EVANGGELIUM MINGGU MISSERICORDIAS DOMINI, 23 APRIL 2023

1 Petrus 1:17-23

Dipaimbaru Asa Mangolu di Sangkap ni Debata

I. Patujolo
Surat sada Petrus ima surat kiriman (pastoral) na ditujuhon tu huria na marserak, ima di Pontus, Galatia, Kappadosia, Asia dohot Bitinia (ay. 1). Tujuan ni 1 Petrus digurithon jala diditongoshon tu huria na marserak i, asa paingothon huria i di ruhut-ruhut ni parange na denggan tudos tu pangalaho ni Kristus songon ulu ni huria. Diampehon do huria i tu ngolu na marragam hamaolon, pencobaan nang angka godang ni penderitaan. Mangadopi berbagai keadaan na masa, songon tantangan, penderitaan, halumlamon, lan angka na asing dope. Surat 1 Petrus on mangalehon sada pambohalion, asa tama halak Kristen marpangalaho songon parbue ni haporseaon na marsorminhon ngolu ni Kristus. Asa songon halak na boi tiruan nean halak Kristen i marhite pangalaho na denggan jala na marojahan di bagasan holong, songon angka apostel i na mambahen Jesus gabe tiruan nasida. Ala ni, halak Kristen ingkon boi do patuduhon haporseaonna marhite pambahenan dohot pangalaho nabiar jala unduk tu Debata, huhut boi papatarhon ngolu na marholong ni roha na manontong, ias, jala uli tu dongan jolma. Halak Kristen mansai porlu do mangolu di bagasan holong niroha, alana holong ni roha i do pataridahon pangalaho na siihuthon Kristus hita.

