KOLOSSE 2 : 6 – 15, EPISTEL MINGGU IX DUNG TRINITATIS MINGGU, 24 JULI 2016

PATUJOLO

Kolose ima sada huta di Frigia jonok tu gonting Likus na di bagasan panggomgomion ni Romawi, gabe huta namansai arga do on di masa panggomgomion ni si Lidia dohot si Pergamus, alai dang mararga be huta i dimasa padan naimbaru tarlumobi di masa panggomgomion ni si Nero di Roma. Dang si Paulus na pajongjong huria on, adong deba mandok si si Epafras halak Kolose do mamboan barita na uli tu Kolose marhite naung di dapot ibana pangajaran i sian si Paulus uju di Efesus si Paulus marbarita. Alai si tongtong do marhubungan nasida na dua, ai sai dipasahat si Epafras di barita ni huria Kolose tu si Paulus dohot perkembanganna. Ido umbahen na sai tongtong di boto si Paulus aha na masa di huria Kolose, laos ido mambahen si Paulus boi manurathon surat na tu huris Kolose.

Di surathon si Paulus surat on tu huria di Kolose, laho pahothon haporseaon ni nasida tu Tuhan Jesus. Ala godang do masa di hatihai angka pangajaran na sesat/ pangajaran na so sintong taringot tu Jesus dohot taringot tu parsunaton na ni ula di tradisi ni halak Jahudi. Tarbahen masa do i di Kolose, marnida letak ni Kolose na tepat di perimpangan opat luat mambahen marragam suku na tading disi isarana suku Jahudi, Yunani, Frigia dna. Gabe godang do na gale jala moleng haporseaon ni halak kristen di Kolose alani pangajarion na so sintong i. Di paingot si Paulus huria i asa jaga di angka pangajarion na so sintong i jala asa hot nasida marhaporseaon tu Tuhan Jesus naung mangalehon hangoluan tu nasida marhite na tarsilang Ibana jala naung hehe Ibana humongkop nasida. Asa molo tung pe godang na manggasipi manang na naeng mangago nasida asa tung unang ganggu nasida di hangoluan dohot haluaon naung ni jaloni nasida sian Tuhan i. Disamping ni i, ingkon marparange ma nasida di ngolu naimbaru hombar tu Tuhan Jesus naung manobus nasida, ai marhite panobusonNa i do nasida manjalo tohap di hatiuron i. ima na nisosohon ni si Paulus di suratna tu huria Kolose na tung sude huria di partingkian on.

HATORANGAN NI TURPUK

Ayat 6-8: di ayat on di patorang songon dia do ngolu ni jolma naung manjangkon Kristus di ngoluna. Didok: marparange di bagasan Ibana. Hata “di bagasan” lapatanna marparange hombar tu dalan lomo ni rohana, marparange hatiuron songon Ibana naung mangalehon hatiuron i. Dang haluar sian dalan dohot angka parentaNa, alai ingkon marparange ma nasida songon parange ni Jesus naung ni jangkon na i. dang holan i, alai ingkon songon partubu ni hau na denggan do partubu ni haporseaon ni nasida, marurat na denggan. Ai molo hau molo dang denggan parbuena, biasana pintor urat na do di pareso, berarti adong masalah di uratna. Songon i do nang haporseaon i sai tarida do parbuena na denggan molo denggan haporseaon i bertumbuh/ marurat. Didok muse na ingkon pinauliuli (di B. Indonesia: Dibangun) lapatanna di paojak dibagasan Ibana. Tuhan i ma na gabe dasar/ haojakanna di na marparange di bagasan ngoluna, dang manimbil tu siamun manang tu hambirang. Ingkon togu ma nasida tu pangajaran taringot Kristus naung diajarhon tu nasida, huhut di ingot mandok mauliate. Alana sian pangajarion i do di tanda nasida Kristus jala porsea jala ida na mamboan nasida tu hangoluan na marhatiuron i, jadi ingkon tama dohonon ni nasida mauliate huhut ingot jala hot nasida di hata I.

Didok muse asa ingkon jaga nasida lapatanna asa ingkon manat nasida diangka pangajarion na ro tu nasida. Ai godang do parhata bisukbisuk dohot parhata lessem di luat i na laho mangago haporseaon ni nasida tu Tuhan i. Mamangke podapoda haliluon na sian haportibion na mura di jalo angkal logika. Alani ni i ingkon manat jala bisuk nasida manirang dia do hata pangajarion na sian Debata siihuthononna jala dia do hata na so sian Debata na naeng si pasidingonna na so boi ihuthon na. Ingkon bagas botoon nasida jala ingoton nasida molo haluar nasida sian hata Debata na mago do nasida.

Ayat 9-10: Di ayat on di dok na dibagasan Jesus i do maringanan gok ni hadebataon na marrupahon daging, na madok gombaran ni Jesus do i ima Debata naung marrumang jolma. Jala na marhite Jesus Kristus i do dapotan nasida di hagogok na i. Marlapatan doi, molo di luar ni Jesus tung so tarbaen dapotan do nasida di hagogok ni hangoluan na marhamuliaon i, ingkon na di bagasan Jesus do. Ido asa didok, Ibana do ulu ni nasa hamuliaon dohot panggomgomion (molo di B. Indonesia didok: kepala semua pemerintah dan penguasa). Pataridahon na tunduk do tu Ibana huaso ni manang aha pe na di portibion. Suang songon i nang jolma i, sai na boi do jolma i marhamonangan manaluhon gogo pangagoon sian portibion molo Jesus Kristus i do di bahen ulu na mamarenta jala na manggomgomi ngolu ni jolma i. Ido asa pola di papatar si Paulus hataon, asa tung di boto huria i songon dia do bahenonna laho mangalo parpoda haliluon i jala asa hot ibana tu poda ni Kristus, ingkon Kristus i do bahenonna gabe dasar, ulu, dohot panggomgomi di ngolu ni huria i.

