EVANGELIUM NATAL II – 26 DESEMBER 2023

Psalmen 96:1-13

JAHOWA DO RAJA

1. Patujolo

Sahalak raja na manguluhon bangsona marhite habisuhon dohot roha na pantas manghorhon las ni roha di bangsona. Hatiha na mangadopi hasusaan bangsona, sai na ro do pangurupion sian raja i ala tung mansai holong do rohana tu bangsona. Marhaserepon do ibana, ido umbahen lam tamba las ni roha di bangsona. Godang pe angka persoalan manang parungkilon ni angka bangsona, ndang adong naso boi diselesaihon ibana, sai adong do jalan keluar manang solusi sian raja i. Sangap do raja i di adopan ni bangsona jala sai unduk do bangsona di angka aturan na binahen ni raja i. Marlas ni roha do bangso i jala mangolu di bagasan hadameon.

Di pesta Natal paduahon on sahat ma barita nauli sian Psalmen 96:1-13 dohot tema “Jahowa do Raja”. Jahowa do Raja na gok huaso jala dibagasan habonaron dohot holong. Beha, marlas ni roha do manisia na gabe bangso na diuluhon Raja i? Antong tapaihutihut ma hatorangan ni turpuk on.

1. Hatorangan Ni Turpuk

Buku Psalmen marisihon ende pujipujian sian raja David (parpsalmen) ala naung dirajumi ibana pandonganion ni Jahowa dohot pasupasu-Na di pardalanan ni ngoluna. Tarpillit si David gabe raja, ala Jahowa do na mamillit ibana. Mandok mauliate do raja David tu Tuhan i di saluhutna, dipasahat ma i marhite ende pujipujian hasangapon di Tuhan Jahowa. Ala naung parjolo ibana mangarajumi pambahenan ni Jahowa di ngoluna, umbahen diarahon ibana ma bangso Israel laho mamuji dohot pasangaphon Jahowa marhite ende pujipujian. Parpsalmen gabe sada sosok teladan tu angka na porsea laho mamuji dohot pasangaphon Tuhan i.

Disoarahon si David do tu bangso Israel asa mangendehon sada ende na imbaru tu Tuhan Jahowa jala ingkon sude do mangendehon hasangapon-Na i. Molo didok ende na imbaru ima na marlapatan naeng lehonon ni tano on na dumenggan tu Jahowa. Isi sian ende na imbaru i ima na mandok Jahowa do Raja. Ende na imbaru ima ende na ruar sian bagasan roha na imbaru, ima angka naung mangolu di bagasan haimbaruon ni Jahowa. Ndang habilangan pasupasu dohot pambahenan ni Jahowa di sandok tano on, ende pujian na imbaru gabe sada cara laho mandok mauliate tu Tuhan Jahowa molo tung pe ende na imbaru i ndang sebanding dohot pambahenan-Na i.

Mangendehon ende na imbaru tu Tuhan Jahowa jala mamuji Goar-Na huhut mamaritahon hatuaonNa ganup ari, ima na naeng siulahonon ni angka jolma manisia. Dang dipangido Tuhan i asa digarar pambahenan-Na marhite arta manang sinamot na adong di portibi on, alai holan marhite mandok mauliate do tu Ibana huhut mamaritahon hatuaon-Na i. Raja David naeng mangarahon bangso Israel asa dohot marpanindangion taringot hatuaon ni Jahowa, jala didok di turpuk on ndada holan tu bangso i sandiri nasida mamaritahon hatuaon ni Jahowa alai dohot do tu bangso parbegu asa marsomba bangso i tu Tuhan Jahowa, na marlapatan doi asa lam torop angka na porsea di Tuhan i jala mangolu di bagasan lomo ni roha-Na. Na songkal do Jahowa mangatasi sude angka debata. Molo tung godang pe angka debata sileban di tano on, alai ndang adong na boi disejajarhon tu Tuhan Jahowa na sangap i ala Ibana do nampunasa luhutna huhut na manjadihon angka langit jala marhuaso di saluhutna, ido umbahen tama situtu do Ibana pujion jala pujion i dipasahat ma sian ias ni roha.

Jahowa do raja. Saluhut bangso ditogihon laho mamuji Tuhan Jahowa jala mangendehon ende pujipujian na imbaru. Songon sahalak raja na sangap di adopan ni angka natorop, songoni ma digombarhon hadirion ni Jahowa na marmulia i. Parpsalmen manogihon asa marsomba tu Tuhan Jahowa marhite pahean na marhadohoan. Marsomba tu Jahowa na marlapatan ma i paunduk roha nang ngolu laho marsomba tu Ibana. Porlu do pasangaphon Jahowa marhite na marsomba tu Ibana, ndada holan hata sambing na dipasahat. Marsomba tu Jahowa ndada diulahon songon rutinitas sambing, alai ingkon hibul do sian roha na ias jala marsomba dibagasan tondi dohot hasintongan (pat. Joh. 4:24). Marsomba tu Jahowa di bagasan tondi boi diulahon angka na porsea jala naung mangolu di bagasan haimbaruon.

Jahowa do Raja di bangsoNa, Raja na mangatasi angka raja, Raja na manguhum di bagasan hatigoran. Ganup jolma naeng ma hatigoran na masa di ngoluna. Di halak Kristen, hatigoran i ima hatigoran na marharoroan sian Jahowa. Sai dipuji parpsalmen on do huaso dohot pambahenan ni Jahowa. Tarjou do angka na porsea laho mangihuthon hatigoran ni Jahowa. Di bagasan ende pujipujian on, dipasahat parpsalmen do naso paloason ni Jahowa angka parjahat laho manggugai bangso-Na, lumobi ma tingki dibagasan hagaleon bangso i. Sian on boi do tandaon ia hatigoran ni Jahowa gabe pangondingan di angka na gale dohot na dangol.

