JAMITA MINGGU INVOKAVIT – DEBATA MUAL NINASA ASIROHA

JAMITA MINGGU INVOKAVIT – 26 PEBRUARI 2023

Epistel:  Roma 5:12-19

I. Sibonsiri
Adong do dua horong, manang dua parpunguan/kelompok halak Kristen di Rom, ima Kristen Jahudi dohot Kristen naso Jahudi (Gorik/Junani). Di huta Rom ima mardomu na dua parpunguan manang horong/kelompok i. Halak Kristen Jahudi haporseaon nasida marharoroan sian hasomalon ni Jahudi/Yudaisme hian, na mangondolhon pangajarion taringot tu patik, haluaon ni jolma ima namangulahon patik ni Jahowa tu si Musa, haluaon ni jolma ima tanggungjawab ni sahalak jolma tu Debata. Diondolhon nasida do ringkot ni parsaoran ni sahalak jolma dohot Debata. Halak Kristen Junani/Gorik marharoroan sian hasomalon ni halak Junani na gok angka pande bisuk (filsuf) mangondolhon pangajarion taringot tu pangalaho (moralitas). Marningot i, manat do si Paulus asa unang sega huria di Rom, hinorhon ni na dua horong/kelompok na marimbar i. Molo si Paulus sandiri mangolu do ibana dibagasan dua adat na marimbar i (Jahudi dohot Gorik), alani i pamikkirionna marharoroan sian adat pangantusion ni Jahudi dohot Gorik, na gabe berpengaruh mai dipanghobasionna. Jala dua ma status kewarganegaraan na, ima di Gorik dohot Jahudi. Dipatudu ibana ma dua halak na marimbar ima Jesus dohot si Adam. Halak Jahudi na mura manjalo pangantusion taringot si Adam, dohot halak Gorik na mura manjalo pangantusion taringot tu Jesus ala angka pangajarionNa godang taringot tu bohado marpangalaho (moralitas). Bindu 5 on, dipatorang Apostel Paulus ma hajolmaon na sian si Adam (dosa) dohot hajolmaon na dibagasan Kristus (haluaon). Bindu 1-11 dipatorang ibana ma angka jolma na mardosa hian sian si Adam naung tinobusan ni Jesus, ayat 12-21 dipatorang si Paulus ma asiniroha ni Debata umbalga do sian dosa. Asiniroha ni Debata ndada holan manesa dosa na sian si Adam alai dohot do mangalehon hangoluan na manongtong. Halak Jahudi dohot halak Junani, ngolu ni jolma na so dipaimbaru ima ngolu dibagasan si Adam naso manjalo Jesus, alai ngolu napinaimbaru ima ngolu naung manjanghon Tuhan Jesus Kristus.

II. Hatorangan Ni Turpuk

  1. Ay.12. Dipatorang apostel Paulus do di turpuk on imbar ni halak naimbaru, dohot jolma naso dipaimbaru ni Kristus. Halak naimbaru ima naung tinobus ni Jesus, halak naso dipaimbaru ima namangolu di hadosaon (Adam), ima na dipatorang ibana imbar ni Jesus dohot si Adam. Umbaheni do dipangke ibana hata Gorik hosper/songon/sama seperti, songon. Ima na mambandinghon Jesus dohot si Adam. Molo haroroan ni dosa, ima sian jolma na parjolo ima si Adam, sahat tu pomparan ni si Adam, gabe ro hamatean tu saluhut jolma. Haroroan ni dosa ndada so tarbotoboto/tidak datang dengan sendirinya, alai adong do dalanna sibonsirina ima nadipangan si Adam parbue ni hau nasian porlak na di parsitongaan ni porlak i . Na dipatorang ni si Paulus di turpuk on, dosa ima nasa ulaon na maralo hombar tu lomo ni roha ni Debata. Lam bidang dosa diportibion, lam bidang do nang hamatean. Umbaheni do ro Jesus Kristus laho manobus dosa ni jolma naung teanteanan ni si Adam, dosa hamatean naung mambahen jolma mandao sian Debata.
  2. Ay,13-14. Andorang so ro dope patik di hatiha zaman ni si Musa, saluhut nasa dosa na diula ni jolma ndang dope dijujur Jahowa. Dipangke do di hata Gorik/Bahasa Aslina di ayat 13, ellogeitai (not imputed/tidak diperhitungkan/ndang dijujur). Alai boasa dang dijujur Jahowa dosa ni jolma andorang so zaman nisi Musa, boasa dung zaman nisi Musa dijujur Jahowa? Sasintongna ima ala ni habisuhon ni Debata. Ai ndang jujuron ni Jahowa dosa ni Jolma di hatiha andorang so si Adam ala dang dope ditanda angka jolma dope patik, dung di zaman nisi Musa pe baru dilehon Debata patikNa, lapatanna dung di zaman nisi Musa pe ditanda jolma patik. Alai nang pe ndang dijujur Jahowa dosa i, nungga manggomgomi hamatean olat nisi Adam sahat tu si Musa. (dosa sebelum Musa memang tidak diperhitungkan, tetapi maut sudah berkuasa). Nungga dilaosi si Adam parenta ni Debata (1 Musa 2:17, 3:1) laos songoni do didok di Rom 2:23 pangalosion dipahombar mai tu patik. Ido umbahen na didok nisi Paulus Rom 4:15, “Ai dihorhon ni Patik I do rimas, alai anggo soada patik i do rimas; alai anggo so ada patik laos so adong do pangalosion”. Pangalosion ima parulaon secara sadar, na maralo dohot sangkap ni Debata. Alai dosa na didokna di ayat 13 ima dosa ndada alani pangalaho alai huaso na Manahan jolmai (Rom 3:9). Na tangkas do dosa nungga adong andorang so ro patik,nang pe so dos pardosaon ni jolma andorang so ro patik dohot tingki dung ro patik, alai hamatean do upa ni dosa tarmasuk sahat tu jaman nisi Adam tu si Musa.
    Sude do jolma di portibion mardosa, mulai sian si Adam jolma na parjolo sahat tu si Musa na manjalo patik sian Jahowa. Nungga adong dosa andorang so ro dope patik, ala pangalosion nisi Adam. Jolma mardosa ndada hinorhon ni pangalosion sian patik, alai dosa do mambahen jolma mangalaosi patik ni Jahowa. (manusia berdosa bukan karena hukum taurat alai tabiat ni dosa yang sudah ada sejak zaman Adam membuat manusia melanggar hukum Taurat).
  3. Ay.15-17. Paulus mamakke di hata Gorik paraptamati/offence, pangalosion dohot hata charismata/asi ni roha. Dipangalosion ni jolma manghorhon dosa dohot hamatean, alai dapotan haluon do jolma holan ala asi ni roha ni Debata. Molo ala ni sahalak (Adam) mambahen jolma tu hamatean alai marhite asiniroha ni Jesus Kristus dapotan hangoluan do jolma saleleng ni lelengna (Yohanes 3:16) diangka na olo porsea tu Ibana. Dosa na binahen ni si Adam ido manegai parsaoran ni jolma dohot Debata, umbaheni do ro Jesus Kristus laho padamehon hita dohot Debata Jahowa. Turpukta sadarion laho patuduhon tu hita asi ni roha ni Debata ndang tudos tu dosa na binahen ni sahalak jolma. Ndada alani haburjuon ni jolma umbahen dilehon Debata haluaon, alai holan ala asiniroha ni Debata mangida jolma ndang be tolap mangadopi pangarajaion ni Dosa, nungga tarrante be jolma ala ni dosa tu hamagoan (Rom 6:23), basabasa ni Jahowa nama mambahen jolma malua sian panguhumon. Sian Roma 5:12-17 on, Apostel Paulus patoranghon ima saluhut nasa dosa na di portibion ro hinorhon dosa pangalosion naung binahen ni jolma na parjolo ima si Adam. Pardosaon I mambahen jolma tarrante dibagasan dosa gabe mambahen jolma tu hamagoan, alai ala ni asiniroha ni Debata dibagasan Jesus dapotan asiniroha ma jolma na umbalga sian dosa na binahen nisi Adam.

    III. Sipahusorhusoron
    Asiniroha ni Debata dibagasan Jesus Kristus do umbahen boi malua Jolma sian dosa, ndada alani haburjuon ni jolma. Marasing do Hakristenon sian ugamo ni silom na mangajarhon haburjuon/ parulaon na denggan do manghorhon haluaon sian dosa. Alai molo di Hakristenon, haluaon I do mambahen jolma gabe mangulahon angka na parulaon na denggan. Jadi, tanda ni jolma naung mandapot haluaon ima sian parulaonna na denggan. Ulahon ma angka na denggan patandahon dirim songon sahalak naung tinobus ni Kristus. Paholang ma dirim sian nasa hajahaton, na olo patubu dosa. Nungga diputus, digotap Jesus dosa teanteanan na binahen nisi Adam, umbahen i unang be patubu dosa alani pangalahom. Ai godang do jolma sala mangantusi, adong pandohan mandok “halak Kristen bebas do mangulahon dosa ala Jesus do manobus dosa”. Tongon do Jesus manobus dosa ni jolma alai na tinobus ni Jesus dosa teanteanan do, ai sahali do ibana tarsilang ndada dua hali. Molo hot dope hita mangulahon dosa dipartingkian on, hape nungga digarar dosanta dibagasan Jesus, dirinta be nama na manaon i di ari sogot, ima di ari paruhuman i. “Ai taboto dom naso mate be Kristus, dung mulak mangolu sian namate pe Ibana, sahali doi, alani dosa; ia mangolu nuangem di Debata doi, suman tusi ma rajumi hamu ma dirimuna, songon naung mate di dosa I, alai mangolu di Debata dibagasan Kristus Jesus, antong unang be dosa I mangarajai dibagasan dagingmuna na olo mate , mangoloi hisapna (Rom 6:9-11)”.
    Haholongi ma Debata, ai nungga parjolo ibana manghaholongi hita na mangalehon asi ni roha dibagasan Jesus Kristus. Antong marsihohot ma hita dinamangarodoti patikna songon halak naung tinobusan ni Kristus, asa dapotan pasupasu hita. “radoti hamu ma angka patikhu, ima dalanna asa mian hamu dibagasan holong ni rohangku, songon ahu pe na mangaradoti patik ni Damang gabe mian dibagasan holong ni rohaNa” (Johanes 15:10). Asa manang ise bongot tu harajaon ni Debata ima jolma na mangulahon lomo ni roha ni Damang na diginjang i do (Mateus 7:21).

    Pdt. Sunggul Manik, S.Th, M.Si

Kunjungi juga!

Kanal YouTube HKI untuk mengetahui informasi seputar pelayanan HKI.

Arti Nama-Nama Minggu

JAMITA MINGGU, 19 FEBRUARI 2023 – MINGGU, ESTOMIHI

Bagikan Postingan ini: