EPISTEL MINGGU 15 JANUARI 2023 – JOHANNES 1:29-42

Epistel Minggu 2 Dung Epiphanias 15 Januari 2023
MINGGU 2 DUNG EPIPHANIAS
MINGGU, 15 JANUARI 2023
“PANONDANG HALUAON NI SALUHUT BANGSO“
Johannes 1:29-42

PATUJOLO

Motto ni ngolu ni si Johannes Pandidi i ma mamaritahon haroro ni Mesias, Birubiru ni Debata na mamorsan dosa ni portibion.  Birubiru ni Debata i ma Jesus Kristus Mesias naung adong hian andorang so adong dope portibion jala na adong dungkon ni si Johannes. I ma Jesus na tinogos ni Debata Ama, laho patotahon tanggungjawab-Na. Johannes Pandidi mangula bulus di bagasan hasintongan, jujur jala barani mansoadahon kepentingan diri sandiri jala marpusathon tu pamaritaon hasangapon ni Jesus Kristus, songon na andar tupa di ngoluna. Ndang adong roha naeng mambuat hasangapon tu dirina, so ganda holan sangkap papatarhon hasangapon dohot hadaulaton ni Jesus Kristus, Malim na Bolon, Birubiru ni Debata na paluahon dosa ni portibi on.

BACA JUGA BAHAN JAMITA MINGGU 2 DUNG EPIPHANIAS – MINGGU, 15 JANUARI 2023

HATORANGAN

Hadirion ni si Johannes Pandidi i ma hadirion na sai tontong mamaritahon jala martudutuduhon tu Jesus na tongtong andul umbalga dohot umsangap sian dirina sandiri. Gariada tahe didok ibana “na hurang tama do ahu mangkarhari tali ni sipatu-Na” (ayat 27). Tangkas do diantusi si Johannes ulaonna, i ma holan paradehon dohot mamungka dalan di haroro ni Kristus Jesus, Mesias, Anak ni Debata. Ibana do na utama na dipaimaima jala nahinirim ni sude bangso patupa haluaon.

Di tingki manungkun natorop i tu si Johannes taringot tu ojahan manang dasar hak ni sada jolma patupa pandidion (na ibana do Elia manang Mesias na pinaimaima ni bangso i?). Mansai tangkas do dialusi si Johannes hadirionna; ndang na si Elia, ndang na Mesias (ida Jonannes 1:22-25). Sian on tangkas do tarida, konsisten do si Johannes, jujur jala barani mambahen sada sikap na so olo ibana populer di dirina sandiri alai holan martudutuduhon jala mamungka dalan hasangapon dohot hamuliaon ni Mesias, Anak ni Debata na naeng ro dungkon ni ibana. Ala ni i do tingki diida ibana Jesus ro di jolona, secara spontan dohot soara na marsaringar mandok tu angka siseanNa “on do Birubiru ni Debata, na mamorsan dosa ni portibion” (ayat 29). Johannes manuarahon dohot mangarahon sude jolma asa fokus tu Jesus, ndang tu parjamita na manuarahon Jesus.

Jesus Birubiru ni Debata na ro paluahon jala na gabe pelean na badia na sumeahon dirina bahen tobus/pasaehon dosa ni jolma manisia. Jala patar tarida anak Birubiru ni Debata, gabe pelean na badia na sumeahon hosa-Na bahen tobus ni dosa ni portibion. Diseahon do hosa-Na sian haunduhon dohot pangoloion na tama manghongkop jolma i. Jesus olo gabe pelean na mangolu sian pangoloion-Na ala ni holong-Na na mansai balga humongkop dosa ni jolma manisia. Johannes tung marsitutu situtu do mangula paradehon habobongot ni Tuhan i, laho meyakinkan sude jolma na umbege; ia Jesus Kristus, Mesias, Birubiru ni Debata na ditongos Debata bahen tobus ni dosa ni jolma. Tangkas do dihatindangkon si Johannes “huida do Tondi i tuat songon darapati sian banua ginjang jala mian di Ibana” (ayat 32). Tanda on patotahon huaso dohot hamuliaon ni Jesus Kristus na songgop sian banua ginjang. On ma na gabe partinandaan di si Johannes asa gabe patar panandaon-Na di Jesus na marharoroan sian Debata (ayat 33). Gabe tangkas ma si Johanes na mangkajongjongkon Jesus Anak ni Debata (ayat 34).

Di semangat ni si Johannes mamaritahon barita ni Jesus “on do Birubiru ni Debata” tarbege do nang i tu dua sisean ni si Johanes, gabe marhamubaon nasida, gabe mangihuthon Jesus (ayat 35-37). Haradeon ni angka sisean i marbalik gabe mangihuthon Jesus marbingkas ma i sian parsitutuon jala hapadoton ni si Johannes di na mamaritahon taringot tu Jesus. Gabe humusor roha ni nadua sisean i mangihuthon Jesus, i ma si Andreas dohot si Simon. Di pangkobasionna gabe guru, patar do tarida keteladanan na gabe guru sejati. Ndang ditahani siseanna manontong rap dohot ibana alai dipaloas ibana do sisean na i asa mananda dohot mangihuthon guru na umbalga jala um sangap sian ibana. Johannes gabe figur guru sejati na mangkalomohon sisean na (na hinaholongan ni rohana) marhamajuon jala mangeahi ngolu na dumenggan.

Kunjungi juga kanal YouTube HKI untuk mengetahui informasi seputar pelayanan HKI.

HAHONAAN

Huria di zaman nuaeng on songon parbarita na uli porlu do marsiajar sian si Johannes na komit jala konsisten mamukka dohot paradehon dalan hasangapon dohot hamuliaon ni Jesus bongot tu roha ni ganup jolma manisia di sandok portibion. Tangkas jala patar do i di turpuk ni jamitanta sadari on i ma na pabotohon, ia Jesus i ma Birubiru ni Debata manang Anak ni Debata na olo gabe pelean na badia, olo mate tarsilang humongkop dosa ni saluhut portibi on. Pangkophopion i ndang ala na terpaksa alai sian pangoloion-Na dohot ias ni roha-Na; ala ni holong-Na na mansai balga tu portibion, asa malua sude jolma i (ida Johannes 3:16).

Angka halak na porsea naeng ma tangkas marsiajar, marguru tu Jesus na rade berkorban tu donganna jolma, manang maniru si Johannes na tongtong komit jala rade mamaritahon hasintongan ni Jesus Kristus. Amin.

Penulis:
Pdt. Salome Nainggolan S.Th, MM (Kepala Departemen Koinonia HKI)

Penyunting:
Vic. Pdt. Timothy P. Saragi

BAHAN EPISTEL INI JUGA DAPAT DIUNDUH DENGAN MENG-KLIK TULISAN DI BAWAH INI
EPISTEL MINGGU 15 JANUARI 2023 – MINGGU 2 DUNG EPIPHANIAS