DIJOU ASA MASIHAHOLONGAN OLEH PDT. EWEN JOSUA SILITONGA – JAMITA MINGGU IV DUNG TRINITATIS – MINGGU, 30 JANUARI 2022

"Dijou Asa Masihaholongan"

JAMITA MINGGU IV DUNG EPIPHANIAS
MINGGU, 30 JANUARI 2022
Evangelium: Jeremia 1:4–10

Patujolo
Buku Jeremia marisi 52 bindu jala adong 1364 ayat, marhite tradisi diangkui do buku on sinurathon ni Panurirang Jeremia di Juda, Jerusalem hirahira taon 585-580 SM. Buku Jeremia marisi angka hata singotsingot ni Debata tu bangso na di angka dosa dohot pangalaho nasida na so patut. Asa molo so marhamubaon bangso i, na ingkon saut ma ro uhum ni Debata tu bangso i. Panurirang Jeremia sandiri manghobasi di Israel Selatan (Juda), jala mangolu dope ibana mangida songon dia hasintongan ni uhum ni Debata, na jongjong harajaon Babel manaluhon harajaon Juda, songon dia Babel mangarumpakhon Bagas Joro ni Debata na di Jerusalem jala bangso Juda diambolonghon tu parhtobanon di Babel. Jeremia i ma ianakhon ni sahalak malim jala tubu di huta Anatot di masa ni raja Manasye, panjouon ni si Jeremia gabe panurirang ni Debata i ma di masa hajongjongan ni raja Yosia di Juda. Jeremia sandiri jotjot do digoari panurirang pangandungi, siala hata panurirangon ni si Jeremia na marisi uhum ni Debata tu bangso i na patut niandungi.

Hatorangan ni Turpuk
Turpuk jamita on boi sinagi di bagasan tolu bagian, i ma:

  1. Hata ni si Jeremia na ro sian Debata do (ayat 4)
    Jadi na ro ma hata ni Jahowa tu ahu. Molo di bagasan tradisi hapanurirangon Padan na Robi hata na mandok dung i ro ma hata ni Debata, songonon ma hata ni Debata, i ma ciri khas ni panurirang na sian Debata. Siala hatiha i di masa ni si Jeremia nunga godang angka panurirang pargapgap manang panurirang palsu. Molo angka panurirang pargapgap dia hata na pasonangsonanghon roha ni jolma angka i do na didok, ai naeng mangalului pangomoan do ulaon ni panurirang pargapgap. Alai molo panurirang ni Debata, angka hata pinsangpinsang manang hata singotsingot do haruar sian ibana, ai hamubaon ni roha do naniluluan nasida hombar tu lomo ni roha ni Debata.
  2. Panjouon dohot pamilliton ni Debata tu jolma (ayat 5)
    Songon dia do panjouon dohot pamilliton ni Debata tu hita jolma hombar tu hasintongan ni hata ni Debata di bagasan turpukta on? I ma:
    a. Tagan so Hujadihon dope ho di bortian nunga Hutanda hian ho
    Sian hata ni Tuhan on boi ma antusanta, diboto Debata do angka ise jolma na naeng pangkeon-Na gabe naposo-Na, andorang so ditompa Debata jolma i. Lapatanna, andorang so diboto jolma i dope dirina sandiri, nunga parjolo Debata umboto jala mananda jolma i. Debata do na parjolo sahali mananda hita, andorang natorasta mananda hita jala hita mananda natorasta. Ala ni i do hajongjongan ni jolma di sisik ni tano on, ndada siala kebetulan, alai di bagasan parbinotoan ni Debata do, i do umbahen na didok, hasangapon ni jolma do molo mangolu ibana di bagasan sangkap ni Debata na manompa ibana. Laos i do na patoranghon molo manimbil jolma i sian sangkap panompaon ni Debata, laos i do na mambahen gabe gok hamaolon di pardalanan ni ngolu ni jolma i.

    b. Jala tagan so ruar dope Ho sian ampuan ni natorasmu nunga Huparbadiai hian ho
    Molo tasungkun, antong aha do tujuan ni Debata laho manompa hita jolma? Tangkas do dialusi turpuk on: Asa Huparbadiai ho. Lapatanna, ditompa Debata jolma i asa badia songon Debata na badia i. Molo di hata Heber dipangke hata-verb, qadash, sian hata dasar nouns, qadosy (sanctified) na patoranghon parngoluan na marasing manang pulik sian haportibion. Jadi, badia lapatanna dang dos songon portibion.

