EVANGELIUM MINGGU UJUNG TAON HURIA – MINGGU, 26 NOVEMBER 2023

Pangungkapon 21: 1-4

Maimaima Di Langit Naimbaru Dohot Tano Naimbaru

  1. Pamuhai

Umumna Buku Pangungkapon na tu si Johannes marisihon taringot tu angka aha do na masa di partingkian na naeng ro tu angka halak na porsea tu angka huria na pitu i. Jala, tontu manosoi angka haporseaon ni ruas huria i asa tang huhut toras laho manghaporseai Tuhan i, atik pe mangadopi angka hamaolan ala manghatindangkon haporseaonna.

Minggu ujung taon parhuriaon manang didok do i minggu tutup liturgi, laos marhite i masuhanta ma minggu taon baru parhuriaon, ima: masa-masa advent I-IV. Somal do hita molo uju di minggu ujung taon parhuriaon marningot angka donganta naung jumolo monding. Jala, ra dina marningot dongan naung jumolo i, olo do dibagasan pingkiranta hira na mabiar, marlobok tarontok laho mangadopi hamatean i, ala ragam ni alasanta be. Laos marhite i olo do sipata hira tawar-menawar dohot Tuhan i na mandok: molo boi unang ma jo nian, ala songon on, songon an. Asing halak tontu asing be do ra alasanna alani aha mabiar mangadopi hamatean i.

Dibagasan tingki on, turpuk na gabe ojahan ni jamita mangurupi hita laho mangadopi angka biar ni roha. Ae manang boha pe ingkon bolusanta do hamatean i, songon naung masa tu angka donganta naung jumolo monding i. Anggiat marhite turpuk on na marpardomuan tu ujung taon parhuriaon on, laos huhut marningot angka donganta naung jumolo i, ndang be mabiar hita, alai mambahen lam togu haporseaonta sadihari pe ro pangalap ni Tuhan i tu hita angka na tinompa na.


2. Hatorangan ni turpuk

Ia surat Pangungkapon tu si Johannes on ima marisihon Sian surat ni si Johannes tarida do songon dia gombaran ni Surgo i. Jala, tung tarida do gombaran ni las ni roha di bagasan ni i. Angka aha ma gombaran ni las ni roha i?

Ay. 1-2. Parnidaan na imbaru, ima: banua ginjang naimbaru dohot tano naimbaru, ala nunga salpu banua ginjang dohot tano na parjolo i, jala tuat sian Banua Ginjang sian Debata ima Jerusalem na imbaru, na pinature songon oroan na sinanggulan mandapothon harajaanna.

Gombaran na parjolo on, ima patuduhon ndada songon na parjolo i manang songon hita uju di portibion be situasi na itahilalaon dung sahat hita Banua Ginjang dohot tano na imbaru i. Na laho salpu do sude angka na adong di portibion. Molo adong dapotta naimbaru, tontu las do rohanta alani imbaru na adong di hita, alai haimbaruon na martingki do i sasintongna molo haimbaruon na sisongoni, ae holan salpu saminggu, sabulan, manang sataon dohot tu angka tingki na naeng ro, ndada be baru i, nunga boi dohonon ndang imbaru be i. Ima haimbaruon di jolma i. Alai tandi do haimbaruon na sian Debata na laho pasahathonNa tu hita marhite Banua Ginjang dohot tano naimbaru i, na pinatardihon ni si Johannes marhite pangungkapon na ro tu ibana i. Jala dina nidok na: na pinature songon oroan na sinanggulan mandapathon harajaonna, patuduhon haulion ni Banua Ginjang dohot tano i do i. Molo mamereng angka na uli tontu sonang do roha, jala molo itabereng na uli migor minar do bohinta, laos boi do mangkorhon lambok ni roha molo marnida na uli i, laos mungkin boi do itagombarhon situasi na asing molo jumpangta na uli. Ummotikna, parbue na mamereng na uli boi moru stress ni pingkiran, boi lumumbang panghilalaanta. Insarana: mamereng haulion ni Tao Toba, d.n.a. Sandok, tung berpengaruh do hape haulion i laho patupahon suasana las ni roha tu halak na mamereng.

Sian gombaran na pinatuduhon ni turpuk on, astuanna marhite parnidaan ni si Johannes on tung patar do hape las ni roha, na marparbuehon parolopolophon marhite Banua Ginjang dohot tano na imbaru i, ima Jerusalem na imbaru i. Ido jaminan di hita halak na porsea na pinasahat ni Debata tu hita. Aha do hataridaan ni las ni roha na dipasahat Debata di Banua Ginjang dohot tano na imbaru i? Idaonta ma i sian na mangihut di toru on.

