JAMITA MINGGU 20 NOVEMBER 2022 – 1 KORINTUS 15:50-58

Jamita Minggu Ujung Taon Huria 20 November 2022
MINGGU UJUNG TAON HURIA
MINGGU, 20 NOVEMBER 2022
“NUNGA DIBONDUT HAMONANGAN HAMATEAN“
1 Korintus 15:50-58

PATUJOLO

Di sada borngin uju mandohoti pelatihan “Clinic Pastoral Education” di Rumah Sakit Cikini Jakarta na pinatupa ni United Evangelical Mission (UEM), tarsonggot do hami, ala di tingki i, dokter jaga ni Rumah Sakit Cikini i, manjou hami tu ruang Instalasi Gawat Darurat (IGD). Dipabotohon dokter i ma tu hami, paboa adong sahalak pasien naung marujung ngolu. Hombar tu ruhut ni pangkobasion ni rumah sakit, nasa pasien na marujung ngolu, ingkon hatop do diboan tu kamar mayat paima diurus keluarga angka na ringkot, manang paima diboan keluarga na monding i tu bagasnasida, manang tu inganan na asing (rumah duka).

Alai, keluarga dohot pigapiga halak ruas ni punguan na niuluhon ni na monding i, ndang olo mangihuthon ruhut naung tinotophon rumah sakit songon naung ginurithon di ginjang i, ala hombar tu pangantusion dohot haporseaonnasida, paboa: “sahalak naung marujung, holan pamatangna do na monding, alai molo sahala (jiwa) dohot tondi (roh) na, tongtong dope mangula jala meat di angka hinaragam ni inganan, israna: di hau na bolon dohot angka inganan na asing saleleng pitu ari nari. Di ari papituhon, bongot ma muse sahala dohot tondi i tu daging naung mate i, laos mulak mangolu ma daging i. Jadi ala ni i do umbahen sai digogohonnasida, asa unang diboan tu kamar mayat na monding i, alai dipaloas ma jolo keluarga paadopadop bangke i di ruang perawatan saleleng pitu ari nari.

Dung hubege hami hatorangan ni keluarga i, hutangkasi hami ma nasida, taringot tu pangantusion dia dohot pangajarion sian ugamo dia do nasida sansintongna. Dialusi nasida do hami, didok: ia ugamo nasida i ma ugamo Malim, manang jotjot dipanggoarhon Parmalim.

Uju di pangkobasion ni Apostel Paulus di Epesus, dibege ibana do barita sian halak Kloe, paboa na masa do parsoalan di huria Korint. Marbingkas ma i, ala deba sian ruas ni huria i, na so apala tangkas mangantusi taringot tu haheheon ni pamatang dungkon marujung, hombar tu naung jotjot sinoarahon manang dijamitahon si Paulus (ida 1 Korint 15:12), laos suang songon i do nang rumang ni daging na hehe i pe, tung maol diantusi nasida (ida 1 Korint 15:35). Ndang hinata, deba sian ruas ni huria i, adong dope na marsihohot di angka pangajarion dohot pangantusion na parjolo i na digoari Helenisme manang pangantusion ni masyarakat biasa (awam). Umbahen i do digurithon jala ditongos si Paulus surat on, na ditujuhon tu huria Korint, asa unang lilu haporseaon ni huria i, baliksa asa lam tang jala marsihohot, maniop Barita na Uli naung dibege jala dijangkonnasida.

BACA JUGA BAHAN EPISTEL MINGGU UJUNG TAON HURIA – MINGGU, 20 NOVEMBER 2022

HATORANGAN

Pamatang na Manontong

Ra ndang salpu dope sian parningotanta, taringot tu sahalak partinju na tarbarita di sandok portibi on na margoar: Mike Tyson. Molo martanding, mansai mura do ditaluhon ibana angka alona. Nang pe ganup partandingan, sai ditontuhon panitia do, dipatupa 12 (sampulu dua) ombas di sada partandingan. Alai jotjot do, di ombas parjolo dope mardalan, nunga peak alo na i hona tinju. Molo tapamanat rumang pamatang ni si Tyson i, mansai jempek do marimbangkon angka pamatang ni toropan halak Amerika, nang angka alona pe tahe na sian bangso manang suku na asing. Antong di dia do rahasia ni hamonangan ni ibana.

Nang pe jempek pamatangna, alai mansai pir situtu, pola songon batu luhut pamatangna, suang songon i nang rungkungna mansai togos, bolon jala togu, pola digoar ibana si leher beton. Ala ni i, manang songon dia pe gogo ni alo na manumbuk si Tyson, sai songon na so diterge ibana do idaon, jala ndang tarhilala laho manaluhon ibana.

