1 MUSA 18 : 1 – 10a, EPISTEL MINGGU VIII DUNG TRINITATIS MINGGU, 17 JULI 2016

PATUJOLO

Turpuk on manorangkon taringot tu janji ni Tuhan Jahowa tu si Abraham di tombak Mamre. Mamre ima sada inganan jonokkon Hebron dompak barat ni Makphela. Di boto Tuhan i do songon dia roha ni si Sara maradophon janjiNa tu si Abraham, jotjot ganggu rohana. Gabe pola sampe didok ibana tu si Abraham asa mangalap si Hagar naposona i gabe jolmana asa tung tubuan anak nasida marhite si Hagar. Alai dang i na naeng patupaon ni Debata di ngoluna, na ingkon sian siubeonna do ibana tumubuhon anak, ai nunga i di bagabagahon Tuhan i tu si Abraham. Marnida i ro muse Tuhan i mandapothon si Abraham laho pahothon bagabagaNa i tu nasida, ima na pinatorang ni turpuk on.

Disada partingkian disi do tinggan si Abraham  Di ida si Abraham tuhan Jahowa di tombak Mamre rap dohot angka surusuruanNa. Jala di tamue si Abraham nasida mangan di undungundungna. Laos di partingkian ima didok Jahowa tu si Abraham na ingkon pamasaonNa do sada janji di si Abraham ima taringot tu parpinomparon, na ingkon tubuan anak baoa do si Sara tung pe naung matua jala ubanon ibana.

HATORANGAN NI TURPUK

Ayat 1-2: tangkas do di patorang di turpuk on parjumpaan ni si Abraham dohot Tuhan Jahowa na di ida si Abraham do Tuhan i di tombak mamre. Alai na porlu idaonta siaon ima: dung di ida si Abraham Tuhan i pintor marlojong do ibana mandapothon Tuhan i tung pe di mohop ni ari. Dang sai hundul ibana, alai di tailihon ibana do Tuhan i jala di lojong laho mandapothon. Dang holan i, di boto si Abraham do ise dirina jala ise na ni dapothonna, Tuhan na marmulia i do. Ido umbahen di patungki ibana dirina pola sampe sahat tu tano, laho pataridahon pamujion dohot parsombaonna tu Tuhan na marmulia i.

Ayat 3-5: dang holan di tailihon di dapothon jala di somba si Abraham Tuhan i, alai di tamue i ibana do Tuhan i tu undungundung na. Di elek ibana do Tuhan i di bagasan hatoruon ni roha asa tung olo Tuhan i ro jala mian di undungundung na i laho di tamue. Sude do jolma manghirim songon na nihirim ni si Abraham asa tung olo nian Tuhan i ro jala tinggal di bagas na rap dohot angka keluarga. Alai godang do jolma holan mangkirim ro Tuhan i tu bagas na alai dang di parade na porlu laho mangontang/ manamue Tuhan i. Ia si Abraham, di parade ibana do angka na hombar tu partamueon asa unang nian kecewa Tuhan i ro tu bagas undungundungna. Di parade ibana do angka na dumenggan na dihalomohon Tuhan i. Molo niontang tamu tu bagas ni iba ingkon patupaon do angka na hombar isarana diturpuk on: aek lao mamuri pat, inganan hundul paulak hosa loja huhut marsaor, dohot angka si panganon na tabo jala na dumenggan. Suang songon i ma jolma i di na mangontang Tuhan i tu bagasan ngoluna, dang holan di ontang alai di parade ma inganan di Tuhan i jala di parade ma angka lomo ni Tuhan i di ngoluna.

Ayat 6-8: di ayat on di patorang do na humalaput do si Abraham paradehon panamueon tu Tuhan i, dang marnalemba ibana. Jala tangkas didok na so holan si Abraham do parade na ringkot laho manamue Tuhan i, alai di arahon ibana do dohot pardijabuna ima si Sara dohot angka naposona asa tung dohot parade angka na ringkot i. Tarida ma dison songon dia do hasadaon ni ruma tangga i di na laho manjangkon Tuhan i asa tung mian di bagas na. Ingkon marsibetabetaan do ama i dohot ina i laho manjou jala manjangkon Tuhan i tu tongatonga ni bagasna asa tung denggan jala las roha ni Tuhan i mian di tongatongana. Nang dohot angka na di humaliangna pe ikon ma dohot togihonon laho paradehon partamueon tu Tuhan i. Dohot do pardijabuna i dohot angka naposona i humalaput laho paradehon, tung so adong do nasida na marnalemba ala diboto nasida do Debata do na di tamue nasida jala sada silas ni roha do molo ro jala mian Tuhan i di bagas nasida.