Ayat 11-13: di ayat on di bahas do masalah sunat. Ima masalah na sai di paralohon halak Jahudi tu halak na porsea si ihuthon Jesus, ala halak Jahudi angka na mangihuthon uhum ni si Musa ikon na tarsunat do secara jasmani. Gabe di hata halak Jahudi angka na porsea i ala dang di sunat nasida. On ma mambahen di patorang si Paulus aha do lapatan ni sunat dung mangolu di bagasan Kristus. Sunat dung mananda jala mangolu di bagasan Kristus ima sunat sian angka pangalaho na so suman, sunat sian ngolu hadagingon na gok dosa, ndang sunat sibuk na binahen ni tangan. Ai marhite ulaon ni Kristus di tanoon do di sunat Jolma i, marhite na mate tarsilang ibana jala mulak mangolu jala hehe gabe di sunat jolma i sian angka dosa pangalasionta dohot sian angka pangalaho na ramun di ngolunta. Jala marhite pandidion na badia i do gabe rap tartanom jolma i rap Kristus, tartanom dang dagingna alai angka dosa dohot pangalahona na ramun i do, jala di naung tartanom i angka ngolu na gok dosa i, di pahehe do jolma i gabe marngolu na imbaru ima marhite haporseaon na tu Kristus i di haheheonNa. Jadi ngkon rajuman ni jolma i do, di naung di pahehe Kristus i jolma i gabe marngolu na imbaru, ingkon toho ma jolma i mangolu di ngolu na imbaru na hombar tu Kristus i.

Ayat 14-15: Tangkas do di patorang di ayat on na halak parutang do jolma i ala ni dosana, marutang dosa alani angka aturan dohot patik na di pamasa di tongatonga nasida. Alai saluhut na utang i dibayar lunas marhite na tarsilang Jesus Kristus. Gabe marhite i ma tarida hagaleon ni angka pamarenta dohot angka panggomgomi, ai nunga adong aturan dohot parenta na lobi timbo sian Debata ima parenta dohot aturan “Holong”. Holong i mambaen sesa utang ni angka pardosa di hau pinarsilang i gabe marhangoluan nasida. Gabe patar ma hamonangan ni Kristus i dohot hamonangan ni angka si ihuthon Ibana, alai laos di paebang do angka na talu i naso porsea jala mangihuthon Ibana.

HAHONAAN NA

Di jaman saonari godang do na ginoaranna Kristen KTP. Pemahaman marnida kenyataan na masa ni hakristenon. Didok dirina Kristen alai dang toho siihuthon Kristus jala dang mangolu di bagasan Kristus. Mura moleng binahen ni masa di portibion. Ro angka elaela, pintor ragu di naung ni haporseaan na, isarana molo di tingki marsahit manang di tingki adong siluluan, holan adong jolma patudu dalan sian gogo portibi pintor tertarik laho mangoloi. On ma sada sian godang contoh angka pangajarion na so sian Debata. Godang dope boi taida angka pangajarion na so suman na so sian Debata mambahen jolma i gabe dang mabiar mangulahon angka ulaon na ramun. Alai di bagasan turpuk on di sosohon tu hita, molo nunga tajalo Kristus i di ngolunta jala ta haporseai, ingkon ma mangolu hita hombar tu dalanNa, ingkon ma hita marparange di bagasan Ibana. Ingkon jaga jala manat hita di angka elaela ni si bolis na naeng mamboan hita tu hamagoan. Ingkon ingotonta ma na di bagasan Kristus i do hita marhangoluan jala molo mandao sian Ibana ulaon na gabe mago do hita.

Godang do sahat tu partingkian on na sai sungkunsungkun taringot tu sunat daging na di pamasa uju di padan na robi alai dung di masa ni Jesus gabe mago sunat daging i. molo ta ida di turpuk on jelas do di paboa si Paulus naung tarsunat do Jolma i marhite naung porsea ibana tu Kristus i. Ai dang sunat daging na porlu di na mangihuthon Jesus Kristus alai sunat di parrohaon do, sunat sian angka dosa dohot pangalaho na ramun. Alani i di hita halak naung mangaku si ihuthon Jesus jala naung manjalo pandidion i naung di sunat do hita disi, jala ingkon mangolu ma hita songon jolma naung tarsunat. Dang holan i, naung di pahehe Tuhan i do hita sian hamatean alani dosa i alani i ingkon hehe ma hita jala marparangi di ngolu na imbaru na marhatiuron. Tapadao ma ngolunta sian angka ulaon na ramun dohot ulaon haholomon.

Di papatar Tuhan i do hamonangan di angka na porsea, di angka si ihuthon Ibana marhite hamonangan na maradophon panggomgomi di portibion. Nunga di lunasi Tuhan i be utangta ala dosa i. Alani i taigot ma na so adong be utang ta alani dosa maradophon angka aturan na di pamasa. Alai dang marlapatan i molo adong aturan di huria manang negara gabe dang turutan. Alai naung di pasuang Tuhan ido angka pelanggaranta jala di lean uhum manang aturan na tumimbo dope di hita ima holong i. asa marparange hita di bagasan Holong jala mangulahon angka aturan na adong i di bagasan holong. Ai nunga di papatar Debata na talu do angka uhum i di bahen uhum holong i, ima uhum na paluahon jolma i. Asa mangolu ma hita di hamonangaon songon Tuhan i naung monang, ai na talu i di paebang Tuhan i do. Na talu i ima angka na so mangolu di bagasan Tuhan i dohot na so mangulahon Uhum Holong i.

(C.Pdt. Rolisma br. Lumbangaol, S.Th)