II. Hatorangan

  1. Ayat 17
    “Molo Ama digoar hamu Ibana”. ‘Ama’ dison ima Debata na gabe Ama di saluhut bangso di portibi on na mangolu di bagasan habadiaon. Dihatindanghon si Petrus do i asa mangonjar semangat dohot patoguhon angka halak Kristen asa terlibat jala parsidohot nasida marpangalaho habadiaon. Ala ni, ingkon do parateatehonon songon dia do hita marpangalaho. Ama na ni maksud ni si Petrus ima: “Ama na manguhumi nasa jolma na marguru tu pambahenanna”. Hata ‘manguhumi’ tuat do i tu panguhuman na parpudi ni Debata Ama tu saluhut angka bangso-Na, dohot panguhuman na torus taripar sian Debata diganup gulmit ni ngolu ni angka jolma i. Dihaholongi Ibana do sude angka ianakhon-Na, jala diparade Ibana do hatuaon tu nasida, asa hatuaon i gabe parjambaran diganup ngolu nasida na porsea di Ibana, jala mardalan nasida di bagasan pangaramotion dohot parenta na sian Debata. Ima balga ni holong ni Debata Ama i, holong na so marpangansi do dibahen tu jolma i.
    “Marhatahuton ma hamu marparange di tingki paisolatanmuna”. Dihatindanghon si Petrus do paingothon angka jolma i, molo di portibi on holan parsatongkinan do, ala ni do didok ‘paisolat/menumpang’. Alai, ngolu na maarpaisolat i do manontuhon ngoluta di bagasan habadiaon sogot. Manjalo ngolu habadiaon do hita manang na daong. Molo naeng manjangkon ngolu na saleleng ni lelengna i, didok si Petrus asa marhatahuton hita saleleng di portibi on dope. Mabiar ima: parbue ni holong tu Debata dohot panandaion na sintong tu Panompa na sun gogo. Ngolu na marhatahuton dipatuduhon ma i marhite pangalaho na unduk tu Debata Ama, nolu na marpanghirimon tu Ibana disude gulmit ni parngoluon.
  2. Ayat 18-19
    Boasa si Petrus mengajari nasida asa marhatahuton tu Debata? Manang na asa mandapot pasupasu do manang na asa mandapot haluaon? Sasintongna ido. Saluhut halak na unduk dohot marhabiaran tu Debata mandapot haluaon do nasida, dipasupasu jala ditobus marhite mudar na mansai arga. ‘Panobuson’ i ma sada natinuhor sian parhatobanan. Johanes 8:34, “Dung i didok Jesus ma mangalusi: Na tutu situtu do na hudok on tu hamu: Hatoban ni dosa do ganup na mangula dosa”. Marhite ayat on, patar situtu ma jolma i nunga dirajai dohot diparhatoban dosa. Dosa na mamparhatobanhon halak, tarida do i sian gogo ni jolma i naso tuk manjadi. Ala ni do, dibuat Debata ma inisiatif laho paluahon jolma i sian parhatobanon ni dosa i. Dilehon Debata Ama ma Anak-Na ima Tuhan Jesus Kristus gabe panobusan ni dosa i. Jala holan i do dalan ni angka jolma i layak gabe naposo ni Debata.
    Panobuson na didok si Petrus dison, ima panobuson sian “cara hidup yang penuh dengan kesia-siaan yang diwarisi dari nenek moyang’. Tangkas do on patuduhon ngolu na mardosa, sia-sia papatarhon ngolu nang pangalaho na ramun, dang marguna, jala digohi dohot panghirimon na sia-sia naso mararga di jolo ni Debata. Ditobus jolma i, “ndada binahen ni sere manang perak, angka na olo buruk, alai binahen ni mudar ni Kristus na arga i do, na songon mudar ni birubiru na so hasurahan, na so marlindang”. On ma na patuduhon dang adong na boi manobus hita sian dosa dohot denggan so holan ala ni mudar ni Tuhan Jesus Kristus na songon mudar ni birubiru na so hasurahan dohot na so marlindang. Jala on do na papatarhon tu hita na holan Kristus i do panggonopion ni birubiru di Padan na Robi, alai Kristus di Padan na Imbaru i pataridahon haluaon na so marpangansi salelengnilelengna. On ma sada jaminan haluaon na dipasahat Tuhan Debata tu hita jolma mandapot jambar hangoluan ro disalelengnilelengna.
  3. Ayat 20
    “Naung ditodo do Ibana hian tagan so ojak dope paortibion”. Jesus Kristus ma na tinodo ni Debata andorang so ditompa dope luat portibi on, Jesus Kristus do na tinurpukhon Debata laho patulushon aha na hinalomohon ni roha-Na di luat portibi on. Alai boi do dadapon rencana ni Tuhan laho manobus sude angka dosa ni jolma i dang tindakan darurat i, manang dang rencana na mendadak i. Alai sangkap panobuson i nunga adong andorang portibi on di tompa. Hamatean dohot haheheon ni Kristus i dang ala ni na muba sangkap ni Debata laho mngadopi situasi na tarida i. Alai, angka i nunga dipapatar i jumolo di bagasan sangkap ni Debata Ama, asa dapotan haluaon dohot hangoluan saluhut halak na manghaporsea i Ibana di bagasan Tuhan Jesus Kristus.
  4. Ayat 21
    “Marhite Ibana (Jesus) do dihaporseai hamu Debata”. Dang boi tarjalo hita haporseaon na mangolu dohot manjalo asi ni roha ni Debata so holan marhitehite Kristus. Ala ni, mansai tama do hita marningot Kristus Jesus ‘suman ni Debata na so tarida i; na parjolo tubu sian nasa na tinompa (Kol 1:15). Kristus do na gabe dalan ni angka jolma i asa sahat tu Debata, jala holan Kristus do na boi pamonanghon dohot pasonanghon rohata, gabe boi hita rot u adopan ni Debata marhite haporseon na manontong maradophon Ibana. Ala ni, tardok ma hita angka ianakhon na dihahologan-Na.
    Dihatindangkon si Petrus do taringot tu haheheon dohot habadiaon ni Kristus i, asa adong dasar ni haporsean ni saluhut jolma i na mansai togu. On do partinandaan ni bangso i: marhite panobuson ni Kristus i, nungga dijangkon Debata Ama dibagasan asi ni roha-Na. Ala ni do umbahen gabe hehe Jesus dibagasan habadiaon-Na i. Hombar tusi, lam tama ma hita mandok mauliate tu Debata marhite haporseaon dohot pangkirimon na mangolu maradophon Ibana.
  5. Ayat 22
    “Paias hamu ma rohamuna, marpangoloion di hasintongan”. Pangurasiaon dohot haunduhon diulahon dang ala ni hagogoon sandiri, alai marhite Tondi Parbadia do anggo pangurasion i. Ingkon sadarionta do hon ala ni pangurupion ni Tondi Parbadia i do umbahen boi hita dibadiahon jala diurasi, dang ala ni usaha sandiri. Ala ni, halak Kristen ingkon do huhut martangiang dibagasan pangkirimon na mangolu di partondion, jala radot mangido gogo sian Tondi i asa diurupi hita disude gulmit ni parngoluan. “Mangeahi haholongon na so marlaok di dongan, asa masihaholongan situtu hamu sian nasa roha”. ‘Holong pardoganon’ diterjemahkan do i sian hata Yunani, ima: Philadelphia, na mardasor sian hata Phileo (cinta) manang Philia (kasih) dohot Adelphos (saudara). Na marlapatan ma i holong na so marpangansi, holong na so mardia imbar, holong na sintong maradophon dongan. Jala on do na patuduhon holong ni halak Kristen songon holong ni Kristus Jesus tu saluhut jolma di hau pinorsilang i. Joh 13:34-35 “Patik na imbaru ma hulehon tu hamu: Naeng ma masihaholongan hamu; songon holong ni rohangku di hamu, naeng ma songon i dohot hamu masihaholongan”.
    Mansai godang do halak na marsihaholongan, alai holan sian sisi luar do nasida masihaholongan, isarana: dipataridahon bohi na minar (senyum), hata-hata na mansai lambok situtu dohot lan na asing. Alai, anggo di rohana tung marapipudun songon gara. Songon i ma holong na marpangansi (pura-pura). Alai, holong na digombarhon si Petrus tu nasida ima ‘holong na so marlaok di dongan huhut masihaholongan situtu sian nasa roha’. Jala dipatudos si Petrus do holong i songon holong “Agape” lapatanna: ‘holong na so mementingkan diri sandiri’, manang ‘holong na so marsyarat’. Holong agape on ma na naeng sipeopon ni saluhut angka halak Kristen i. Ala identik do holong agape on tu holong ni Debata, na tubu sian Debata marhite panandaion di Debata jala Debata i do holong i (1 Joh. 4:7-8).
  6. Ayat 23
    “Ai nunga mangulahi tubu hamu, ndada sian boni na olo basebasean, sian na manontong do: Binahen ni hata na mangolu jala na mian i, na sian Debata”. Dipartudoshon si Petrus do posoposo na imbaru tubu tu sude halak Kristen i, gabe sada panindangion do i diibana asa boi nasida gabe halak naung diurasi, ias jala imbaru di bagasan Tondi. Dang songon boni na olo basebasean, sega, busuk. Alai, boni na sintong na sian Debata Ama dipaandar songon holong ni roha naung dilehon tu bagasan ngolu ni angka naung porsea di Ibana. Marhitehite hata ni Debata na pangoluhon nasida, mian ma di roha nasida holong na so marpangansi i. Songon panindangion ni si Johanes di 1 Johannes 3:9 “Ganub naung tubu sian Debata, ndang mardosa; ai na mian do di bagasan ibana bon ii. Ndang tarbahensa mardosa, ai nunga tubu sian Debata ibana”. Songoni ma halak naung disonggopi hata ni Debata sipangolu i huhut gabe mulak imbaru ma angka jolma na porsea di Ibana.

