MINGGU: EPIPHANIAS II, 15 JANUARI 2017

Evangelium:  JESAYA 49, 1 – 7

Thema : Gabe Panondang di Angka Parbegu

 Huria ni Tuhanta hinaholongan ni Tuhan Jesus Kristus.

            Minggupaduahon di MingguHapapatar (Epiphanias) do goar ni minggunta sadarion. Molo talapati goar ni Minggui, ima na mandok dipapatar Debata Jahowa do asi ni rohaNa tu hita nang tu HuriaNa di na mandalani ariarinta di bona ni taon 2017 on. Boho ma nuaeng 2 minggu naung mian hita di taon 2017, tontu godang do na sarupa di pengalamanta dohot donganta mananda pandonganion ni Debata Jahowa di hita, nang pe godang na marasing. Alai, sarupa manang marasing pe pengalamanta i, sada na pasti di hapapatar ni Tuhanta di hita ima Debata Jahowa do nampuna partikkian, jala dipatupa do partikkiani manogihon rohanta asa lam tumakkas hita mananda Ibana di pandonganionNa nang pe asing-asing hataridaanna di ganup halak. Olo do dang songon las ni roha ni dongan las ni roha niba di bona ni taon on, rumonsot pikkiran niba sian na pinikkiran ni dongan. Songoni ma nang sabalikna, gumodang las ni roha niba nietong sian las ni roha ni dongan, ala ro akka ianakkon, tamba pangabahan, dohot akka na asing dope. Alai mauliate ma di Tuhani, ai dipakke Ibana do ganup pengalamanta manang dalan ni ngoluntai laho mananda Ibana anggo na so dirinta tapatujolo di ngolunta on. Lam lumeleng lam pasolhot tu rohaM ma rohanami, hombar tu hataM ma pangalahonami, ninna endenta no 30, 2. Manang songon dia pe rumang ni pangalahontai, lam pasolhothon rohanta mai tu Tuhanta, ai molo Debata donganta, dang mangalo be angka parukkiloni tu hita.

            Bagian ni Buku Paduahon di Buku Jesaya do turpuk on na somal digoari di bahasa Latin: Deutro Jesaya. Di Buku Paduahon on, akka bagabaga pangapulon do ditonahon Debata Jahowa disi sipasahaton ni panurirangi tu bangso Israel na mian dope di habuangan Babel. Isi ni bagabaga pangapuloni adong doi: pabotohon naung marpangulahi roha ni Debata Jahowa marnida hadosaon nasida jala nunga salose dosa nasidai. Marhitehoni, apusan ma iluilu hahansitoni sian simalolong nasida jala sikkatan mai dohot las ni roha. Adong doi pabotohon na boanon ni Debata Jahowa ma nasida mulak tu huta nasida di Israel marhite naung dupatunduk Debata Jahowa raja na gumonggom nasida. Debata sandiri mamboan nasida mardalan di buntulbuntul ni akka dolok dohot di robean sipatipahon, dohot di parhorsihan na gok aek, laho mulak tu luat nasida Israel. Adong doi bagabaga pabotohon na tongoson ni Debata Jahowa ma NaposoNa gabe Sipalua di bangsoNa, ndada holan laho paluahon bangso Israel sian habuangan, alai dohot do paluahon sude bangso sian dosa nasida be asa mulak mardebata tu Debata Jahowa.

Sian sundut tu sundut nunga ditundalhon bangso Israel Tuhan Debata Jahowa ujui. Gabe tu debata binahen ni tangan do nasida marsomba dohot mamele, alai Debata Jahowa na manogihon oppu nasida ruar sian parhatobanan Misir dang diingot nasida be. Nang pe sai dipaingot akka panurirang nasida, alai dang ditangihon.

Antong, aha do mambahen salose dosa nasida?

Dang ala naung ditanda nasida dosa nasida, manang naung gabe bertobat nasida. Tung na diingot Debata Jahowa do asi ni rohaNa na mamillit bangso Israel gabe bangsoNa marhite oppu nasida si Abraham, Isak dohot Jakob. Nasa naung nibagabagahon ni Debata nang pei naung najolo, alai dang hea dilupahon Debata Jahowa bagabagaNa. Sai dipaingot do bangsoNai asa ditanda nasida Debata ni oppu nasida.

Turpuk Jamita sadarion ima bagian bagabaga ni Debata Jahowa na pabotohon taringot tu parsuruNa tu naposoNa laho paluahon bangsoNa sian habuangan alai torus marudut tu naposoNa na gabe Panondang tu akka sipelebegu. Debata Jahowa sambing do sumakkapii laos Ibana na patupahon, marmula mai sian halulua ni bangsoNa sian habuangan Babel, alai laos dohot haluaon ni sude bangso na olo manjalo sondang hatiuron na sian Ibana marhite naposoNa. NaposoNa nanaeng suruonNa ima:

Naposo ni Debata naung dipillit sian bortian jala diramoti huhut dipargogoi

            Godang do panurirang di Padan Narobi, nang akka naposo ni Debata dung di Padan Naimbaru naung dipillit Debata gabe naposoNa sian bortian dope. Panurirang Jesaya dohot panurirang Jeremia mansai takkas mangokkuhon pamillitonna sian bortian dope. Raja Daud dohot do mangokkuhon naun dipillit Debata ibana sian bortian. Alai na tumakkas sian sude ima Jesus Kristus na tubu sian si Maria. Andorang so gabegabean dope ibana nunga dipabotohon surusuruani, ia na di ibanai sian Tondi Parbadia jala bahenonna goarna Jesus (Lukas 1, 31-35).

Godang do panurirang di Padan Narobi dohot Naposo ni Debata di Padan Naimbaru na dipillit Debata Jahowa hombar tu barita nanaeng sibaritahononNa tu bangsoNa. Molo pinaihutihut di akka namasai, sai lumeleng do akka panurirang na dipillit sian bortian dope mamaritahon Hata ni Debata jala gumodang do Hata ni Debata dohot barita haluaon sibaritahonon nasida dibadinghon sian akka parbarita nauli na dijou hombar tu haporluanna. Dang apala takkas be boi bedahononhoni ianggo di akka parbarita nauli nuaeng, laos na bersangkutan pe dang takkas be diboto manang na tarjou do ibana manang na dang, ai nunga paraturan dohot proses parsikkolaan manontuhon halak gabe parbarita nauli. Ido asa dang piga be na mangarimangi dohot na mangauhon tu dirina na dijou Debata Jahowa ibana gabe naposoNa. Tarida mai sian akka ulaon dohot pangalaho ni na bersangkutan na so haru domu be tu roha ni ruas ni huria siparhuria. Secara etika (pangalaho dohot pakkataion), secara pemahaman (Hata ni Debata dohot na masa di jolma), nang secara kepemimpinan (di rumahtangga dohot di huria). Molo tung adong dope na menyadari pardalan ni ngoluna dohot pengalamanna na pabotohon naung dijou Debata Jahowa ibana gabe parbarita nauli, ba diharonsothon mai jala diulahon, asa lam tamba dope jolma na tutu situtu gabe naposo ni Debata. Naposo ni Debata dang holan digoar manang pangokkuan, alai na tutu situtu ma naposo ni Debata (tajaha Jesaya 53). Alai ianggo Tuhan Jesus Kristus, na mansai takkas pangaradeon dohot pamillitonNa andorang so dibortian dope, Ibana ma Naposo ni Debata na marbarita nauli sahat ro di salelenglelengna, ai Ibana do Bonana laos Ibana nang ujungna.

Dang apala panurirang Jesaya nanidokna di turpuk on nang pe ibana mansoarahon. Adong do Naposo naasing sian ibana na sinoarahonna di turpuk on, jala panurirang Jesaya pe diboto ibana doi asa didok ibana: ndang marguna na ngalutani ahu magopo sambing do gogongku hupasudasuda, hape Jahowa patikkostikkos uhum tu ahu… dohot: hametmeton doi anggo tung holan naposongku ho patindang angka marga ni Jakkob… (ay. 4 + 6).

Ise do naposo ni Debata na nidokna di turpuk on?

            Di na tumariashon Hata ni Debata panurirang Jesaya taringot tu uhuman hadosaon ni bangso Israel, laos ihut do dipabotohon taringot tu haluaon nasida jala torus sahat tu haroro ni Sipalua hajolmaon. Asa nang pe martimburak songon api di ri rimas ni Debata Jahowa tu bangso Israel songon na tarsurat di Bindu 1 sahat tu 39, alai soluk do hata haluaon dibaritahon ima na tarsurat di Bindu 7, 14. Lapatanna, laos beha pe rosuna rimas ni Debata, alai sakkap haluaonNa tong do torus mardalan. Diuhum Jahowa do si Adam di hadosaonnai jala taruhum nang sude na tinoppaNai, alai soluk do dibagabagahon sakkap haluaon songon na tarsurat di 1 Musa 3, 15. Songoni do satorusna, ai songon na tarsurat di Hesekiel 33, 11: dang lomo rohaNa mida hamatean ni parjahat, alai hamumulaknai do tumadingkon dalanna na jahati asa mangolu ibana. Di sude ulaon/karya ni Debata Jahowa, nang mangasii manang manguhum, alai sakkap haluaonNai do tongtong inti ni ulaonNa.

Jesaya Bindu 40 sahat tu 66, sude doi gabe Hata ni Debata bagabaga haluaon. Alai mulai Bindu 49 sahat tu 61, tumakkas namai taringot tu haluaon ni sandok bangso, dang holan bangso Israel be, jala manudu mai tumakkas tu Mesias ni Debata nanaeng roi. Asa Naposo ni Debata nanidokna di turpuk on ima Mesias ni Debata Jahowa na gabe Panondang di akka parbegu, jala gabe parhitean ni hatuaon ni Debata Jahowa sahat ro di ujung ni tano on (ay.6).

Naposo ni Debata marbarita nauli laho paulakkon Jakob tu Jahowa dohot papunguhon Israel

            Marhite Jakob do Debata Jahowa manggohi bagabagaNa tu si Abraham na pinillitNai, jala dibagabagahon marpinoppar na godang ibana jala torop bangso marompu tu ibana (1 Musa 17, 4-9). Si Jakob tumubohon anak 12 marga, jala marhitehoni do mangarerak pomparan ni Abraham sian anak bagabagai ima si Isak. Si Jakob gabe margoar Israel na binahen ni Debata sandiri gabe goarna di parsiranggutonna dohot Debata di topi ni aek Jabok (1 Musa 32, 22-28). Ima si Jakob dohot pomparanna na gabe margoarhon bangso Israel. Di parhatobanan Misir do matorop mabue pomparan ni si Jakob gabe sada bangso ima bangso Israel na ruar sian parhatobanani niuluhon ni si Musa.

Dung talpe bangso Israel di tano Kanaan dung mulak sian parhatobanan Misir, mangarerak ma bangso Israel gabe sada bangso na bolon jala na gogo. Alai gabe lam dao do nasida sian parhaporseaon tu Debata Jahowa. Dipabangkit Jahowa do angka panurirang laho pasahathon HataNa dohot pinsang-pinsangNa tu bangsoi asa mulak nian marhaporseaon na polin tu Debata Jahowa songon haporseaon ni oppu nasida si Abraham, Isak dohot Jakob. Alai dang dapoti di bangsoi, gabe hona uhum nasida jala dibuanghon tu habuangan Babel ima huta dohot harajaon ni sipelebegui. Di tikki habuangan Babeli ma ro Hata ni Debata Jahowa marhite panurirang Jesaya laho paulakhon Jakob tu Ibana jala papunguhon Israel sian desa naualu ni Babeli jala boanonNa mulak tu luat nasida di tano Kanaan.

Debata Jahowa sandiri ma mamboan nasida mulak dung jolo dipatunduk akka raja ni Babeli. Asa mulak nasida tu luat nasida jala gabe sada bangso na pinapulik ni Debata Jahowa sian akka bangso di portibion, gabe bangso pasupasu tu nasa bangso, na marharajaon malim-malim jala bangso hasian laho manggohi bagabagaNa tu si Abraham dohot tu si Musa (1 Musa 12, 3; 2 Musa 19, 5-6).

Alai mametmethu do ulaoni ianggo holan laho patindang marga ni Jakob dohot manogihon mulak akka pasipasi sian Israel, alai dohot do gabe bahen panondang di akka sipelebegu, jala gabe parhitean ni hatuaon ni Debata Jahowa sahat ro di ujung ni tanoon.

Babak baru sian sakkap haluaon ni Debata Jahowa, dang be holan tu bangso na tarpilliti ima popparan ni si Abraham di pardagingon, alai sude bangso akka na tarjou gabe popparan ni si Abraham sian haporseaon songon naung ditabalhon Debata Jahowa tu si Abraham gabe oppu ni torop bangso (1 Musa 17,4 ). Si Abraham gabe oppu ni torop bangso, dang be alani panurirang na dijou gabe parbarita nauli, alai marhite Panurirang Naboloni na ro sian Debata sandiri ima Tuhan Jesus Kristus na gabe Panondang nang di sipelebegu, asa manang ise jolma na porsea di Ibana, dipapungu mai gabe Israel naimbaru, popparan ni si Abraham di haporseaon, asa gabe sada Huria Hatopan di portibion, Jesus Kristus sandiri do gabe Ulu manang Pangulu di nasida.

Marhite Jesus Kristus ma digohi bagabaga na tu oppui si Abraham dohot tu si Musa, dohot tu si Daud na mandok: ikkon hot do anggo pinomparmi dohot harajaonmu ro di salelenglelengna di jolom, habangsam pe ingkon hot do ro di salelenglelengna (2 Samuel 7, 16). Marhite Jesus Kristus ma haluaoni gabe Universal (umum manang tu sandok bangso di portibion) dung meningkat sian haluaon na nasional (na holan tu bangso Israel hian) jala meningkat sian pamilliton dohot haluaon na parjolo personal (marsasahalak sian Abraham, Isak, Jakob).

Tu hita ma nuaeng jamita on, ima bagabaga ni Debata Jahowa. Nunga dijou jala dipillit hita gabe bangso na pinillit ni Debata jala gabe popparan ni oppui si Abraham gabe hasahatan ni bagabaga na jinalonai dung gabe porsea hita di haluaon na pinatupa ni Debata Jahowa marhite Jesus Kristus naung dihaporseai natorasta, oppungta, manang ise pe taho na uppoppar hita naung gabe Kristen. Dipapungu do hita songon pasipasi ni Israel jala diuluhon mardalan gabe sada arak-arak haporseaon (pilgrimage) mangeahi Huta Sabungan ima sambulo ni tondinta di Harajaon ni Tuhan Jesus na manongtongi. Asa gabe hasian ni Debata Jahowa hita saleleng mangolu di tanoon jala gabe dalam pasu-pasu ni Debata Jahowa tu akka na humaliang.

Haluaoni do gabe patokanta mangolu, mangula dohot marsaor, jala Tuhan Jesus ma donganta ganup ari. Dipasupasu ma sude huria na benget sahat ro di ujungna.

Pdt. Dr. H.R. Panjaitan/ Kantor Pusat