MANGALO HAJAHATON MARHITEHITE NADENGGAN-OLEH PDT. HOPOL M. SIHOMBING, S.TH-EPISTEL MINGGU SEXAGESIMA-MINGGU, 20 FEBRUARI 2022

Epistel Minggu Sexagesima
Minggu, 20 Februari 2022
“Mangalo Hajahaton Marhitehite Nadenggan”
1 Musa 45:3-16

PATUJOLO

Ganjang do barita taringot tu si Josep on mulai sian hatutubuna sahat tu ujung ni ngoluna, pola disurat di Bibel. Gari dohot holi (saring-saringna) pe dohot do disurat di buku Musa. Secara khusus, taringot tu parjumpangan nasida; si Josep dohot angka hahaanggina, ndang gabe kesempatan balas dendam dibahen si Josep maradophon hahana. Nangpe naung godang nahansit ditaon si Josep ala pangalaho najahat ni angka hahana i, dihasogoi, di dabu tu sumur jala di gadis tu halak Midian. Sian halak Midian ma digadis muse tu si Potifar (Mesir) naposo ni Firaun. Tarhurung alani hata gabus ni ripe ni si Potifar, alai gabe manuturi nipi di hurungan i, dohot nipi ni Firaun. Dipabangkit ma ibana muse gabe panggomgomi ditoru ni Firaun di Mesir. Alai dirajumi rohana do, saluhutna i diboto Debata jala tarpatupa Debata do nadenggan di bariba (balik) ni i gabe haluaon dohot hangoluan ni bangso na bolon.
Dinaro hahaanggina mangulahi manuhor (margalas) sipanganon tu Mesir hombar tu parsuru ni amongna si Jakkob, dohot do si Benjamin ala songoni diparenta si Josep. Dilehon si Josep do godang gandum, jala dipaulak dohot hepengna di goni na be. Alai ditahi roha ni si Josep ma ingkon tinggal anggina si Benjamin disi, gabe dibahen ma sada cara; disuru ma naposona mameakkon panginuman ni raja i tu panuhuhan (karung) ni siampudan ima si Benjamin. Ido dalanna gabe tardapot si Benjamin jala ingkon tading di Mesir. Alai dielek si Juda (Jehuda) ma si Josep asa unang tading di Mesir, jala dipatorang taringot tu amongna. Ai molo tading ibana, maon mate amongna ala susa mamingkiri si Benjamin. Dipatorang ma dohot taringot tu inongna naung mate uju manubuhon si Benjamin, jala haha ni si Benjamin naung mago jala dianggap mate diallang babiat, (hape si Josep do haha ni si Benjamin nanidokna i). Umbege saluhutna i, ndang tartaon si Josep be lungun dohot siholna, gabe dipatandahon ma dirina tu angka hahana dohot anggina i.

HATORANGAN

Masihol si Josep tu hahana na mambahen na roa tu dirina.

Hea do hamu masihol tu halak namambahen naroa manang tu jolma namambahen hancit rohamuna? Ra jarang do i masa, najumotjot justru unang ma nian pajumpa tu halak na hea mambahen hancit rohaniba apalagi namambahen najahat, unang nian rap sahundulan. Alai ianggo si Josep, di na ro angka hahaanggina tu Mesir di masa ni haleon na paduataonhon (tahun kedua masa kelaparan), jala nunga leleng nasida naso pajumpang i, ndang tartaon rohana be ala ni siholna. Masihol situtu ibana naeng manghaol, angka hahaanggina i, nang pe hea dibahen angka hahana i na roa tu ibana, nang pe hea didabu ibana tu sumur, jala digadis tu halak Midian. Tajaha do i di ayat 1; “Jadi ndang tartaon si Josep be sihol ni rohana maradophon sude angka na jongjong di lambungna, gabe dijouhon ma: Paruar hamu ma sude halak sian lambungkon! Jadi ndang adong manang ise na jongjong di lambungna, di na pinatandahon ni si Josep ibana tu angka hahana i.

Mardongan tangis si Josep papuas siholna jala dihaol nasida sude huhut didok; “Ahu do si Josep, anggimuna, na ginadismuna i tu tano Misir (:4). Ndang ditanda angka haha nai be si Josep, apalagi nunga lam uli rupa ni si Josep, paheanna pe nunga gabe pahean ni harajaon ni Mesir. Jala ndang lao rohanasida si Josep do i, tarlumobi ala panggomgomi ibana di Mesir. Alai ianggo si Josep tangkas do ditanda nasida saluhutna, jala disungkun dope barita ni amongna. On ma halobian ni si Josep, dihasiholi dope angka hahana nang pe hea dibahen tu ibana na so denggan.