Ayat 9-10a: di sungkun Tuhan i si Abraham didia si Sara ala dang dohot si Sara ro mandapothon nasida patupa sipanganon i. Ai dumenggan do nian antong molo rap nasida manamuei Tuhan i di bagas na. Alai tungpe songon i dang gabe disundati Tuhan i bagabagaNa tu si Abraham, di pahot do bagabagaNa taringot tu parpinomparon ni si Abraham na naeng masa satongkin nari. Didok sai na mulak do Ibana mandapothon si Abraham di taon i jala disi adong ma anak ni si Sara jolma ni si Abraham. Ima bagabaga ni Debata tu si Abraham. Haunduhon, hasatiaon, dohot parsihohoton ni si Abraham tu Tuhan i mamboan ibana marnida bagabaga nauli sian Tuhan i. Ido na nihirim ni angka jolma asa dapotan bagabaga nauli sian Tuhan i. Alai sahat do i idaon ni jolma di ngoluna songon si Abraham molo di bagasan haporseaon na mangolu jolma i tu Tuhan, di bagasan haunduhon dohot hasatiaon.

HAHONAAN NA

Sude do jolma manghirim asa bongot Debata tu ngoluna manang tu bagasna. Alai jotjot do jolma i holan manghirim jala tarpaima asa ro Tuhan i alai dang olo mandapothon Tuhan i jala manjou Tuhan i di bagasan hatoruon ni roha asa tung mian Tuhan i di ngoluna. Sai marsigantung tu keadaan dohot situasi do jumotjot jolma, gabe adong istilah jemaat musiman. Ro mandapothon dohot manjou Tuhan di tingki adong masa-masa tertentu songon pandidion, natal, tingki marsahit mannag marsitaonon. Alai marhite turpuk on dipasahat do tu hita na ingkon dapothononta do Tuhan i di sude partingkian songon si Abraham na marlojong mandapothon Tuhan i nang pe di parngiar ni ari.

Mandapothon Tuhan i ingkon dibagasan hatoruon ni roha. Di na laho mandapothon Tuhan i ingkon ingoton do diri jala ingkon ingoton do Debata na ni dapothon i ima Debata na badia jala na marmulia. Alai jotjotan do masa di partingkian on molo marsaor jolma i dohot Debata dang diingot na dohot Debata na badia i do nasida marsaor, adong na sai mar-HP di kebaktian, marsarita, dna, gabe mago hahomion ni parsaoran i. Alai marhite turpuk on di ajari hita asa songon si Abraham di na marlojong hita mandapothon Tuhan i, tu huria/ gareja, tu parsaoran partangiangan, di kebaktian keluarga nang di na martangiang pribadi hita, ingkon tadapothon ma Tuhan i marhite haunduhon ni roha.

Lobi intim do parsaoran molo tajou donganta na marsaor i tu bagas ta. Suang songon i do di turpuk on. Dang lomo roha ni si Abraham holan jumpa songon i ibana dohot Tuhan i, ingkon togihononna do Tuhan i tu bagasna. Asa lam jonok jala lam bagas parsaoran i. Suang songon i do ngolu ni halak Kristen, unang ma nian holan jumpa di parsaoran i sambing dohot Tuhan i, alai ingkon ma nian jouon ni angka na porsea i Tuhan i dohot tu bagasn, lohot nang di rohana tung pe salpu parsaoran huria i, di boan jala di togihon ma Tuhan i tu bagasna jala asa sai tongtong tinggal di bagas rohana.

Di hirim sude jolma do bagabaga nauli na sian Debata. Alani ima ringkot jolma i manjou Tuhan i asa tung mian di bagasan ngoluna. Marhite na mian do Tuhan i di ngolu ni jolma i asa boi di ida jala di panghilalahon jolma i bagabaga na uli di ngoluna. Alai bohama asa mian Tuhan i di ngolu ni jolma i? Mathite na di parade jolma i do inganan di Tuhan i jala di patupa lomo ni rohaNa ima dalan asa mian Tuhan i di ngolu ni jolma (marhite na olo do jolma i manamue Tuhan i di ngoluna). Dang holan i, alai ingkon arahonon do nang dongan humaliang (pardijabu/ naposo manang parkarejo) asa dohot manamue Jesus tu bagas i. Disima lehonon ni Tuhan i angka pasupasu dohot angka bagabaga nauli tu tongatonga ni bagas i nang tu ngolu ni angka jolma i.

(C. Pdt. Rolisma br. Lumbangaol, S.Th)