Jahowa do Raja. Marhite huaso dohot hasangapon-Na i, tuat do Raja i tu portibion gabe jolma, ima Jesus Kristus. Raja na ro mamboan holong ni Debata tu portibion, mamboan haimbaruon tu jolma, mamboan haluaon dohot hadameon. Haroro Jesus Kristus, Raja jala Sipalua i, Harajaon-Na hot do saleleng ni lelengna, ndang songon harajaon na di portibion na holan parsatongkinan. Nunga ro Ibana marhite na sorang di Betlehem, Raja na serep marroha na mamboan hangoluan tu saluhutna manisia manang ise na porsea tu Ibana. Marhite pangungkapon na sahat tu si Daniel, dung talu nasa huaso portibi ro ma sahalak songon anak ni jolma, jala dilehon ma tu Ibana pamarentaon dohot hamuliaon. “Dungi huida muse di bagasan angka pangungkapon borngin, gabe ida ma, ro sahalak marhitehite ombun di langit i, songon anak ni jolma, jala sahat ibana tu Ibana naso suda ari-Na, jala tarboan ibana tu jolo-Na. Jala dibasabasahon ma tu ibana pamarentaon dohot hamuliaon dohot harajaon, jala saluhut bangso, houm dohot halak parpanghuling marragamragam marsomba tu ibana. Ro di saleleng ni lelengna do pamarentaonna, naso tupa munsat sian ibana, harajaonna pe naso tupa pesan do” (Daniel 7:13-14). Ende pujian ni parpsalmen patoguhon haporseaonna taringot ise Jahowa di ngoluna. Jahowa do Raja, nunga marpahean hamuliaon Ibana, marpahean tongon Jahowa, nunga dihohoshon hagogoon : jadi hot ma portibion, ndang tagamon humuntal. Hot do Habangsa-Na sian na robi, sian saleleng ni lelengna (pat. Psalmen 93:1-2).

Kristus do Raja. Porsea do hita tu Jesus Kristus na gabe Raja, Tuhan, dohot Sipalua. Hata ni Debata sian Joh.18:37 didok: “Dung i ninna si Latus ma mandok Ibana : Asa raja do ho? Jadi ninna Jesus ma mangalusi: Songon nanidok mi ma tutu. Raja do ahu. Umbahen na tubu Ahu jala umbahen na ro Ahu tu portibion, asa Huhantindanghon hasintongan i. Ganup na sian hasintongan i tangihonon ni i do soarang-Ku” (Joh. 18:37). Jesus Kristus na ro i, na tapestahon di Natal paduahon on, Ibana do Raja na bonar jala marhasangapon. Saluhutna angka na porsea ingkon mamuji dohot pasangaphon Ibana ala ni denggan ni basa-Na dohot pambahenan-Na na songkal i. Ndang adong alasan ni angka na porsea ndang mandok mauliate di saluhut pasupasu ni Jahowa lumobi ma di haluaon na binoan ni Jesus Kristus na ro tu portibion. Ibana do Raja jala na patut sipujion, antong endehon ma ende pujipujian na imbaru i tu Ibana jala marsomba ma tu Rajanta i, gok huaso dohot hasangapon do Ibana ro di saleleng ni lelengna.

1. Sipahusorhusoron

Di masa Natal on, nunga dipaboahon tu hita saluhutna ia Raja na Bonar jala Sipalua i nunga ro marhite Jesus Kristus, jala haroroNa mamboan haluaon tu sandok tano on. Ibana ma Raja Hadameon i, na gok holong jala na Badia. Jahowa do Raja, mangatasi angka raja-raja na adong di tano on. Turpuk on manogihon hita asa marsihohot marsomba tu Jahowa jala mamuji Goar-Na. Pamujianta tu Ibana ndada holan di masa Natal on, alai hot ma i saleleng mangolu hita di hasiangan on. Mamuji Ibana di saluhut angka pasupasu-Na naung sahat tu hita, ima na gabe responta tu Ibana.

Marhite turpuk on, ditogihon do hita laho marbarita nauli tu saluhut bangso asa lam torop bilangan ni angka na porsea jala masuk tu harajaon ni Debata. Torop dope naso mananda jala dang porsea tu Tuhanta i marhite Jesus Kristus, asa gabe turgasta ma i angka na porsea laho marbarita nauli. Manghatindanghon Tuhan Jahowa di saluhut pambahenan-Na i marhite ende pujipujian na tapasahat tu Ibana.

Pesta Natal on laho manogihon hita ndada holan mamestahon hatutubu ni Jesus Kristus marribu taon naung salpu, alai ingkon marpanatap do hita tu jolo, ia angka na porsea ingkon ma lam togu haporseaonna, lam jonok tu Tuhan i, jala ndang lupa marsomba tu Ibana, Raja na Bonar i. Hot ma haporseaon ni angka na porsea i sahat tu ujung ni parngoluan ala adong do panghiriman ni angka na porsea ima hangoluan na saleleng ni lelengna na dilehon Raja na gok huaso i di tingki ro Ibana (Jesus Kristus) padua halihon tu portibion. Antong, tongtong ma tapasahat pamujionta tu Ibana jala unduk hita maradophon Jahowa, Rajanta i. Amen.

Pdt. R.A.S Simatupang, S. Th