Di turpuk jamita on, didok si Paulus do (ayat 50-54), Debata patupa hamubaon ni jolma manisia sian pamatang na olo busuk gabe pamatang na manontong. Ia partupa ni hamubaon i, tangkas ma i masa, di tingki na binuhul ni Debata di ujung ni portibi on. Di tingki i, mangkuling sarune ni suruan i, masa ma: Parjolo, hehe ma angka naung monding.

Di tingki ni Panurirang Hesekiel, nunga diungkap Debata sada pangungkapon tu si Hesekiel. Uju diboan Debata ibana tu sada rura na gok holiholi ni jolma na mate, diuji Debata do ibana mahite sungkunsungkun na mandok: tagamon tarpangolu dope holiholi on? Dialusi si Hesekiel do Debata mandok: ale Tuhan Jahowa, Ho do na umbotosa. Didok Tuhan Jahowa, asa manurirangi ma si Hesekiel, jala mangido asa dilehon tondi tu angka holiholi i, gabe masa ma halongangan, marsitopotan ma angka holiholi i ganup tu donganna, huhut tubu ma sibuk jala dibongoti tondi ma sibuk i, gabe mangolu ma (Hesekiel 37:1-11).

Nian pangungkapon on, diungkap Tuhan Jahowa laho pabotohon songon dia do ngolu ni bangsoNa di tingki i, jala songon dia ma sangkap ni Tuhan Jahowa tu bangso naung pinillitNa i muse. Alai nang pe songon i, sasintongna, laos boi do pangkeonta pangungkapon on mangurupi hita laho mangantusi songon dia do muse parngoluon ni angka naung monding i.

Paduahon, angka na mangolu dope di pangkuling ni sarune i, dipauba Debata sian daging na olo busuk gabe mar daging na manontong.

BACA JUGA ALMANAK MINGGU UJUNG TAON HURIA – MINGGU, 20 NOVEMBER 2022

Uju si Joy Tobing manghamonangkon Indonesian Idol di taon 2004, adong do ende hamonangan ni ibana na margoar: “Karena Cinta.” Saotik sian hatahata (lirik) ni ende i mandok: … dan bila aku berdiri, tegar sampai hari ini, bukan karena kuat dan hebatku … .” Ende on boi do mangurupi hita laho mangantusi pandohan ni si Paulus di na mandok, ndang apala adong imbar ni naung leleng, manang parjolo marujung sian angka na mangolu dope di haroro ni Tuhan na paduahalihon. Ala, nang pe mangolu dope jolma i di haroro ni Tuhan i paduahalihon, ndada na dumenggan nasida marpangalaho sian angka naung jumolo monding i, manang ndang ala nasida mardaging na jumogi sian angka na parjolo i, alai sasintongna, saluhut do jolma manisia mardaging na olo busuk jala parsatongkinan. Hombar tu si do di ari haroro ni Tuhan i di pangkuling ni sarune, masa ma hamubaon ni saluhut manisia. Solukon ni na manontong i ma na olo busuk i, jala hangongolu na manontong manoluk na olo mate.

Pandohan on pataridahon, ia ngolu ni jolma i, molo sian pardagingon do sansintongna mansai gale jala mura do i busuk. Hangoluan i mansai margogo situtu, pola disoluk, manang dibondut na olo mate i. Pandohan disoluk dohot dibondut, paandarhon paboa mamungka sian haheheon dohot hamubaon i, ndang jumpang jala ndang tarida huhut ndang margogo be hamatean i ala naung tarbondut, alai hangoluan dohot hagogoon nama na marhuraja jala manggohi sandok manisia i, gabe mardaging na gogo jala manontong ma manisia i.

Tangkas do diboto si Paulus, mansai maol do antusan jala tarjalo ni deba sian ruas ni huria i jamita ondeng, ala ni i do umbahen na dipaingot si Paulus nasida, taringot tu Jesus na sai jinamitahon na i. Ia Jesus Kristus, naung mate do ibana di hau silang i, jala ditanom di partangkurahan i. Alai di ari patoluhon, hehe do Ibana sian tanoman i, gabe mardaging na imbaru ma ibana. Songon i ma masa di ari haroro ni Tuhan Jesus na paduahalihon. Ala ni i, di arop roha ni si Paulus do, asa unang ma nian ganggu roha nang haporseaon ni huria i.

Sorop ni Hamatean

Nasa na manggulmit di hasiangan on, sai adong do sinjatana. Sinjata i dipangke laho palua diri sian angka na naeng mamolgak ibana, huhut laos dipangke laho manaluhon musu huhut mangalului parbalanjoanna. Sada sian na manggulmit i, dipangke si Paulus do laho pabagas pangantusion ni huria i taringot tu hamatean, i ma tudoshon sorop ni loba (lebah).

Torop do ra naung hea pajumpang dohot asar ni loba, jala molo pajumpang dohot asar ni loba, somalna sai marusaha do iba pasidinghonsa, asa unang disotop. Alai sasintongna, torop do jolma na mangula siap ari mangalului situak ni loba tu tombak. Alai ganup mangalului situak ni loba, sai diboan nasida do sinjatana, isarana: timus, jaring lahon manutupi pamatangna dohot na asing, dohot tujuan, molo tungpe rongom loba i naeng mansotop, ala ni perlengkapan sinjata i, malua do ibana sian mara i.

Ra na gabe sungkunsungkun ni rohanta, boasa si Paulus mandok: Jo hamatean, didia hamonanganmi? Jo hamatean, didia soropmi? Asa lam hantus pandohan on, boi do ra paboaon pengalaman uju marubat “Terapi Lebah” di Bandung uju i. Andorang so dipatupa dope terapi i, jolo ditangkasi do hami, atik na alergi do tu sorop ni loba manang ndang. Jala molo dung pasti ndang alergi, baru ma dipatupa terapi i. Dung simpul terapi, dipatudu terapis i do tu hami angka loba naung dipangke. Huida hami ma di si, sai manggepori loba i, jala na deba nari nunga mate. Tudoshon i do na nidok ni si Paulus taringot tu sorop ni hamatean i. Molo uju masa hamatean i, tutu do mansai hansit tarlumobi di angka na ditadingkon, pola sai mangandungi dohot mangangguk gobar. Jala saluhut do jolma marusaha laho pasiding hamatean, marhite na jamot di pardalan ni ngolu, marhite na mangorom deba sipanganon dohot mangalului parubatan molo uju ro parsahiton.

Ndang apala sala na mangargahon ngolu i, jala tung mansai denggan situtu do i, i do umbahen na diuhum huria angka na mate maningkot. Alai, si Paulus mandok di turpuk on, paboa ndang tarpasiding hamatean i (Buku Ende nomor 520 “Partangisan do Hape” ayat 2), alai hamatean i, holan parsatongkinan do i, ai molo dung ro Tuhan Jesus paduahalihon, paheheonna do angka na mate i. I do umbahen, sai songon na dilesengi si Paulus hamatean i mandok: Jo hamatean, didia soropmi, jo hamatean didia hamonanganmi? Lapatanna, sasintongna ndang margogo anggo hamatean, jala nunga talu dibahen Tuhan Jesus i.

Kunjungi juga kanal YouTube HKI untuk mengetahui informasi seputar pelayanan HKI.

HAHONAAN

Halak Kristen digoari do siparmonang. Tangkas di didok di Buku Ende nomor 474 “Ingkon Jesus do Donganku” ayat 1 didok: … raphon Jesus boi ahu monang talu musu i na ro; ayat 3 muse mandok: … Tuhan Jesus do parmonang, dipamonang dohot ahu.

Hamonangan na boi do i jumpang hinorhon ni dua ala (faktor) na pasimbar, i ma: parjolo, molo togu jala gogo hita, paduahon molo gale musunta. Tuhan Jahowa sitompa manisia jala parholong roha, disangkapi do asa taruli hasonangan jolma i, ndada hamagoan, jala mangalehon nasa na hinalungunhon ni roha ni jolma i (ida Jeremia 29:11). Patulus sangkapNa i, ndada holan gogo dilehon tu angka na porsea i, manang dibahen Tuhan i gale musu ni jolma i, alai tung singkop do dilehon na dua i, i ma dipargogoi na porsea i laos ditostos gogo ni musu i, gabe pasti jala saut ma sangkap haluaon na sian Tuhan i.

Ala ni i, pasingkophon jamita on tatiop jala marsihohot ma hita di tona ni si Paulus na di ayat 58 i mandok: On pe, hamu angka donganku na hinaholongan, marsihohot jala so mubauba ma hamu, jala lam sumurung ma tongtong di bagasan ulaon ni Tuhan i, ai diboto hamu do: Ndang magopo halojaonmuna di bagasan Tuhan i. Amin.

Penulis:
Pdt. Hotman Hutasoit, M.Th

Penyunting:
Vic. Pdt. Timothy P. Saragi

BAHAN JAMITA INI JUGA DAPAT DIUNDUH DENGAN MENG-KLIK TULISAN DI BAWAH INI
JAMITA MINGGU 20 NOVEMBER 2022 – MINGGU UJUNG TAON HURIA