EPISTEL JAMITA MINGGU, 16 APRIL 2023 – MINGGU QUASIMODOGENITI

Pangungkapon 21 : 5 – 7

DITUBUHON PADUAHALIHON MARHITE HATANIDEBATA

I. Patujolo
Buku pangungkapon marharoroan sian hata gorik apokalipto na maralapatan diungkap Debata angka hahomion di angka ari na ro. Dibagasan kanon buku pangungkapon dibahen di panimpuli, jala gok angka simbol-simbol dipangke panurat buku on laho patoranghon hahomion ni sangkap ni Tuhan i. Panurat buku on margoar si Johanes, na mangolu di masa pangaleleon na posa di rezim ni kaisar Rom namanghasogohon hakaristenon ima kaisar Nero dohot Domitianus. Angka kaisar Rom on patupahon uhum panombaon tu kaisar, alai halak Kristen manulak i siala holan Debata dibagasan Kristus sambing do napatut disomba, laos i do bonsirna dilele jala dipusa halak Kristen ditingkii. Buku on marisi 22 bindu jala adong 404 ayat, digurithon hira-hira taon 90-96 Masehi ditingki si Johanes dibolonghon tu pulo namargoar Patmos (1:9), jala ondolan ni buku on ima : Jesus do raja diginjang ni saluhut raja, Tuhan di ginjang ni saluhut na margoar tuhan.

II. Hatorangan Ni Turpuk
Turpuk jamitanta sadarion paboahon taringot parnidaan ni si Johanes ditingki diungkap Debata tu ibana angka na masa di ari parpudi, dipatudu Debata ma tu ibana songon dia do banua ginjang dohot tano na imbaru. Diida si Johanes hundul Debata di habangsaNa i jala didok di hata gorik Ποιώ Παντα καινός (poieopantakainos, i will make all things new) na marlapatan: Saluhutna do Hu paimbaru. Hata καινός (kainos, new) manang imbaru patoranghon situasi na so dos dohot haportibion on. Tontu haimbaruon na nidok ni Debata dison ima ngolu na so sarombang dohot portibion, ngolu sisongoni ma na ingkon adong di hita dalan laho manomunomu haroro ni ari parpudi. Jala dipangido Debata tu si Johanes asa disurathon Hata i ai sintong jala haposan do Hata i. Hata surathon di hata gorik dipake hata γραψω (grapho, writing) ndada marlapatan disurat songon panurat ni pulpen tu buku, alai manghangoluhon Hata i. Jala terminologi Hatai di hata gorik dipangke hata λόγος (logos, word) na patoranghon Jesus i. Tontu boi ma antusanta, asa tarbahen hita jolma dapotan haimbaruon nasian Debata, ingkon ta hangoluhon do Jesus i. Dungi didok Debata ma muse tu si Johanes, nunga saut. Molo dihata gorik dipangke hata γινομαι (ginomai, it is done). Artina, dibagasan Jesus i nunga sikkop be saluhutna, dibagasan Jesus ido finalitas ni saluhut sangkap ni Debata, na so tarpauba, na so tarunsatan jala tarambati, sandok ingkon saut do. Siala dibagasan Jesus ido hagonopon hadirion ni Debata ditonga-tonga ni nasa na tinompa ni Debata. Asai do didok hata on, dibagasan Jesus i do gabe patar ma tarida ia Debatanta ima Debata naparjolo jala parpudi Λλψα και Ω (alpha kai omega), Debata do bonana jala ujungna άρχήκαιτέλος (arche kai telos, beginning and the end). Molo tarimangi turpuk on, lam antus ma tu hita : Tutu do adong hasintongan jala haulion dohot hadenganon ni Debata diganup nasa parugamoan di liat portibion. Ai holan dibagasan Jesus i do hasingkopan, haulion dohot hadenganon ni Debatatai. Tontu, nasa jolma, nasa na marhosa, nasa adat-budaya jala nasa parugamo ringkot do ibana tu Jesus i asa dohot taruli di hasingkopan nauli na denggan na sian Debatai.

Jala molo ta paratehon muse adong kaitan ni Jesus dohot halak na manean baga-baga ni Debatai. Hata panean di hata gorik dipangke hata κληρονομήσει (kleronomesei, inherit) na patoranghon hak waris manang mewarisi. Artina Jesus do alat legatimasi ni jolma diadopan ni Debata, asa adong hakna manang bagianna di angka haluaoni, ndada be mudah-mudahan manang semoga haluaon ni Tuhan i, alai gabe hak waris molo dibagasan Jesus i do jolmai. Jala molo ta parate-atehon muse turpuk on, dung dibagasan Jesus jolmai masa ma transformasi harkat-martabat ni jolma i diadopan ni Debata. Sian jolma naramun jala pardosa, gabe jolma na tardok angka ianakon ni Debata. Hata anak dihata gorik dipangke hata υίός (huios, son) lapatanna: Gombaran ni bapana, hak waris ni amongna, dongan jala na rap dohot amongna. Tontu lam antus ma tu hita antong lapatan ianakon ni Debata. Nasa jolma na targoar ianakon ni Debata, tontu ibana ma na gabe gombaran ni Debata di nasa parngoluanna, jala gombaran parange ni Debata natarida dibagasan parangena, jala parsaoranna pe dohot Debata berlangsung secara terus-menerus doshon parsaoran ni angka ianakon tu amongna.

III. Hahonaan Ni Jamita
Goar ni mingguta sadarion ima quasimodogeniti na marharoroan sian bahasa Latin, namarlapatan songon poso-poso na imbaru tubu, nauasan jala marsigantung sian susu na tama sian natorasna.Tontu songon poso-poso do hita diadopan ni Debata, ingkon uasan do hita di angka susu natama sian natorasnta. Persoalanna nunga gabe ianakon ni Debata dirinta, pangalahonta? Asa boi gabe ianakon ni Debata hita, ingkon ditubuhon do hita paduahalihon dibagasan hata ni Debata, jala Jesus i do na dimaksud Hata ni Debata i. Alani ndada mungkin jolma i boi gabe ianakon ni Debata, molo ngoluna sandiri dang porsea jala manghangoluhon angka ajar dohot patik ni Tuhani. Ditubuhon paduahalihon marlapatan ma i marhamubaon ni roha, siala haporseaonta tu Tuhan Jesus. Amen.

Pdt. Ewen Josua Silitonga

Kunjungi juga!
Kanal YouTube HKI untuk mengetahui informasi seputar pelayanan HKI.

Bagikan Postingan ini: