Bahan Jamita Evangelium, 20 September 2026: Saluhutna do Tarpatupa Ahu di Bagasan TUHAN

Ginurithon:
Pdt. Tahan Master Simaremare, M.Th.LM
Praeses HKI Daerah XIV Tebseba

MINGGU XVI DUNG TRINITATIS

PILIPPI 4: 10 – 19

PATUJOLO

Huta Pilippi maringanan di Makedonia tungkan Purba, 16 Km sian topi ni
aek laut Aegea, di mulana i digoari Raja Pilippus II sian Makedonia, i ma natoras
baoa ni raja Alexander Agung. Di masa ni apostel Paulus, huta Pilippi gabe sada
kota dohot pangkalan militer na tarbarita ro di dia. Apostel Paulus do na pajongjong
huria na di Pilippi rap dohot naginoaranna “dongan saulaon”, i ma si Silas, Timoteus
dohot Lukas uju di pardalanan misi na paduahon marbarita nauli, songon sada
respon mangalusi pangungkapon na pinasahat ni Debata uju di Troas (Ul. Ap. 16:9
40). Tung mansai uli jala porhot do parsaoran ni apostel Paulus rap dohot huria
Pilippi. Dihatindanghon do haburjuon ni huria i na manongos pangurupion tu
apostel Paulus (2 Kor. 11:9; Plp. 4:15-16), laos sian balga ni roha manongos pelean
na pinapungunasida laho mangurupi halak Kristen na hurangan di Jerusalem (2 Kor.
8:1; 9:15).
Turpuk jamita sadari on i ma ponggol parpudi sian isi ni surat na tinongos
ni apostel Paulus sian bagas ni hurungan tu huria na di Pilippi, na digurithon di
hirahira taon 60-62 TM, manaringoti ngolu na tongtong marlas ni roha di bagasan
Kristus.

HATORANGAN
Sian konteks na masa di turpuk on, sasintongna dalan asa boi haruar i do
fokus ni halak na dibagasan hurungan, asa malua sian penjara. Adong na pola sahat
tu na mangalului pengacara na targoar jala tarbarita holan laho mangurupi asa boi
malua. Alai, andul do marasing anggo apostel Paulus. Sian bagas hurungan di kota
Rom do ibana manggurithon suratna na ditujuhon tu huria Pilippi, huria na
pinajongjongna. Nang pe di partingkian na so une ibana (ala tarhurung), gok las ni
roha dohot olopolop do isi ni surat na ginurithonna i. Mandok mauliate do apostel
Paulus marhite surat on tu huria Pilippi naung mangurupi panghobasionna, materi
nang tangiang pe.

Ayat 10:
Dipungka apostel Paulus do pasahathon las ni rohana ala dimatahon jala
diparrohahon huria Pilippi do ibana di panghobasionna. Ngolu na nirahut ni holong
dohot dukungan na tung mansai gogo tu apostel Paulus, i do na pinatuduhon ni huria
Pilippi. Ndada holan i na gabe las ni roha ni apostel Paulus, alai dohot do
pangaradotionnasida na gabe panindangion di balga ni pangaramotion ni Debata di
ibana marhite huria i.

Ayat 11:
Pandohan “ndang na hurangan au” i ma gombaran ni sikap ni apostel Paulus
na sederhana, sabam jala manghasonangkon na adong. Panindangion do i na
patuduhon sikap iman, i ma ngolu na marsigantung holan tu Debata, ndada tu
godang ni arta manang sinamot (materi).

Ayat 12:
Borhat sian pengalaman pribadi do apostel Paulus manaringoti lan angka
partingkian naung niadopanna, ngolu na hurangan nang ngolu na marlobilobi, nunga
be mahap ibana. Diondolhon do ia haporseaon na togu ndada tubu holan sian
partingkian na une, alai dohot do sian na mangadopi angka paraloan nang hamaolon
di ngoluna.

Ayat 13:

Ayat on patuduhon pos ni roha ni apostel Paulus bahasa hagogoon ni
Kristus do na manghorhon di bagasan ibana umbahen na manahan ibana mangadopi
ragam ni angka na masa; dibagasan roha na tenang jala marhaposan tu Kristus.

Ayat 14-18:
Dipapujipuji apostel Paulus do huria Pilippi ndada holan ala ni
pangurupionnasida tu ibana, alai dohot do ala ni panindangion ni haporseaonnasida
na patuduhon semangat dohot ketulusan nasida laho mendukung panghobasion ni
apostel Paulus. Diondolhon apostel i do mandok ia sude rumang ni pangurupion na
pinasahat ni huria i tu ibana pabotohon na parsidohot do nasida di misi
parbaritanaulion, songon uap na hushus na gabe pelean halaean na gabe halomoan ni
roha ni Debata.

Ayat 19:
Dihaposi apostel Paulus do paboa na gohan ni Debata do nasa na ringkot di
nasida sian hamoraonNa dibagasan sangap ni Jesus Kristus. Sian surat na tinongos
ni apostel Paulus tu huria Pilippi on, boi do idaonta paboa Debata do mual ni nasa na
adong di ngolu on. Saluhutna tahe dibagasan gomgoman ni otoritasNa sambing do.
LehononNa do hombar tu aha na ringkot di ngolunta, ndada borhat sian aha na
tahalomohon.

HAHONAAN

Nang pe ragam rumang ni ngolu nataadopi, unang hita mabiar laho mandalani
ariari ni ngolunta. Ndang adong na umboto boha ari marsogot, alai nang pe
songon i unang mabiar hita laho mangadopisa. Ala taboto do tangkas rap dohot
ise hita mardalan, asa gabe tubu panghirimon dohot pos ni roha mandok
saluhutna do tarpatupa ahu marhitehite Ibana. Marsigantung holan tu hagogoon
ni Kristus, i do na gabe modal ni halak Kristen. Dipaingot apostel Paulus do hita
paboa gogo ni halak na porsea marharoroan sian Kristus. Asa di ganup
partingkian, une manang so une, ingkon marsigantung tu hagogoonNa.

1. Adong do hea sada postingan di Media Sosial na mandok: “Menurut hukum
   fisika, tekanan berbanding lurus dengan gaya. Jadi jika kamu merasa hidupmu
   banyak tekanan, mungkin karena kamu terlalu banyak gaya”. Sipaingot do
   pandohan i tu hita mandok asa marsiajar hita mangguruhon taringot tu
   kesederhanaan; sabam jala manghasonangkon na adong.
2. Diajari apostel Paulus do hita tongtong asa malo mandok mauliate ala ni
   saluhutna (1 Tes. 5:18). Di ngolu na hurangan manang marlobilobi, di las roha
   manang marsak, hatiha hipas manang di tingki marsahit; tongtong ma dok
   mauliate. Apapun alasannya, jangan lupa bersyukur! Diajari do nang hita
   mandok asa talup mandok mauliate tu halak na dohot mangaradoti ngolunta
   marhite ragam ni pangurupion na pinasahatna, materi nang tangiang pe.
3. Marsiajar do hita nang sian ngolu ni apostel Paulus taringot tu motivasi dohot
   semangat na polin laho manghobasi huriaNa. Unang bahen arta manang sinamot
   (materi) gabe fokus ni panghobasion! Marsiajar do hita nang sian huria Pilippi
   taringot tu kepedulian maradophon dongan jolma, mamatahon na ringkot di
   dongan lumobi ma nasida na mangharingkothon pangurupion, Amen.