    c. Hupabangkit Ho gabe panurirang tu angka bangso
    Jala sangkap ni Debata manompa hita jolma, asa gabe panurirang ni Debata do hita tu nasa jolma manang bangso. Panurirang ndada holan jabatan parugamoan sambing, alai hapanurirangan i tong do mandok parsaoranta tu Debata. I do umbahen na didok panurirang i, i ma halak na umbege jala na manghatahon hata ni Debata, molo di hata Indonesia didok: Perpajangan lidah Allah, juru bicara Allah. Molo denggan do parsaoranta tu Debata, tontu gabe boi ma taida jala tabege hasintongan ni Debata, asa tapasahat, tahatahon tu ganup donganta jolma, asa tongtong nasida taruli di angka denggan basa ni Debata.
  3. Unang mabiar mangulahon parsuru ni Debata (ayat 6-10)
    Tingki dijou, dipangkulingi jala dipillit Debata si Jeremia asa gabe panurirang, manjua do si Jeremia, dibahen ibana sidalianna: ndang huboto mangkatai, ai na bajar dope ahu. Sasintongna didok si Jeremia pe hata na i sidalian na sambing do i, ai sasintongna na mabiar do ibana tu bangso i. Tangkas do diboto si Jeremia parange ni bangso i na tangkang marroha, mabiar si Jeremia dang dibege manang dietongi bangso i molo dipasahat ibana hata ni Debata tu tongatonga ni bangso i. Alai dialusi Debata ma si Jeremia: unang ho mabiar maradophon nasida, ai sai Ahu do donganmu, paluahon ho. Gabe dijama Debata ma pamangan ni si Jeremia jala dipasahat Debata hata-Na tu pamangan ni si Jeremia, asa margogo ibana mangulahon ulaon hapanurirangon na, i ma: laho mangurati dohot maniaphon, mangago dohot mangaloha, paulihon dohot manuan. Aha ma na naeng didok turpuk jamitanta on? Asa unang mabiar hita mangulahon ulaon na sinuru ni Debata, asa molo Debata na manuru, Ibana sandiri do na paradehon manang aha na ringkot tu hita, asa margogo laho mangulahon parsuru ni Debata. Bolongkon jala gotaphon ma biar ni roha di bagasan ngolum di namangulahon ulaon ni Debata. Ai jotjot do angka biar ni roha i gabe sipangambat laho mangula parsuru ni Debata. Unang ma hita mabiar, ingkon marpos ni roha do hita asa digohi gogo ni huaso ni Debata ngolunta.

Hahonaan ni Jamita
Goar ni minggunta on i ma, Minggu IV Dung Ephiphanias, lapatanna hapapatar ni Debata, jala ondolan ni jamitanta i ma: Dijou Asa Masihaholongan. Ephiphanias molo di hata Gorik didok, Theophani namarlapatan, hataridaan manang hapapataron ni Debata, songon Debata na papatarhon diri-Na tu si Musa di dolok Horeb marhitehite api, songon Debata na papatarhon diri-Na tu si Abraham marhitehite surusuruan-Na di bagasan hajolmaon. Jala di Padan na Imbaru, hagonopon ni hapapatar ni Debata, i ma di bagasan Kristus Jesus, Debata na gabe jolma. Jala di minggunta on diarahon do hita asa mangida hapapatar ni Debata di bagasan panjouon-Na marhitehite na mangulahon holong.

Molo taparateatehon di bagasan 1 Johannes 4:8 didok do Halak na so marholong ni roha, i do na so tumanda Debata, ai haholongon do Debata. Hata ‘haholongan do Debata’ laho mandok haholongon i do hapapatar ni Debata tu hita di hasiangan on. Jala di bagasan 1 Petrus 4:8 didok: Alai di jolo ni saluhutna, masihaholongan situtu ma hamu, ai dihungkupi haholongon ni roha i do godang dosa. Holong ni roha manghungkupi godang dosanta jolma. Jadi lam antus ma hita antong, asa di dia diulahon holong ni roha namangolu, di si ma patar hadirion ni Debata. Jala asa di dia mangula holong ni roha, di si ma masa hasesaan ni dosa, ai dihungkupi holong ni roha i do godang ni dosa.

Ala ni i hajongjonganta gabe sahalak Kristen, hajongjonganta na gabe Huria jala pamatang ni Kristus di tongatonga ni tano on, ndada holan laho mangalului pangomoan sambing, manang marpungupungu laho martangiang manang marende sambing, alai ingkon tarida ma nian parbue ni hakaristenon i, ingkon tarida parbue parhuriaon i, i ma holong ni roha. Marhitehite holong ni roha do Debata manobus hita, ala ni holong ni roha do asa oloan ni Debata Ibana patutoru diri-Na gabe jolma di bagasan Kristus Jesus. Jala ala ni holong ni roha sambing do asa olo Debata manesa dosanta jolma, antong holong sisongoni ma tabahen gabe ngolu dohot parangenta.

Penulis:
Pdt. Ewen Josua Silitonga, S. Th

Penyunting:
Timothy P. Saragi