JAMITA MINGGU ADVENT IV, MINGGU, 18 DESEMBER 2016

NATS : Ev. Rom 1 : 1 – 7

IBANA DO ANAK NI DEBATA NAMARHAGOGOON

Rom inganan ni Huria na manajalo surat ni Apostel Paulus on, i ma sada kota na balga situtu jala inganan ni Kesar na mamarenta mansai godang bangso di tingki i.  Angkup ni i, ia Huria Rom on, ndang Huria na pinajongjong ni Ap. Paulus. Sahat tu na manongos surat on Ap. Paulus, ndang hea dope diebati ibana Huria on.  Marojahan di dua situasi on, tung dipillit Ap. Paulus do hata na lambok laho pasahat pingkiran na na gok panarihonon di Huria i di surat na on.

Parjolo sahali, dipungka Ap. Paulus do surat on marhite na patandahon diri na. Didok ibana di surat na on “naposo ni Jesus Kristus” dohot “apostel ni Jesus Kristus”  do ibana ()ay.1).

1. Digoari ibana do diri na “naposo ni Jesus Kristus” (ay.1). Didok iban di surat na on:”Ahu… si Paulus naposo ni Jesus Kristus” (ay.1). Hata “naposo” di son, na marharoroan do i sian hata Gorik “doulos” na marlapatan “hatoban” (Inggris:slave). Adong do dua na naeng dohonon ni Ap . Paulus molo digoari ibana dirina “naposo ni Jesus Kristus”.
2. Ndang ibana nampuna ibana, alai Kristus do.

Tung dihalomohon Ap. Paulus do manjou Jesus Kristus “kurios” (sian hata Gorik, na marlapatan TUHAN, manang TUAN). Hata “kurios” di hata Gorik manggombarhon pameopon na singkop ni sada halak Tuan di sahalak hatoban manang di sada arta. Tuan i ma tuan na berhak dohot nampuna  hatoban manang arta i dohot singkop.  Boasa? Alana, hatoban manang arta i, nunga dituhor, jala nunga lunas digarar Tuan i. Songon i ma dihaporseai Ap. Paulus diri na naung ditobus Tuhan Jesus lunas sian gomgoman ni dosa dohot hamatean. Asa, molo digoari ibana dirina “doulos”, jala Yesus Kritus “kurios” , dirajumi Ap. Paulus do dirina “hatoban” ni Tuhan Jesus; Jesus Kristus do Tuan dohot Tuhan, jala nampuna ibana. Dihaholongi Ap. Paulus do Tuhan Jesus, dipelehon ibana do dirina tu Tuhan Jesus. Alani i, ndang dirajumi ibana be dirina ibana nampunasa, alai Kristus nama nampuna ibana.

Tohonan “naposo (doulos) i ma tohonan marhobas.

Dihaporseai Ap. Paulus do, ia hasangapon dohot habalgaonna marojahan do di tohonanna i songon “naposo ni Jesus Kristus”. Tohonan “naposo (doulos)”, i ma tohonan marhobas. Ndang tarsirang tohonan “naposo (doulos)” sian ulaon marhobas. Alai, nangpe tohonan napineop ni Ap. Paulus on tohonan namangulahon panghobasion, ndang dirajumi ibana i haleaon i, alai hasangapon do. Sangap do tohonan dohot ulaon marhobas i di ibana, ala arga ibana ditobus Tuhan i laho mameop tohonan dohot ulaon i (1 Kor 6:20).

Digoari ibana do dirina Apostel ni Debata.

Molo di P.Narobi, tung hasangapon na balga do di sada halak molo dijou  Debata, jala molo boi dialusi ibana Debata na manjou ibana tu sada ulaon, isarana, gabe Panurirang. Songon i do nang haporseaon ni A. Paulus di turpuk on. Dihaporseai Ap. Paulus do na dijou Debata ibana gabe apostel. Didok ibana di surat na on:”Ahu …si Paulus na tarjou gabe apostel”(1). Panjoun ni Debata tu ibana gabe apostel, ndang dirajumi ibana i panjouan tu hasangapon manang tu jabatan, alai parsuruon marhobas do. Dirajumi ibana do diri na sada halak na disuru Debata mula ulaon panghobasion, ndang maniop sada jabatan na sangap.  Hombar do pangantusion ni Ap. Paulus on tu hata ni Tuhan Jesus na mandok:”Ndang hamu mamillit Ahu, Ahu do mamillit hamu, jala hupadiri hamu asa marparbue” (Joh 15:16). Dirajumi Ap. Paulus do, ia ngolu na ndang ngolu mangulahon lomo ni roha na sandri, alai mangulahon lomo ni roha ni Debata do.

Digoari ibana do diri na “na pinapulik” mamaritahon Barita Nauli.

Disurathon ibana:”Ahu…si Paulus ..pinapulik tu ulaon mamaritahon barita nauli sian Debata” (ay.1). Molo didok Ap. Paulus ibana “napinapulik” (to set a part), ondo nanidok na:

Dihaporseai ibana paboa Debata do papulik ibana tu ulaon mamaritahon barita nauli i, andorang so tubu dope ibana tu hasiangan on  (Gal 1:15. Dihaporseai ibana paboa naung adong do rencana ni Debata nauli tu ganup jolma. Ndang adong ngolu ni jolma na so adong tujuanna.  Ditongos Debata ibana tu portibion laho mangula sada ulaon naung ditontuhon Debata hian do, i ma “mamaritahon barita nauli sian Debata”.

Ndada holan Debata napapulik Ap. Paulus tu ulaon na tontu i, alai dohot do jolma papulik ibana. Di Ul. Ap. 13:2, didok Tondi Porbadia i do tu uluan ni Huria di Antiokia, asa dipapulik nasida si Paulus dohot si Barnabas laho mamaritahon barita nauli i tu halak  Dihaporseai Ap. Paulus paboa nadipapulik do ibana mangula sada ulaon di Debata dohot di Huria i.

Dihaporseai Paulus do, di tingki “napinapulik” na i ibana, dijalo ibana do dua pasupasu na sumurung sian Debata, songon nahinatindangkonna di ayat 5 i mandok:”Sian Ibana hujalo hami asi ni roha dohot tohonan apostel…”.

Manjalo asi ni roha. Asi ni roha, i ma tutu situtu silehonlehon; ndang na dilului i, ndang na alani jasa. Andorang so Kristen dope Ap. Paulus, sai dilului ibana do hasangapon di jolo ni jolma dohot “jasa” di jolo ni Debata marhite na mangulahon Patik na sampulu i. Alai, di sude hinaloja na i, ndang taruli dame dohot las ni roha ibana. Nuaeng, dung gabe Kristen ibana, diantuasi ibana ma, paboa ngolu dohot tohonan na pineop na saonari, ndang marojahan di aha naung niulana, alai morajahan di aha naung niula ni Debata do. Di bagasan Patik i (Taurat) dihatahon aha naingkon ulahonon ni jolma, alai di bagasan Barita Nauli i (Injil)dihatahon aha naung niula ni Debata. Diida Ap. Paulus ma nueng paboa haluaon ni halak Kristen ndang marojahan di atas usaha ni jolma mangulahon na denggan, alai marojahan di ulaon holong ni roha ni Debata do.

Manjalo tohonan (ulaon). Dihaporseai Ap. Paulus paboa nadipapulik Debata do ibana gabe apostel tu angka sipelebegu. Dipillit Debata ibana ndang tu hasangapon na mamunjung, alai tu tanggung jawab na mamaunjung do. Nuaeng ditanda ibana ma dirina napinapulik ni Debata laho mamelehon dirina dohot ngoluna mamaritahon Barita Nauli i tu ganup jolma dohot tu ganup houm. Hakaristenon tontong do papulik hita, alai ndada rajuman i gabe halobian, gabe hasangapon ni diri niba sandiri, gabe ginjang ni roha; alai ulaon panghobasion do di bagasan haserepon dohot di bagasan holong ni roha tu saluhut jolma.

Dung dipatandahon Ap. Paulus ibana dohot tohonan najinalona, dipapatar ibana do tongtong “pamusatan ni Barita nauli i “. Ia pusat ni Barita Nauli i, i ma di diri ni Jesus Kristus sandiri (tajaha ay. 3-4). Adong dua na mansai ringkot dipatorang ibana di si, i ma:

Jesus Kristus Anak ni Debata gabe jolma (inkarnasi). Dihatahon ibana paboa Jesus Kristus tutu situtu do Ibana jolma. Sahalak bapa gereja hea mandok:”Gabe songon hita Ibana, asa bahenon-Na hita songon Ibana”. Ndang dijamitahon Ap. Paulus sahalak “pribadi” satonga jolma, satonga debata, songon barita ni turiturian (legenda). Laos marhite jamita ni Ap. Paulus on do dirumushon Huria na parjolo i (Gereja Ortodoks):”Ia Tuhan Jesus Kristus Tutu Situtu do Debata laos Tutu Situtu do Ibana Jolma”. Di hajolmaon-Na, gabe dosa Ibana, na so tumanda dosa, asa gabe hatigoran ni Debata  hita di bagasan Ibana” (2 Kor 5:21).  Diampehon sude dosanta i tu Ibana, alani i do dibahen na ingkon mate Ibana di hau pinorsilang humophop hita, mangganti hita.  Di silang i ma digarar Ibana sude utang ni dosanta i.

Haheheon ni Jesus Kristus (kebangkitan). Dung mate Tuhan Jesus di silang i humophop hita, tuat do Ibana tu banuatoru, dung ditanom Ibana. Alai, ndang margogo huaso ni hamatean i maniop Ibana. Hehe do Ibana sian na mate. Haheheon-Na i, i ma patumonaan ni hahehehon ni angka naporsea di Ibana. Dung hehe Ibana sian na mate, manaek do Ibana mulak tu Banuaginjang haroroan-Na hian, mulak tu hasangapon-Na (na hea ditadingkon Ibana), hundul di siamun ni Debata, Ama-Na i, Pargogo na so hatudosan i. Di si ma Ibana paima mulak sogot tu tanoon manguhumi halak na mangolu dohot na mate” (Panidangion Haporseaonta i).

Ndang songon sahalak ulubalang na sian portibion Jesus. Ia ulubalang na di portibion, di tingki ngoluna, berjuang; jala dung mate, tinggal holan barita (sejarah). Jesus Kristus hehe do sian na mate, tongtong do Ibana mangolu, jala rap dohot hita; hot do Ibana marhuaso sian salelengna rodi salelengna (kekal). Amen.

Pdt. Dr. B. Purba