III. Sipahusor-husoron

  1. Turpuk jamita sadarion paandarhon ruhut-ruhut sipaihut-ihuton songon dia halak Kristen marpangalaho di ngolu siganup ari hombar tu haimbaruon naung jinalo na sian Debata. Jala holong ni roha na polin ima sada kemampuan manghaholongi donganna di sude halobian manang hahurangan na. Isarana ndang mandele baoa manang boru-boru (ama manang ina) molo jumpang na hahurangan ni dongan sajabu na. Godang do jolma na terkenal di portibion sai adong be do hahurangan na, olo hahurangan i jumpa di pardagingon, parrohaon (kejiwaan), moral na dohot ulaon na. Di ruma tangga, dang mandele ina molo pada akhirna diboto hahurangan ni amantana, songon ido nang sebalikna. Alai halak Kristen ingkon do mandalani ari-ari ni ngolu na mardomu tu habadiaon ni pangalaho/parange na tama maradophon Debata nang dongan jolma. Sada ojahan na mansai togu di ngolu ni halak Kristen ima tongtong marroha mauliate di angka pasu-pasu na jinalo sian Tuhan i. Hagogoon-Na do na mangurupi hita mandalani partingkian na tabolus. Asa naeng ma ta argahon hata ni Debata naung mian di rohata be.
  2. Ngolu na marhaimbaruon di tonga-tonga ni halak Kristen dipahombar ma tu poda ni Tuhan Jesus. Boi do adong perbedaan di tonga-tonga ni ngolu ni godang halak, nang huria di partingkian nang humaliang hita. Alai ingkon ingotonta do, saluhut do hita songon hapataran ni pamatang ni Kristus. Ala ni, ingkon di bagasan hasadaon ni roha do laho padimun-dimun holong marhite na saroha sapangkilaan.
  3. Pangoromon ni diri. Somal na adong do tolu bangko di hajolmaon na somal tarida dingolu siganup ari ima: mangulahon na jahat balos ni nadenggan (parjahat na sumalin), paduahon patupa na denggan balosni na denggan (bangko na somal diportibion). Patoluhon, patupa na denggan balos ni na jahat. Na patoluhon on ma identitas-hadirion ni halak Kristen. Patupa na denggan balos ni jahat (lam mamasu-masu ma hamu). Asa boi tu sikap na sisongon on, ingkon marsiranggut do halak Kristen mangorom diri (menahan diri), marhite na solo marhata ansi-ansi (manginsahi) dohot lan angka na asing.
  4. Sandok tarjou do halak Kristen marpangalaho na denggan asa gabe pasu-pasu tu na humaliang halak. Siala ni i, halak Kristen ingkon do mangorom diri tu ulaon na so tama di adopan ni Tuhan i, asa lam tang hita dihaporseaon jala na marpangunsadean tu Tuhani ma ngoluta. Tapatuduhon ma angka parbue ni pangalaho na marhaimbaruon jala naung tangkas panandonta di saluhut pambahenan ni Debata. Taingot ma Micericordias Domini: “Sai endehon ma angka asi ni roha ni Jahowa”. Marhite panindangion na mangolu, marojahan tu roha na marhamauliateon mamuji hatimbulon ni Tuhan i. Selamat marhaimbaruon ma dihita salutna, huhut mangolu ma hita di sangkap ni Debata. Amen.

Pdt. Uba Manatap Panggabean, S.Th

Bagikan Postingan ini: