PARJAMITA 1:12-14+2:18-23, EPISTEL MINGGU X DUNG TRINITATIS MINGGU, 31 JULI 2016

PATUJOLO

1:14 Nunga huida saluhut jadijadian angka na tarjadi di hasiangan on, gabe ida ma, saluhutna i na laho salpu do, jala pangeahion di alogo sambing do i.

Ditatap Parjamita on saluhut na tarjadi di hasiangan on, jala didok na laho salpu jala alogo sambing do saluhutna i. pamingkiron i tubu di rimangi parjamita on do cara hidup ni bangso Israel hatiha i, na godang do nasida mangulahon ulaonna dohot mangalului si luluan di portibion dang di bagasan Debata dohot hasintonganNa.

Tarlumobi molo di hari raya pondok daun (jotjot di goari di hita: Pesta panen, pesta gotilon) sai jotjot do buku parjamita on di jahahon, ala na jotjot do masa di tongatonga ni Israel di na marpesta raya nasida hoan laho tu hasonangan na sajo, mamboan angka hasil ni na niula pe nasida dang na laho mandok mauliate tu Debata alai laho patuduhon haboion di gogo na mangula manang haboion di hamaloon/ pistar mangula. Gabe didok parjamita na siasia do sude na ulaon hari raya pondok daun i molo songon i, ai dang di bagasan hahomion jala dang laho tu hamuliaon ni Debata be pasta i dipamasa.

Dang na mandok na so porlu manang aha angka na niula ni jolma di portibion, dang na so porlu arta, gogo, hamaloon, bisuk dna, jala dang na mandok asa unang pola mangula jala marsiajar jolmai. Alai parjamita on naeng mandok tung aha pe na niula ni jolma jala songon dia pe bisuk/ pistar ni jolma molo dang mardonganhon Debata jala dang di ula/ di pake di bagasan Debata dang na marguna jala dang marlapatan i. ima asa molo tabereng sude do isi ni buku parjamita on mandok taringot tu kesiasiaan bahkan didok songon na manjaring angin.

HATORANGAN NI TURPUK

Ayat 12: sahita ayat pamuhai do berengaon ayat on ala hira marisi hata perkenalan laho patandahon ise do na pasahathon hata on. Didok dison ibana sahalak parjamita, jala sahalak raja panggomgomi di Israel, gabe tubu pukiran na martudutudu do hata on tu si Salomo. Molo didok sahalak parjamita jala muse sahalak raja panggomgomi, marlapatan doi laho patuduhon na sahalak na marbisuk do parjamita on, sahalak parpangkat, na gogo, na berpendidikan jala na malo. Mangula do ibana ditongatonga ni bangso ni Debata bangso Israel songon sahalak raja panggomgomi.

Ayat 13-14: di patorang parjamita on do di ayat on angka ulaon naung niulahonna laho mangalului lapatan ni parngoluon on (mencari arti hidup). Didok sai berusaha do ibana laho manulingkit jala mangarisik angka na masa di hasiangan on marhite hapistaran na adong di ibana. Molo mangida pribadi ni parjamita on songon na di ayat 12 i, dang pola maol nian dapoton na angka arti ni ngolu di na masa di hasiangan on, alai tung maol do dapot ni ibana. Gabe didok ibana na ulaon hangaluton na sian Debata doi, jala saluhut na nulehon Na i tu jolma na olo salpu doi jala songon na mangeahi alogo do na mangeahi i (sia-sia seperti menjaring angin). Hata ni parjamita on dang na mandok dang porlu sude na di portibion jala dang na mandok dang porlu hamauliatehonon i ala na olo salpu. Alai na naeng pinasahat ni parjamita dison ima asa unang marsigantung tu na di potibion do jolma i, unang sai holan na di portibion sai di ehai jala di bangga-banggahon. Ai nunga di ida parjamita on dirina, tung pe ibana sahalak raja, na pistar, na malo, na mora jala na gogo alai na marhaujungan do sude na i. Gabe dang adong na mambahen ibana marimbar dohot angka na pogos, na oto, dohot naposo (pembantu) alana sarupa mate do. Alai inna rohana: na mambahen marimbar jolma i sahat tu parmatena ima molo mangolu jolma i dibagasan Debata. Tung pe parpangkat, na mora, na gogo alai molo sai Debata do di ehai jala di pajolo di ngoluna disima imana marimbar jala dang siasia sude ngoluna i.

Ayat 18-19: Di uduti parjamita on do laho patoranghon, molo tung pe godang di papungupungu jolma i selama ngoluna di portibion dang na boi i daion na saleleng na, alai na tadinghonon na do i di angka jolma ma tading di portibion. Dang salelengna di ibana harajaon na i, pangkat na i dohot arta na i di ibana. Ido asa didok parjamita on marbiasbias ibana (B. Indo: membenci), di hasogohon ibana do tung sampe marlojaloja ibana mangula di portibion alai na ingkon tadinghonon na do sude na i di angka jolma na oto dohot na malo, di na pogos dohot na mora. Didok muse na so adong do imbar ni na oto dohot na pistar, ai ngolu ni nasida pe tong do na laho salpu, jala nasida be do muse na gabe tuan di angka naung pinarade ni na parjolo i di hasiangan on.

Ayat 20-23: sian pangarimangon i ma gabe tubu hata ni parjamita mandok naeng mandele ibana, ai aha pe di ula ibana di hasiangan on na gabe salpu do. Molo tung adong pe jolma na sampe loja mangalului hasangapon, arta dohot pangkat tong do tading i sude.  Hape sampe marlojaloha, sampe manaon na hancit, sampe dang adong partingkian laho mangulon dohot menikmati holan laho manjalahi sude na di hasiangan on, ipe na laho salpu do sude. Antong dang porlu be jolma i manjalahi na di portibion? Porlu do, ai na mangula do jolma asa boi mangan jala margogo. Alai molo taida sian isi ni buku on, di sude poda na sinurathon ni parjamita on, di baen do songan sada pangarimpunan ima: asa sude jolma i manghabiari Debata Jahowa jala mangolu di bagasan na mangaradoti tona dohot patikna, ai sude na ni ula ni jolma i di portibi on na ingkon boanonna do sogot tu jolo ni Debata di paruhuman (Psl. 12: 13-14). Asa sude nian jolma di na mangula di hasiangan on di bagasan parbinotoan taringot tu Debata jala dibagasan Debata.

HAHONAAN NA

Godang do angka na nihirim ni jolma di hasiangan on, jala godang do jolma mangalului angka dalan laho mandapotsa. Isarana molo di halak batak sai dihirim do dapotsa hamoraon, hagabeon, hasangapon. Laho mandapot na tolu i sai di usahahon do berbagai cara, bahkan sian cara na hurang denggan pe olo di ula asal ma dapot i. Tarida ma na sai jumotjot do dope jolma i mangharingkothon ngolu na di portibion. Hape tung dapot na pe nian sude na i, dang na gabe i sada patokan na gabe mandapot haluaon jolma i, ai parsatongkinan do i jala na olo salpu. Alani ima turpuk on mangondolhon tu hita asa unang hita lumobi mangharingkothon na di portibion, ai na olo salpu do i. Dang mandok na so ringkot i di hita, alai ingkon na di bagasan Tuhan i do sude angka na taula i asa marparbue na denggan di ngolunta.

Adong do jolma sai holan na karejo di ula sian manogot tu botari, borngin pe di pake laho mulaulaon di bagasna. Alai dung godang pancarianna/ hasil na ni ulana i, pintor marsahit gabe tu sahit ma angka hasil ni pancarian na i. Alana so hea di pingkiri laho mangurus dirina, sai di tangiangkon asa sehatsehat mulaulaon, alai ibana sandiri dang mangurus dirina holan manjalahi na di portibion, hape mangurus daging pe sada ulaon pemeliharaan do i di na tinompa ni Debata, alai lupa jolma i holan ala ngolu si jalahan na di portibion. Ingkon botoonta do na laho salpu do sude na di ngolunta on, alani i molo tung pe mulaulaon hita ingkon ingotonta Tuhan i, unang alani siluluan na di portibi on (pangkat, parbinotoan, arta) gabe lupa hita di angka poda dohot tona ni Tuhan i, asa unang siasia angka na ta ula i di ngolunta.

Di godang ni kebutuhan gabe godang jolma i lupa tu Tuhan i. Dang tau be mangarimangi na denggan do na ni ulana i manang na daong, tu hasangapon ni Debata do i manang na daong. Adong hata mandok “Hidup adalah Belajar”, lapatanna saleleng hita mangolu ingkon tongtong marsiajar di na masa di ngolu on. Marsiajar dang holan na ringkot di portibi on dohot taringot tu Debata.

Marsiajar taringot tu Tuhan i boi do dalan  mananda jala umboto saluhut na taulahon i hombar tulomo ni roha ni Debata do manang daong. Parjamita mandok, marisuang do saluhut na adong di ibana i molo dang di bagasan Tuhan i. Laos didok do sai na marparbue do ulaon i molo di bagasan Tuhan i.

Tarbahensa laho mandok i siala panandaion na tu Debata, naung di gohi bisuk dohot parbinotoan taringot tu Debata di ngoluna. Songon ido nang hita, boi do gabe mangantusi hita di ulaon na so siasia, na mangkorhon parbue na uli di ngolunta molo ta lului pangantusion taringot tu Debata jala taulahon angka ulaon na di hasiangan on di bagasan Debata.

(C.Pdt. Rolisma br. Lumbangaol, S.Th)