EVANGELIUM JAMITA – MINGGU II DUNG TRINITATIS, 18 JUNI 2023

2 Musa 19 : 1 – 8

SATIA MANGULAHON HATA NI DEBATA

I. Patujolo
Molo dihata Ibrani buku on digoari syemot jala dihata Gorik didok exodus na marlapatan haruar manang halaoon. Buku on mancaritahon songondia haluaon bangso Israel sian parhatobanon Misir, laos disima habungkas nasida gabe bangso ni Debata na manean tano na binagabagahon Debata sian ompu nasida. Dibagasan bukuon dipatorang songondia hapapatar huaso ni Debata secara historis diadopan angka bangso sileban. Songondia Debata pahot padanNa dohot bangso i marhitehite uhum patik, dipajongjong undung-undung ni Debata (Ibr : tabernakel). Secara tradisi Jahudi panurat buku on ima si Musa jala dipamasuk tu horong pentateukh ima buku na niporseai halak Jahudi na sinuraton si Musa.

II. Hatorangan Turpuk
Adong sada hasurungan bangso Israel sian angka bangso nasing ima : Dipaloas Debata bangso i boi marnida hapapatar huasoNa marhitehite simalolong simajujungna (ay 4). Molo dihata Ibrani didok רׇאׇה אֵתׇּה ra’ah (to see, have experience), attah (prounon singular, thee, thou, ye, you) na marlapatan na niida hamu manang na nialaman hamu. Artina sian hata raah attah boi ma ta antusi ndada holan teori sambing huaso manang hagogoon ni Debata, fakta do i na boi niida jala na boi nialaman. Boasa ingkon patandaan jala patuduhon Debata huasoNa secara historis tu bangso i (ay 3)? Dihata Ibrani didok אׇמֵר יעֶקֹב בּיִת amar Yaaqob bayith (saying of Jacob to the house) dohot hata נׇגֵד יִשְֹרׇאֵל nagad Yisrael (and tell of Israel). Adong dua hata napinangke disi ima amar dohot nagad na marlapatan mandok (to utter), mantaridahon (to be conspicuous), patujolohon (to front). Artina, asa pe dipapatar Debata huasoNa tu hita jolma asa adong hata didohononta, sipataridahonta, sipatujolohonta tu angka pinomparnta. Antong nasa silehonlehon ni Debata na adong dihita ndada lao parburnangburnang diri pangkeonta alai dalan manghatindanghon huaso dohot hasangapon Debata do i asa dilehon tu hita. Asai unang holan arta dihasiangon etonganmu na gabe siteanteanonmu tu angka pinomparmu, diginjang ni saluhutna Debata pe ingkon ido parjolo bahenonmu gabe arta siteanteanonmu tu angka pinomparmu. Ra molo sinungkun tu portibion aha do kunci sukses kehidupan? Tor hatop ma dialuasi ima : Hamoraon, hasangapon dohot hagabeon, ido memang somalna standar na pinangke haportibion secara khusus hita halak Batak. Alai kunci sukses menurut hata ni Debata ndada i, alai ima : שׇמֵע קוֺ shama qol ima namarlapatan manangihon hata ni Debata (obey my voice) dohot בְרׅית את שׇמֵרֵ berith eth shamar ima namarlapatan mangaradoti padan ni Debata (keep my convenant). Artina kunci sukses diadopan ni Debata ndada cukup holan manangihon alai ingkon dohot tong mangaradoti, manangihon jala mangaradoti hata manang padan ni Debata ido kunci sukses ngolu halak na porsea.

Ra molo adong famili nta manang keluarga nta na marpangkat na timbo, isarana presiden, gubernur, bupati dohot lan nasing, nungga didok halak na tabo na ngolu nta, siala nungga adong deking n agogo. Alai dang sadiani molo maradophon turpuk on, siala naeng deking nta diturpuk on ima Debata. Molo presiden, gubernur, bupati dohot lan nasing terbatas do gogona jala dang manontong jabatannai, alai molo Debata no tarbatasi huasoNa jala so marujung huasoNa. Dihata Ibrani didok סְגֻלׇּה כֹּל כּׅי עַם אֶרֶץ segullah kol ki am erets na marlapatan hasianKu ma ho sian nasa bangso, ai gok di Ahu do liat portibion (be a special above all people, for all the earth is mine). Molo nta lapati hata segullah ima : Sumurung manang hasian (special), arta milik ni Debata (property), permata (jewel), paling layak (proper good). Molo nungga didok spesial manang hasian, tontu angka sipatujolohonton ma on sian nasa na ringkot. Artina asal ma olo hita manangihon jala mangaradoti hat ani Debata, gabe hasian ni Debata ma hita, gabe spesial ma hita diadopan ni Debata, angka sipajolohon ni Debata ma hita sian nasa jolma dihasianganon.

III. Haonaan Jamita
Hombar tu ojahan ni jamita di minggu nta on satia mangulahon hata ni Debata, laos ido kunci sukses halak na porsea dingoluna. Alai hasatianta i ndada holan satia manangihon hat ani Tuhani, alai ingkon sati mangaradoti hata i. Molo nungga didok mangaradoti, tontu nungga dibagasan pangantusioan, dibege, dipahusor, dipeop jala diulahon. Dibagasan na mangaradoti hata ni Tuhani ido nungga parsidohot hita mambahen Debata gabe siteanon tu angka pinomparnta, jala marhitehite mangaradoti hat ani Debata i gabe hasian ni Debata ma ngolunta, gabe sumurung ma hita diadopan ni Debata sian nasa jolma na adong liat portibion.

Pdt. Ewen Josua Silitonga

KLIK LINK INI