EPESUS 1:15-23

Jesus Kristus  naung manaek tu Banua Ginjang, i  do  Ulu  ni  Huria i

Patujolo.

Sada na mansai porlu siparateatehononta ditongatonga ni Huria ni Tuhanta, ima manjaga  habadiaon ni  ruas ni Huria i. Ai dipillit do hita dibagasan Ibana, andorang so ojak dope tano on, asa badia  hita jala so hasurahan di adopanna i, dibagasan holong ni roha (Epesus.1:4).

Tuhan i do nampuna huria/jemaat, jala Jesus Kristus do Ulu ni Huria i. Ala ni i, porlu hasadaon ni Huria i, persekutuan, par-hahamaranggion, na niihot ni holong ni roha ni Jesus  Kristus. Unang ma nian adong kelompok-kelompok, parbolatbolatan, perpecahan, songon na masa di  Epesus  on, adong kelompok, horong na mangihuthon poda na asing sian na pinodahon ni Apostel Paulus. Ido  umbahen  didok  Apostel  i: ”Ai  Ibana  do  pardameanta,  dung  dipasada  na  dua  i  jala  ditangtangi  dorpi  parholangan i, ima hamusuon i” (Epesus.2:14).

Angka na porsea di Jesus Kristus, naung dipillit marhite Tondi ni Debata, gabe sada hasadaon, satu  tubuh, ima Huria i, angka na porsea i. Ai sada do Tuhan, sada do haporseaon, sada do nang pandidion (Epesus 4:5). Naeng ma sude Huria manjaga habadiaon ni Huria i, ai Jesus Kristus do Ulu ni Huria i.

Hatorangan ni Turpuk.

Ay.15 -16. Apostel Paulus dibagasan par-olopolopon dohot las ni roha umbege barita taringot  angka naung porsea di Jesus Kristus, ima angka na badia na di Epesus, angka na porsea di Kristus Jesus. Lobi  hurang ma 3 taon Apostel Paulus di Epesus laho pajongjong Huria i dibagasan hamaolon, parungkilon,  mardongan iluilu (Ul.Ap. 20:31). Dimulana i, dipajogal na deba do rohana, ndang mangoloi, baliksa tahe  manginsahi tu agama i di jolo ni natorop i. Jotjot do masa angka na songon on di tongatonga ni Huria lumobi ma diangka parbarita Nauli. Sipata songon na so marparbue jamita, pangulaon dohot panghobasion, ala so  pintor tarida gogona, jala mungkin mansai lambat, na sipata mambahen mandele roha ni parbarita Nauli. Hape, boni na sinuan i, hata ni Debata na sinaburhon i, marparbue do i ditingki na binuhul ni Debata, ala  Debata do na mambahen manjadi, marhite huaso, hagogon ni Tondi Parbadia; alat sambing do jolma i,  dijolo ni Debata. Ala ni ido mansai porlu, hasabamon, kesabaran diangka Pangula ni Huria.

Ay.17 – 19. Tangiang pangondianon sian Apostel Paulu  tu angka na porsea i, asa manahan nasida  diragam ni angka hamaolon, naung binolus dohot na naeng adopanna dope. Di tangiang pangidoan on, anggiat dilehon Debata tu Huria i : “Tondi Hapistaran dohot  pangungkapon mananda Debata”. Tangkas do dihaporseai Apostel Paulus, silehonlehon  ni Debata marhite  hagogoon ni Tondi Parbadia, manahaphon tu Huria i, tu angka na porsea i Tondi Parbadia na pinarbagabaga i (Epesus.1:3). Angka na di bagasan hagogoon ni Debata, angka na ginohan ni Tondi ni Debata, boi  membedakan, boi marnida angka dia ma tanda-tanda zaman, pangungkapon na pinamasa ni Debata. Nungga  dipillit Jesus Kristus di Huria i, ima angka naung manjalo silehonlehon ni Tondi Parbadia na marragam i,  asa masipaleonan, masiurupan laho pauliuli Huria i,  ima bagas ni Debata. ”Laos ibana do mangalehon deba  gabe apostel, deba panurirang, deba evangelist, deba muse parmahan jala pangajari, paulihon daging ni  Kristus” (Epesus 4:11 – 12). Pauliulihon Huria i,  ndada pauliulihon diriniba, hundulan na sangap manang  paulihon fisik gereja (gedung gereja), alai lumobi sian i dope, ima pembangunan partondion ni Huria i,  ruasna, asa gabe jolma na tang marhaporseaon, mangihuthon hagogok ni rimpas ni Kristus. Naeng adong  keseimbangan di panarihon di ngolu siganup ari dohot dipanarihon ni ngolu partondionta, asa unang    madabu hita tu ngolu na konsumerisme, holan mamingkiri ngolu parsatongkinan, ujungna madabu ma  tu bagasan dosa.

Laos i do nang tahatindanghon ganup  tingki, lumobi ma dikebaktian ari Minggu, marhite hata  Haporseaonta: Ahu porsea di Tondi Parbadia, jala adong sada HURIA NABADIA, HURIA  HATOPAN NI  HALAK KRISTEN ANGKA NABADIA. Naeng sude Huria HKI ima milik, nampuna ni Jesus Kristus Ulu  ni Huria i, manjaga habadiaon ni Huria i, asa mian dame dohot holong ni roha. Nunga manaek Tuhanta tu  Banua Ginjang laho mangarade inganan di angka na porsea i, naeng ma mian dame dohot las ni roha  dihuriana, dingolu ni angka na porsea i, asa mardame hita dohot Debata, mardame hita dohot donganta  jolma, mardame hita huhut dohot alam sekitar.

Sipahusor-husoron.

1. Marhite Hananaek ni Tuhanta Jesus paingothon angka Huria, angka naung porsea, naung diparade Tuhanta inganan hasonangan di Banua Ginjang, di siamun ni Debata, sada inganan naung  pasti. Ndang adong be alasan di angka naporsea i laho ganggu rohana, taringot tu sihirimon sogot, ai nunga  diparade Tuhanta.
2. Nunga tadai patumona ni surgo i, marhite naung ditongatonganta Debata di bagasan Jesus Kristus dohot Tondi Parbadia, naung manesa dosanta, naung mamintori hita jala mangain hita gabe anakkonNa, panean diharajaonNa. Silehonlehon na mansai arga situtu. Ala  ni i, ingkon jamot do hita di habadiaon ni  Huria i, dohot sude ruas. Ingkon tajaga habadiaon ni pamatangta, bahen pelean na mangolu, na badia,  na hinalomohon ni Debata. Di Ibana ma hasangapon dohot hamuliaon ro di saleleng ni lelengna. Amen. (MBW)