Unang Mabiar Hamu, Nadenggan do Patupaonku. (ayt. 5)

Mabiar do angka haha ni si Josep dung dipatandahon dirina tu nasida. Ai diingot nasida do antong pangalahona tu anggina i, angka na roa nahinan. Laho tu roha nasida, uhumonna ma nasida jala hurungkononna, jala balas dendam. Hape ndada songoni roha ni si Josep naung dapotan pasu-pasu dohot hasangapon i, alai on do didok ibana tu angka hahaanggina i; “On pe, unang mabiar hamu, jala unang serbeng matamuna (menyesali), ala ginadismuna i ahu tuson, ai mangarade hangoluanmuna, umbahen disuru Debata ahu parjolomuna. Ai padua taon on dope masa haleon di tano on, alai lima taonnari dope na so masa saburon manang gotilon.” (1 Musa :5-6)

Saluhut namasa dohot nahansit naung hea nihilala ni si Josep sian angka pangalaho ni hahana uju i, dirajumi roha dohot haporseaonna, saluhutna i sian sangkap dohot huaso ni Tuhan do i jala Debata do namarsuru Ibana parjoloan nasida saluhutna asa mangarade hangoluan tu nasida gabe bahen bangso nabolon. Ido umbahen ndang tu hansit ni roha diboan ibana. Alani i, ndang diulahon si Josep na so patut manang balas dendam tu angka hahana i nang pe adong kesempatan dohot huaso mamalos dendam. Balik tahe, gabe dijou si Josep do angka hahana jomonok tu ibana jala dihaoli mardongan tangis pola diumma sude hahana i. Ido hape asa boi tarula nadenggan tu namambahen na jahat tu iba, ingkon rajuman jala boanon do saluhutna i di bagasan huaso ni Debata bahen angka nauli di ujungna.

Debata do Patujolo jala Napabangkit si Josep asa Ibana Mambahen Nadenggan

Marragam do dibolus angka jolma napinatujolo i manang angka nasukses i. Sipata berliku jala hansit ditaon asa sahat tu ulaon nabolon i. Alai nang pe songoni, gabe dapot pangantusion do hita sian jamita on, ia dia pe ulaon (tugas) ni angka jolma naung pinatujolo manang pinillit ni Jahowa; tujuanna asa patupahon nadenggan na uli do. Jotjot do ndang sodar torop jolma dipamilliton ni Jahowa, gabe tu hasangapon ni dirina jala dipakke huaso i dohot tu ginjang ni roha (angkuh). Alai si Josep didok ibana, Jahowa do napatujolo ibana sian angka hahana tu Mesir asa mambahen nadenggan jala haluaon ni bangso nabolon di masa ni haleon 7 taon.

Nian maol do antusan ianggo di mulana i, ai hajahaton do i nietong angka nabinahen ni hahana i tu si Josep. Hape dunghon ni i gabe binoto ma muse paboa dalan ni Debata do i patujolohon si Josep asa ibana mambuka dalan parade sipanganon dohot haluaon nasida, ala naeng masa ma haleon 7 taon. Jala bahenonna ma angka nadenggan tu hahaanggina. Di saluhutna i, ndada holan Mesir taruli, alai dohot do bangso ni Debata sian pomparan ni si Jakob ima Israel.

Taruli Pasupasu di Masa ni Haleon Sude Pomparan ni si Jakkob, Ala Denggan ni si Josep.

Si Benjamin anggi ni si Josep dohot do rap dohot hahana manopot si Josep, jala dihaol si Josep ma anggina i ala ni siholna pola tangis nasida. Dungkon ni i, manghata-hatai ma nasida tung kompak pasombu siholna be. Disungkun ma dohot barita ni amongna, jala dipangido asa boi nasida ro tu Mesir, jala maringan di Mesir di huta Gosyen. Nunga 2 taon masa ni haleon alai masa do pe i 5 taon nai. Lam posi do parniahapan ni saluhut jolma dohot dorbia di 5 taon i, alai ianggo di Mesir dohot di keluarga ni si Josep dohot angka hahaanggina, nang amongna ndang apala hasusaan be masa ni haleon i. Ai taruli pasu-pasu angka ulaon nadenggan do nasida marhite sian si Josep. Jala diboto Firaun do i huhut ditolopi.
Ima denggan ni roha ni si Josep maradophon hahaanggina dohot sude keluargana, atik pe angka hahana i hea mambahen hancit ni rohana. Antong, marhite angka ulaon nadenggan ma tutu tataluhon angka hajahaton i.

HAHONAAN

a. Siapata jumpa do angka parulaon nahumurang di angka namarhahamaranggi, namarbadai, marsihancitan roha, alai nangpe songoni ingkon olo ma hita masimaaf-maafan asa tung jumpang nauli dohot haluaon sian angka hamaolon.
b. Unang pola sai tasangkapi balas dendam tu angka namangulahon hajahaton manang namambahen hancit rohanta. Alai sai tasangkapi ma angka ulaon nadenggan siulahononhon, ai marhite ulaon nadenggan do tartaluhon hita ulaon najahat i.
c. Debata mangaturhon saluhut angka namasa di ngolu ni naporsea di portibi on. Nang pe sipata suhar do tu pikkiran dohot panghilalaan, alai boi do tarpatupa Debata i gabe tu na denggan.
d. Sai adong jolma dipatujolo jala dipillit Debata, gabe ula-ulana laho patupahon angka ulaon nadenggan dohot angka las ni roha ni torop jolma. Amen.

Penulis:
Pdt. Hopol M. Sihombing, STh
(HKI Resort Khusus Teladan)

Penyunting:
Yohanes Simatupang