5 MUSA 30:9-14, JAMITA MINGGU VII DUNG TRINITATIS MINGGU, 10 JULI 2016

MARSIHOHOT DO TONA DOHOT HATA NI DEBATA

 PATUJOLO

Godang do pambahenan ni Debata dalanNa patuduhon Asi ni rohaNa maradophon bangsoNa. Nang pe jotjot diuhum Debata bango Israel alai ndang hea ditadinghon Debata nasida. Tongtong do diurupi Debata bangso Israel nang pe jotjot nasida mambahen hansit roha ni Debata marhite angka pangalaho nasida na manimbil sian Hatana. Jala buku 5 Musa on ima buku na sinurathon ni si Musa, ima sada buku kumpulan taringot pardalanan ni bangso Israel, na dimulai sian 1 Musa sahat tu 4 Musa, ima angka Tona, uhum, ni Debata na dipasahat tu nasida marhite si Musa. Ido na umbahen molo dibahasa Indonesia  didok Ulangan, alana di buku 5 Musa on do diulahi angka tona, uhum ni Debata na dipasahat tu bangsona i. Tarlumobi ma di bagasan turpukkon, ima taringot tu patik na dipasahat Debata tu bangsona i marhite si Musa. Tona na pinasahat ni Debata ndang na naeng mambahen asa maol parngoluon ni nasida, alai asa lam unur jala lam tu dengganna do parngoluon ni nasida. Asa lam marlas ni roha nasida marhite Patik i jala Debata pe marlas ni roha mamereng pangalaho ni nasida molo denggan parngoluon ni nasida jala lam terarah parsaoran i ditongatonga ni nasida. Ido sada dalan ni Debata patuduhon Asi ni rohana tu bangsoNa i.

Nunga opat pulu taon lelengna bangso Israel rap dohot si Musa  ndung haruar sian parhatobanan Misir. Jala nunga godang diida angka pangurupion ni Debata tu nasida. Marhite pangurupion ni Debata tu nasida, gabe boi ditaluhon nasida angka bangso na nanaeng mangambati pardalanan ni nasida, ima bangso Hesbon dohot Basan alana ingkon boluson nasida do luat i molo naeng sahat bangso Israel tu tano na naung binagabagahon ni Debata tu bangso Israel, alai ndang di loas nasida mamolus sian luatna  jala marporang ma nasida dohot bangso Israel (4 Musa 21:21-35). Diurupi Debata do bangso Israel marhite sipanganon (manna) dohot siunumon, singkop do nang angka pahean ni nasida saleleng dipardalanan  i nasida, dna.  Ndang taretong be angka pangurupion ni Debata tu nasida. Jala nasida pe nunga gabe sada Sitindangi ni Jahowa maradophon bangso na asing. Dibahen i ma dipertegas si Musa tu nasida marhite turpuk on, taringot tu Tona dohot Hata ni Debata tu bangso Israel.

HATORANGAN NI TURPUK

Ayat 9-10

Dipaingot si Musa do tu bangso Israel ia taringot tu padan na pinasahat ni Debata tu ompu ni nasida. Ndang alani pangalaho ni bangso Israel na denggan na mambahen marpadan bangso Israel dohot Debata, alai ompu ni nasida do na marpadan dohot Debata ima si Abraham, na gabe sahat ma padan i tu nasida. Marlapatan ma i sasintongna, ndang hea Debata marpadan dohot bangso Israel jala padan i pe ndang hea dibege nasida tumpol (langsung) sian Debata, alai marhite sian hata manang barita na pinasahat ni angka ompu ni nasida  do umbahen diboto nasida padan i jala gabe parsidohot nasida dipadan i. Nang pe sahat padan i tu bangso Israel, alai sasintongna ndang na mandok asa gabe boi nasida marlomolomo di dirini nasida. Ala nunga marpadan nasida tu Debata, tontu ngolu ni nasida pe dang be nasida sandiri nampunasa, alai Debata do nampunasa jala angka uhum (peraturan) ni Debata do na gabe aturan di parngoluon ni nasida. Angka Uhum (aturan) ni Debata na sahat tu nasida, ima do na gabe ukuran hasintongan di nasida mangihuthon ima hasintongan na sian Debata. Di bindu 29:1-69, dipatorang si Musa  do taringot tu pasupasu tu angka na mangulahon Patik ni Debata dohot angka torutoru tu angka na mangalosisa.

