HEBER 11:8-16, EPISTEL MINGGU XI DUNG TRINITATIS MINGGU, 7 AGUSTUS 2016

Patujolo

Surat  Heber didok do jamita na ganjang jala sada kesaksian hakeristenon hatiha i. Laos bindu 11 on songon panimpuli jamita i hombar tu haporseaon. Haporseaon na  dipataridahon marhite na manadinghon sisolhot, tano hatubuan/hagodangan, arta lumobi nang hosana. Manaon na porsuk dohot hamaolon ala ni haporseaonna. Dibahen i, turpuk on manogu laho mananda panghorhon ni haporseaon na togu i.

Hatorangan

Debata manjou si Abraham laos dioloi  asa bungkas tu tano na naeng sipatuduhononNa tu ibana. Ndang diboto dope dompak dia dohot kondisi ni tano i. Alai diboto si Abraham do, ndada tano teanteanan i na gabe ujung ni pardalananna. Huta i songon sada tudosan huta hasonangan manang i do surgo i naung pinature ni Debata tu angka naposona na satia gabe borhat do ibana hinorhon ni haporseaonna i. Sasintongna paradongan do ianggo keluarga ni si Abraham alai ndang gabe manundati ibana mangulahon hata ni Debata ala ni haporseaonna. Togu ni haporseaonna tu Debata ala marpanghirimon na mangolu do ibana, gabe taripar ibana tu nasinangkapanNa ima bagabaga naung pinatupaNa. Di na mandalani dalan andorang so sahat dope nasida tu tano i, dibahen nasida do undungundung rap dohot si Ishak, si Jakkob dongan ni si Abraham panean bagabaga i. Namarlapatan do i tongtong do nasida berkomunikasi tu Debata na gabe patoguhon jala paposhon haporseaonna. Haporseaon ni si Abraham tarida do sian pasupasu ni Debata tu si Sara na manubuhon sada posooposo na gabe songon sada tanda dijanji ni Debata tu angka pinomparna sogot na gabe bangso na bolon jala ndang habilangan pinomparna. Panghirimon ni nasida ndang sebatas tano sambing alai janji ni Debata nasun denggan situtu do apala na nihirim ni nasida, ima inganan naung pinarade ni Debata na unmuli jala undenggan sian na binereng ni mata nasida uju dingolu na. panghirimon na umbalga di nasida ima hangoluan sisalelengnilelengna tusi do anggo panatapan nasida.

Jotjot do manghirim hita tu angka ragam ni pasupasu sian Debata, alai gabe mandao do natahirim i. Boasa songon i? ala ndang togu panghirimonta i na mambahen mabiar jala gangu rohanta gabe dang taoloi jala dang taulahon hombar tu na hinalomohonNa. Ndang na gabe sangkap ni Debata be na taulahon, alai sangkapta sandiri do (Poda 16:1-3). I do umbahen ingkon sai tontong do hita mangido gogo dinalaho mangulahon angka siulahononta asa tontong margogo hita mangulahonsa.

Hahonaan

Abraham songon sahalak sitiruon tu sude halak Kristen tarlumobi. Ingkon taboto do parsatongkinan do ianggo tano on na mardalan do hita tu inganan naung pinarade ni Debata di hita. Ditingki dipardalanan on godang situtu do angka hambatan dohot angka siboluson na mansai maol situtu. Ala ni i, porlu situtu do hita tontong marparsaoran tu Debata asa lam togu haporseaon dohot panghirimonta laho mangeahi bagabaga naung pinaradeNa tu hita. Sipata olo dohita ala ni holongta tu na adong dihita (keluarga, arta, dll) mambahen gabe ndang sahat hita tu inganan na dumenggan i. Alai songon si Abraham ditadinghon do sude na i laho manopot naung pinarade ni Debata.

(Cln. Pdt. Herwin Nababan, S.Th)