Minggu, 29 Januari 2017

Minggu IV Dung Ephipanias

Ev     : Psalmen 15:1-5

Ulahon ma hasintongan na sian Debata

Ingkon Badia hamu, ai na badia do Ahu, Jahowa, Debatamuna i! (3 Musa 19:2). Habadiaon ni Debata ingkon ma tarida sian pangalaho  bangso na pinilitNa. Debata na badia jala na marhuaso i tongtong do maringanan jala jongjong di tongatonga ni bangsoNa. Secara simbolis hajongjongan ni Debata di tongatonga ni bangso dipatuduhon marhite undungundungNa na dipanjongjong ditongatonga angka undungundung ni bangso Israel dihalongonan di pardalanan tu kanaan. Undungundung ni Jahowa I laho paingothon bangso Israel na tongtong do Jahowa rap dohot bangso i, alani i unang ma mabiar nasida maralahon musu jala asa tongtong diingot bagso i manjaga habadiaon ni bangso napinilit Debata.

Habadiaon ni Debata digombarho secara simbolis songon na diaturhon di peraturan-peraturan di bagasan undungudung ( 2 Musa 25: 1 – 31; 40: 1-33). Panglaho bangso na pinilitna i pe ingkon ma patuduhon habadiaon ni Debata ido umbahen Parpsalmen mandok halak na jadi sorang tu bagasan undungundung ni Debata dohot tu dolok habadiaonNa ima  halak :

1. Na sun burju marpangalaho (ay 2)
2. Mangulahon hasintongan dohot hatigoran (ayat 2,3,5)
3. Sidon na sintong sian bagasan rohana (ay 2,3)

1. Na burju marpangalaho

Bangso napinilit ni Debata jala na tama sorang tu undungundung ni Debata ima jolma na  marpangalaho na burju. Haburjuon na nidok turpukhon ima haburjuhon na menyangkut tu moralitas, misal: ndang olo manangko, ndang olo margabus, lan asing. Ndang adong dapot tihas sian pangalaho na. Memang ndang adong jolma i boi sempurna mangulahon haburjuon alai molo adong motivasi sian dirinta ingkon mangulahon haburjuon sian nasa gogo dohot sian nasa roha ingkon terpancar do i sude sian pangulaonta.

Maol do Mangulahon haburjuhon di jaman na gok persaingan on jala godang do jolma na maroha portibi mandok: “na marhahaanggi do burju dohot haotoon”,  pandohonan on bertujuan laho mandok mangulahon haburjuon sarupa do i dohot mangulahon haotoon. Alai hata sisongon on unang ma mambahen halak Kristen gabe sumurut mangulahon haburjuhon, taingot ma hata ni Debata  marhite Apostel Paulus :  alai na oto di roha ni portibion dipilit Debata, laho pailahon angka na bisuk; jala na gale di portibi on dipilit Debata, laho pailahon na gogo (I Korintus 1:27). Molo mangasanghon gogo dohot bisuk sian Debata halak na porsea mangulahon haburjohon ingkon do mamboan hadengganon dingoluna.

2. Mangulahon hasintongan dohot hatigoran (2,3,5)

            Mangulahon haburjuon na nidok di ayat 5 ingkon sadalan dohot mangulahon hasintongan dohot hatigoran. Ingkon dibagasan hasintongan dohot hatigoran do haburjuon ni halak na porsea. Hasintongan dohot hatigoran na diulahon ndada ala laho patamatamahon diri manang ala tuntutan situasi alai memang ro sian bagasan rohana. Hasintongan dohot hatigoran i nunga gabe unok ni parngoluanna (inti kehidupannya). Molo jolma na manghangoluhon hasintongan dohot hatigoran ingkon marungkil do ibana molo ndang boi diulahon ibana hasintongan dohot hatigoran i jala olo do ibana mangadopi angka hamaolon bahkan ancaman laho pajongjongkon hasintongan dohot hatigoran jala marlas ni roha do tondina molo boi ibana mangulahon hasintongan dohot hatigoran i.

Halak na mangolu di hasintongan dohot hatigoran ima halak na so olo mambahen hajahaton tu donganna jala na so olo mambahen haurahon to donganna, tarlumobi tu sisolhotna, halak na mansoadahon angka na lea alani hajahatonna jala dipasangap angka na manghabiari Jahowa. Manang aha pe na masa diibana ndang olo peol dihata apalagi manguba naung sinumpahonna. Ndang olo mangalului pangomoan tu dirina sian haburjuon na ni ulana tu donganna, isarana paanakkon hepengna. Jala na so olo manjalo sipsip mangalo na lidang roha i.

3. Na sintong sian bagasan rohana (2,3)

Halak na mangolu dihasintongan tongtong do dijaga pamanganna alana sian sada pamangan do ruar pamujion dohot pamuraion (Jakobus 3:10). Tapangke ma pamanganta laho mamuji Debata dohot mamboan pasupasu tu dongan jolma. Unang ma mangkata tundal, gabe manegai parsaoran tu dongan do na sisongoni jala gabe manusahi ngolu ni dongan dohot dirinta sandiri. Hadirion ni halak Kristen ingkon do manghatahon nasintong, songon na diajarhon Tuhan Jesus: “songon on ma hatamuna: olo, anggo olo, ndang, ia  ndang! Nasa na ganda sian I, sian na jahat do i!” (Matius 5:37).

Angka halak na marpangalaho na burju, mangolu dibagasan hasintongan dohot hatigoran jala sidon na sintong on ma na jadi sorang tu undungundung ni Debata. Memang ndang adong jolma na boi singkop mangulahon i alai ingkon tarajumi ma dirinta jolma na mardosa jala olo sian nasa roha laho mangulahon parange na tama di jolo ni Debata. Songon na nidok di ayat 5 i, halak na olo sian nasa rohana mangulahon I, ndang tagamon humordit salelenglelengna. Alani I taulahon ma hasintongan sian Debata! Amen.

Pdt. Adventus Nadapdap, S.Th