Ala nunga leleng si Musa rap dohot bangso Israel marlapatan paboa nunga ditanda si Musa pangalaho bangso Israel jala nasida pe nunga ditanda nasida si Musa. Nunga ditanda si Musa ma bangso i, ido  alana umbahen dipatorang si Musa hata ni Debata tu bangso Israel. Di ayat 7 dipatorang taringot tu torutoru na pinasahat ni Debata tu angka na so mangulahon hataNa, jala di ayat 9 dipatorang ma muse taringot tu pasupasu na pinasahat ni Debata tu angka na mangulahon hata-Na. Lapatanna, adong do syarat jala upah sijaloon ni halak na mangihuthon Debata. Upah ni halak na mangulahon patik ni Debata ima pasupasu marhite angka na adong dihumaliang ni bangso i, ima: 1) Parkarejoan ima ulaon ni tangan, lapatanna: angka na niula tangan ni bangso i dipasupasu Debata. Marlobilobi do hasil ni parkarejoan i, lobi sian na nihirim ni rohana dipasahat Debata tu nasida. 2) keluarga: Halak na mangulahon Hata ni Debata ndang holan na niula ni tanganna na tarpasupasu, alai sahat do nang tu keluarga dohot pinomparna. Ndang holan sian perekonomian sambiing na mambahen marlas ni roha nasida, alai dohot do marhite angka pomparan ni nasida na dapotan las ni roha, 3) Hamoraon:  Marhite sinur ni  angka pinahan: di hatiha i, arta diida nasida sian godang ni angka pinahan ni nasida. Ndada sihumisik (hepeng) dohot bidang ni porlak na gabe ukuran ni arta di nasida, alai marhite sian godang ni angka pahanpahan ni nasida do. Lapatanna: Hamoraon i pe dipasahat Debata do tu bangso Israel molo satia nasida mangihuthon Hata ni Debata, jala ndang na diorai Debata bangso i mamora, alai marhite sian angka pasupasu i do dipasahat Debata hamoraon tu bangso Israel, 4) parbue ni tano (hasil bumi): Alani do molo tabereng nuaeng, luat ni Timur Tengah do na gabe pengekspor minyak na gumodang jala naumbalga di portibi on. Marhite pangalaho nasida na mangoloi hata ni Debata, bangso Israel boi gabe hasahatan jala parhitean ni pasupasu, ndada holan tu diri ni nasida sandiri alai boi do gabe parhitean ni pasupasu i maradophon bangso na asing.

Mansai las do roha ni Debata mamereng bangso Israel molo mulak nasida mangihuthon Debata. Nang pe nunga dipajojor angka pasupasu na naeng sipasahaton ni Debata tu nasida, alai ingkon unduk jala ulahonon ni nasida do angka uhum/persyaratan di na naeng manjalo pasupasu i, ima: Manangihon Hata ni Debata, mangaradoti angka Patik ni Debata dohot angka aturanna jala mulak tu Debata sian nasa roha dohot pusupusu, na marlapatan: Hibul ni roha do na pinangido ni Debata sian bangsona. Ia hibul roha i, ima: Mangaradoti Patik ni Debata, manangihon HatNa, jala hibul rohana mulak tu Debata sian nasa bulus ni roha.

 

ayat 11

Ditanda Debata do sude angka na tinompaNa. Diboto Debata do aha ni dibagasan roha nang pikkiran ni bangsoNa. Alani i ma didok: ai Patik on, na Hutonahon i tu ho sadarion, ndang masongkalhu, di ho, manang mangholangku. Astuan sian pandohan i, adong do panganjuon dohot tawaran na dipasahat di bagasan ayat on. Marhite si Musa naeng sipasahatonna disi, ima paboa na ditanda Debata do suhat-suhat dohot batas hatolapon, hagogoon (kemampuan) ni bangso Israel. Na tolap sidungdungon dohot siulahonon ni nasida na pinasahat ni Debata tu bangso Israel, jala ndada nangka na so boi siulahonon ni nasida na pinasahat ni Debata angka uhum, tona, aturan i.  Ndang na ingkon marhoihoi manang marsiakbagi nasida din a mangulahon angka Patik i, ndang disuru Debata nasida asa mangalului angka bohal / perlengkapan na maol siluluon ni nasida, alai sian na adong di diri ni nasida sandiri do angka perlengkapan i dipangido Debata. Nang pe angka perelengkapan i ndang dao ingannanna manang ndang pola situhoron ni nasida, tongtong do arga i di Debata jala ima na naeng sipasahaton ni Debata muse tu nasida. Tarida do paboa parasi roha bolon do Debata jala na pinasahat-Na maradophon bangso na pinillitNa, na olo jala satia mangulahon Hata ni Debata. Ndang olo Debata mambahen sega pikkiran ni bangsoNa jala ndang lomo roha ni Debata mamereng susa pikkiran nang roha ni bangsoNa. Alani i ma marhite sian ayat on, adong sada panganjuon jala tawaran na naeng sipasahaton ni Debata tu bangso i. Hibul ni roha nang pikkiran ni bangso i do na pinangido ni Debata, di na mangulahon Tona na dipasahat Debata i tu nasida. Tung pe songoni, ditanda Debata do sasintongna hadirion dohot hajolmaon ni bangso i. Nang pe nunga dipasahat Debata tawaran nang panganjuon maradophon bangso i, sai adong dope sian tongatonga ni bangso i na so olo manangihon jala mangulahon Tona ni Debata.

 

ayat 12-13

Ndang adong sidalian manang alasan na boi sibahenon ni bangso i tu si Musa asa ndang mangulahon Patik nang Tona ni Debata. Umbahen i do didok di ayat on, ndada di banua ginjang Hata i, alai ingkon sialapon do Hata i sian banua ginjang. Ada do umbahen na didok songon i? Alana adong do sada pamikkiron di bangso Israel, ia Debata ima na maringanan di banua ginjang, ndada na maringanan di tano on. Hinorhon ni pangantusion na masa si songoni do umbahen na didok si Musa di bagasan ayat on: ndang maol nasida mangalap Patik nang Tona ni Debata i tu banua ginjang, ala Debata sandiri do na naung pasahaton Patik i tu bangsoNa marhite si Musa. Jala ndada di bariba laut inganan ni Hata, ai tung ise ma na boi mangalap i tu bariba ni laut i. Sian ayat on dipatuduhon do paboa naung ditanda si Musa saluhutna bangso Israel, jala ndang adong be sidalian/ alasan ni nasida asa ndang mangulahon Patik ni Debata. Debata Jahowa sandiri do na ro pasahathon Patik dohot Tona i tu bangso Israel marhite si Musa, jala ndada na si musa na mangalap i. Inisiatif manang tahi ni Debata sandiri do na naeng mamereng denggan parngoluon ni bangso i, ala ndang adong arah nang uhum di hatiha i di bangso Israel, i do umbahen na dipasahat Patik i tu bangso Israel marhite sian si Musa.

Hata na ro sian banua ginjang, na marlapatan do i paboa Debata sandiri do na ro sian banua ginjang, sian inganan-Na mandapothon naposona. Jala Hata i ima  Jesus Kristus, na ro tu portibi on na gabe jolma mandapothon jolma i jala mangalehon hangoluon tu jolma asa mangolu jala ndang mate alani dosana. Ditingki na pasahathon Patik i tu si Musa, Debata sandiri do na ro manjumpangi si Musa, alana ndang tolap jala ndang boi jolma i na manjumpangi Debata suang songon i nang  Jesus Kristus. Jesus Kristus sandiri do na ro tu potibi on mandapothon jala paluahon jolma i sian parhatobanan si bolis. Hata na di bariba laut, astuanna: Naeng mangarahon hita tu Jesus Kristus na mate jala mulak mangolu manaluhon hamatean. Molo di tradisi ni bangso Israel, ia Laut, ima na manggombarhon hamatean manang banua toru, laos alani i do Jesus Kristus, Anak ni Debata na ro sian banua ginjang, mate jala mulak mangolu di ari patoluhon na manaluhon hamatean. Jala Ibana sandiri na mangolu sian hamatean na pasahathon hata ni Debata ima hangoluon tu halak na porsea tu Debata.  Hata ni Debata  na gabe daging ima Tuhan Jesus Kristus (Joh 1:1)

 

ayat 14

Hata ni Debata na disurathon di dua batu i, ndada i na rumingkot na niigil ni Debata sian jolma i, alai naeng ma Hata ni Debata mangolu jala disurathon dibagasan roha ni jolma. Ndang dao jala ndang pulik ingananna dibahen Debata inganan ni Hata i, alai inganan ni Hata i ima di bagasan pamangan nang roha ni jolma. Dibagasan pamangan marlapatan ma i adong sada panindangion na sintong na haruar sian pamangan ni bangso i laho mangulahon Hata ni Debata. Molo pamangan mangahatahon taringot Hata ni Debata, ingkon ma saurdot sian roha nang pamanganna. Unang ma marasing panindangionna dohot na dibagasan roha na, alai ingkon saurdot do na di bagasan panindangion i dohot na di bagasan roha. Roha marlapatan ma i, na manghubunghon jolma i dohot Debata, jala roha i do inganan na dipillit Debata hapeahan ni Hata i. Roha i do na paimbarhon jolma i dohot binatang. Jala diroha ni jolma i do sasintongna pangalaho ni jolma i. Nang pe ndang diboto jolma na diroha ni donganna, alai anggo Debata diboto do luhutna, jala Debata sandiri do na manuanhon Hata i dibagasan roha ni jolma, asa unang boi disesa tinta, ndang luntur binahen ni udan nang mataniari; alai boi martunas jala marparbue dibagasan parngoluonna. Jala tanda ni panindangion di Hata ni Debata, ingkon tarida ma parbue na marhite sian pangalaho na denggan na hombar tu lomo ni roha ni Debata, jala Debata do na gabe ojahan, dasor laho mamparbuehon pangalaho na denggan i.

• HAHONAAN

1. Marsihohot Di Tona Dohot Hata Ni Debata

Saleleng mangolu dope hita diportibion, pasti godang do angka hamaolon, angka parungkilon na songgop tu bagasan parngoluonta. Jala angka hamaolon i nang parungkilon i pe olo mambahen hita tarlalap didirinta jala ndang taingot be manjou Debata laho mangurupi hita. Olo do sipata angka hamaolon on mambahen gabe gale daging nang rohanta jala lupa manjou Debata. Memang ido nian hajolmaon, molo ro angka na masai mambahen susa pikkiran nang rohanta. Alai molo tangkas tarajumi, sasintongna jotjot do hita sandiri do na mambahen susa roha nang pikkiranta. Ala ndang marsihohot tu Hata ni Debata ido na mambahen hita di bagasan hasusaan. Molo naung sada rohanta pasahathon angka parungkilonta nang hamaoloni tu Debata marhite angka tangiangta nang pe marhite angka pangalahonta, unang be sai ganggu rohanta asa unang susa roha nang pikkiran. Memang angka tantangan-tantangan na di  portibion jotjot doi mambahen rohanta moleng-oleng  songon kapal alai molo hot do na tatio Hata ni Debata nang pe ro angka tantangan, pasti sanggup do hita mamolus saluhut na i.