Ay. 3-4. Patar do Banua Ginjang manang Surgo i, jala Debata do na mangapus angka iluilu. Dina binege ni si Johannes soara na mandok: “On do joro ni Debata di tongatonga ni angka jolma; na maringanan ma Ibana di tongatonga nasida, jala nasida ma gabe bangsoNa, jala Debata sandiri saor tu nasida”. Angka halak na porsea i Banua Ginjang na imbaru i do na gabe jambar di ibana, laos Debata patuduhon na di tongatonga nasida do Debata. Jala, saluhutna i na Debata sandiri do na saor di hita. Laos udut ni i, adong jaminan di angka na porsea i na apusan ni Debata iluilu sian mata ni angka na porsea i, jala ndang adong hamatean, arsak ni roha dohot anggukangguk, na hansit, jala nunga salpu na parjolo i. Tutu, sada panghirimon do on hita angka na porsea, na adong di portibion. Ragam do angka sibolusanta di portibion na olo mambahen hita maradu marabur ilunta alani parsorionta, alai molo manahan hita di haporseaonta i, ndang manimbil hita sian dalan ni Debata, ingkon boi do bolusanta i. Marhite turpuk on margogo ma hita, itaingot ma na saor do Debata di hita; jala ndang manongtong hita di portibion, ndang portibion jambar ni halak na porseai, alai Banua Ginjang dohot tano naimbaru naung pinarade ni Debata do. Manat ma hita di parsorion na ro di ngolunta on, sotung do hinorhon ni i gabe laos mandao hita sian Debata. Tolap ni Debata do mangalehon las ni roha atik pe ro angka parungkilon na mambahen hita tariluilu, marsak, d.n.a. Debata do mual ni pangapulion di hita na porsea.

Sian gombaran naung pinatorang ondeng, manosohon hita asa unang mandele di saluhutna na masa di ngolunta on. Parsotingkinan do sude na masa dingolunta di portibion. Molo pe ro las ni roha nang arsak ni roha di ngolunta saleleng di portibion ndada manongtong i, adong be do tingki na. Holan sada do na manongtong ima Banua Ginjang dohot tano naimbaru naung pinarade ni Debata i do na manongtong di hita. Holan on, ingkon porsea do hita tu Ibana naung paradehon inganan na imbaru i, jala ndang adong be angka iluilu, arsak, hansit di si.

  1. Haonahan
  2. Ganup jumpang Minggu ujung taon parhuriaon, itaingot do angka donganta naung jumolo monding. Sosososo do i tu hita na paingothon ia hita pe ingkon adopanta dohot bolusonta do hamatean i. Dina marningot angka donganta naung jumolo i hita, itadok ma tu dirinta di bagasan haporseaonta: mangarade ma ho ale tondingku, manang sadihari ro panjouon ni Tuhan i. Ia molo tolapta mandok songoni tu dirinta, hataridaan ni na so mabiar do hita, jala hapataran ni haporseaonta tu Kristus i do  dina laho mamolus hamatean i manang sadihari pe parro na, ala patar do Banua Ginjang dohot tano na imbaru, ima Jerusalem na imbaru di hita na pinarade ni Debata tu hita angka na manghaporseai Ibana. Laos hapataran sian dirinta na rade do hita maimaima langit dohot tano na imbaru na laho pasahathon ni Debata tu hita.
  3. Asing jolma, asing do tong parsorion na ro tu ibana. Sajabu pe olo do tong marasingasing parsorionna. Tandi do parsorion na ro tu Ama dohot Ina, nang songoni molo sebagai ianakhon. Jala, di parsorion na ro tu hita i, olo do pola sampe ro iluilu. Alai itaingot ma pargogoon ni Debata do hita mamolus saluhutna i, laos marhite hagogoon na sian Ibana i, jumpangta ma las ni roha na manongtong i molo ndang manimbil haporseaonta sian Debata.
  4. Itaingot ma, hasisingkop ni hapapataran langit dohot tano na imbaru ima di tingki parro ni Jesus Kristus muse tu portibion. Alani, mangarade ma hita marhite na manongtong haporseaonta tu Ibana manang andigan pe ro Kristus muse tu portibion.

Pdt. HERMAN TAMPUBOLON, M.Th

Bagikan Postingan ini: