos manadinghon hakristenon. Siala sitaonon na niae halak Kristen i do disurathon buku Heber on laho mamangkulingi, maniroi dohot pahot na porsea i asa unang gabe mandele mangihuthon Jesus Kristus. So tung ganggu na porsea i marpanindangion jala unang mabiar mamaritahon asi dohot holong ni roha ni Debata di bagasan Jesus Kristus, marhite hamamateNa dohot haheheonNa.

Turpuk jamita sadarion, paandarhon tu hita ia Jesus Kristus ibana do Sintua ni Malim na pinabangkit ni Debata (ayat 5). Ibana gabe Sintua ni malim mangihuthon horong ni si Melkisedek.

Kunjungi juga!
Kanal YouTube HKI untuk mengetahui informasi seputar pelayanan HKI.


Adong 3 hal utama na ingkon ditiop sahalak malim manang imam di tonga tongan i bangso Israel :

  1. Sahalak malim/Imam dipabangkit demi kepentingan manusia lao mangurusi perkara-perkara yang berkaitan dohot Debata. Alani do di Padan Na Robi tangkas do dipabotohon ia salah satu ulaon ni malim imam mamelehon pelean situtungon/korban persembahan lao manobus dosa ni jolma.
  2. Sahalak malim ingkon manghilala na masa di donganna jolma. Ingkon mian rasa dekat dohot simpati dongan manisia. Ingkon jumolo ibana pasahathon pelean/kurban bahen tobus ni dosana, ndung i ma ibana pasahathon pelean/kurban bahen panobusan dosa ni jolma.
  3. Malim dipabangkit Debata. Ndang boi sahalak jolma manggangkat dirina sandiri gabe sahalak malim. Panjouon sahalak gabe malim ingkon ro sian Debata do i.
    Sian on, dipabotohon buku Heber on tu ganup hita. Ia Kristus i didok do i Sintua Ni Malim na bolon. Tarida ma hasurungan ni Jesus sian saluhutna malim na adong di bangso Israel. Debata do na pabangkithon/ na pasahathon sahala sintua ni malim i tu Jesus Kristus ima di tingki pandidion na badia di batang aek Jordan. Didok Debata tu Ibana: “AnakHu do Ho; sadarion do Ho Hutubuhon” (Psalmen 2:7). Ibana ma Anak ni Debata naung gabe jolma ro tu portibion lao paluahon jolma pardosa. Dipasahat Debata do saluhutna Huaso tu Jesus Kristus, asa margogo Jesus i patupahon haluaon di portibion. Diboto Jesus do saluhutna na masa di ngolu ni angka manisia, angka hagogoon dohot hagaleon ni jolma i tangkas do diboto Ibana. Jala diboto jesus do angka parungkilon na lao siadopanNa.

Tangan jolma Kristus, marrangam do parungkilon na diadopi Ibana, dipaburuburu halak Farisi dohot siboto surat do Jesus, dihasogohon angka panggomgomi do Jesus sahat tu na tarsilang songon halak sipardosa Ibana di Golgata. Alani borat ni sitaonon ni, dipelehon do angka pangidoanNa dohot elekelekNa mardongan angguk bolon dohot iluilu tu na boi paluahon Ibana sian hamatean. Martangiang Jesus tu Ama i ndang na lao pataridaon hagaleon na alai dipasahat ibana sude angka pangidoanna i pataridahon haundukhon na tu Ama i, ingkon saut sangkap ni Ama i di portibion. Sitaonon i tarida ma i uju rap Jesus dohot siseanna di porlak Getsemane. Didok Jesus tu angka siseanna “Mansai marsak situtu do rohangku, hira na mate do” (Mat.26:38). dipatungkap Jesus ma bohina tu tano martangiang, ninna ma: “Ale Amang, namun na tarbahen, salpuhon ma siinumon on sian Ahu! Alai tahe, unang marguru tu rohangku; roham do!”. sitaonon na luar biasa do na diadopi Kristus i, na so hea songgop/diadopi tu jolma na asing. Atik pe Kristus i Anak ni Debata, ndanda dihaginjangkon Ibana diriNa, ndang dipangasangkon Jesus hadirionNa songon Debata, dipillit ibana do songon napatuduhon hasereponNa. Ndang dipangasahon ibana HuasoNa i laho manjua parungkilon i alai diguruhon Ibana do pangoloion marhite sian na tinaonNa i. alani pangoloion/ketaaan tu Debata na marsuru Ibana do gabe ditangihon Ama i Ibana gabe malua sian hatahuton i.