2. Ditanda Debata Do Roha Ni Jolma i

Parngoluan na sintong ima parngoluon na sarupa na dihatahon dohot na diulahon. Adong pepatah mandok rambut sama hitam tapi hati siapa yang tahu, ai diboto jala ditanda Debata do angka na adong dibagasan roha nang pikkiran ni jolma. Alana Debata sandiri do na manompa jolma i. Alani i nang pe songon na burju hita dijolo ni angka donganta alai asing na di bagasan rohanta, nang pe ndang diboto donganta i alai anggo Debata tangkas do saluhutna i. Nang pe susa pikkiranta mangadopi angka na masa on memang diboto Debata do na di rohanta i,  alai ingkon tong do tapasahat tu Debata asa diurupi hita mangadopi angka na masa on. Molo sahalak parhalado ingkon ma nian sian ias ni roha mangulahon  tohonanna unang ma marnida  keuntungan parsatongkinan.

3. Dipasupasu Debata Do Halak Na Mangaradoti Hatana

Godang do cara ni Debata pasahathon angka pasupasuna tu halak na mangulahon HataNa. Alai memang ingkon saurdot do pangalahonta hombar tu lomo ni roha ni Debata. Unang ma taharaphon dipasupasu Debata angka na taula alai ndang olo hita mangula, manang mengeluh parboniaga ndang adong diomo molo so lao do  maronan, unang ma sai dihirim  manggadis cabe, coklat, kopi, jeruk alai ndang hea hita manuan, alai gabe suansuanan ni halak sai naeng dianahon. Pasupasu ni Debata ima pasupasu na dipasahat tu angka jolma na  olo mula ulaon lumobi Hata nang TonaNa tung ido dihalomohon ni Debata. Memang di zaman sinuaeng on mansai maol jala lam timbo do kebutuhanta di bagasan parngoluonta, alai na dipangido tu hita ima ingkon sian dalanna ma hita mangido pasupasu tu Debata. Ingkon gomos do tatiop hata on ima Dipasupasu Debata do Halak Na Mangaradoti Hatana ndang na manimbil sian Hatana.

4. Panindangion Jala Pangulahonon Di Hata Ni Debata

Molo panindangionta ima Jesus Kristus Do Debata jala Hangoluan di hita, ingkon i ma parngoluonta. Halak na naung manghatindanghon Jesus ingkon adong do parbuena marhite angka pangalahona. Ndang holan hata na naeng dipangido Debata tu hita alai ingkon saurdot do na tahatahoni dohot na dibagasan rohanta jala na taulahon di bagasan parngoluonta. Panindangion na sala, pangalahona pe sala alani, ingkon tasungkun ma rohanta ise sasintongna na tahatindanghon gabe hangoluon dihita? Unang ma marasing panindangionta sian na taulahon. Tahatindanghon halak Kristen kita jala porsea hita tu Jesus Kristus alai ndang ringkot di hita parmingguon manang martangiang. Nian terdaftar do hita gabe ruas alai ndang hea hita marminggu, manang tahatindanghon di KTP halak Kristen hita jala ro marminggu, alai tong dope lao tu parhadatuon, pargadambuson dohot parmainanon. Alai na naeng dipangido tu hita ima ingkon sejalan ma na tahatindanghon i dohot na taulahon i (Kristen na berintegritas). Molo Jesus Kristus do na hatindanghon, pangalahonta pe ingkon hombar ma tu Lomo ni rohana, ido panindangion na sasintongna.

(Pdt. HT Fresley Simamora, S.Th, M.Si)