Di Jumat Agung on. Marningot ma hita di Naposo ni Debata na tumaon na bernit. Posi jala parir situtu do naingkon diadopi Mesias i, dileai, dipasiding jolma do Ibana,ditijuri, tartullang, mabugang, sipasipal sahat tu na mate ibana di hau pinarsilang di Golgata. Alai ndang mangalo Jesus, ndang dipangido Ibana Api sian banua ginjang lao manguhum nasida alai baliksa didok ibana do asa marpamuati rohani Debata mida jolma on. ndang alani dosaNa, ndang alani pangalahoNa umbana songgop i tu Jesus alai alani ni dosa ni Jolma i.

Marhite pangoloionna di Debata na manggogoihon Kritus mangadopi ragam ni hamaolon i, Yesus mencapai kesempurnaan/rimpas. Dibahasa Yunani dipake kata kerja teleioun; sian kata sifat teleios (sempurna yang artinya jika sesuatu itu dapat memenuhi dengan sempurna tujuannya yang telah ditetapkan semula. Teleios lebih kepada funsinya). Alani i ndung rimpas saluhutna na masa i gabe sihorhon Haluaon na salelenglelengna do Kristus i. ndang hamateani ujungna, alai haheheonNa do. Ai nungga monang Ibana, nungga ditaluhon hamatean dohot sibolis i. Marhite hamamatena di hau pinarsilang gabe dipauli ibana hubungan jolma i dohot Debata. Ndang marhite mudar ni hambing mannag anak ni lombu, tung marhite mudarna sandiri naung durus di hau pinarsilang gabe dipatupa haluaon salelenglelengna.Jesus do Mesias i jala Ibana do sihorhon haluaon salelengnilelengna.

III. Refleksi
Nungga tarjalo hita haluaon na pinatupa ni Tuhan Jesus Kristus marhite naung mate do Kristus i ala ni dosanta. Naung diparsilangkon Jesus i singkat ni dosanta. Naung tartanom do Ibana jala dipahehe di ari patoluhon bahen haluaonta. Tuhanta i sandiri do patupahon i di hita ganup angka na porsea. Alani Marsihohot jala maporus ma hita tu Anak i, ima Jesus Kristus sintua ni Malim na tutu. Nungga dipataridahon songon dia pangoloion ni Anak i tu Debata, hita pe ingkon ta hangoluon ma pangoloion ta tu Kristus i. tapasahathon hosa, ngolunta tu Debata, asa diramoti Debata Pargogo Nasohatudosani do hita sahat ro di salelengnilelengna jala ipatau Debata ma hita mangauhon hataNa. Molo ndung tapasahat saluhutna tu Ibana sai na pargogoion na jala donganan do hita.
Nungga sahat tu hita haluaon i. Alai na marungkil dope hita tangan di hasiangan on paima sahat hita tu hatongamon na di ginjang i, naeng ma gomos hita maniop hata ni Tuhanta jala manghangoluhon songon naung pinatupa ni Kristus i uju mangadopi sitaonon i Ibana. Nang pe hira na diloas sangombar songgop na bernit tu angka siihuthon Jesus, ndada na so margogo ibana paluahon, ndada naso diida hita di namasa i. alai dalan asa hot jala togu angka na porseai nang pe ingkon tumaon na hansit. Ndang adong jumpang haluaon di halak na tois di barita na uli na binoan ni Tuhan Jesus, ndang adong be haporusan na asing laho mandapot haluaon i so holan Jesus Kristus. Ibana do sihorhon haluaon salelenglelengna.

Pdt. Suan Dame Siahaan, S.Th

Bagikan Postingan ini: