Minggu III Dung Epiphanias, Tanggal, 22 Januari 2017

Nats Evangelium: Mateus 4:18-25

“BETA, IHUTHON MA AHU”

1. Huria ni Tuhanta Jesus Kristus! Turpukon patubegehon panjouon ni Jesus di siseanNa naparjolo, ima si-Simon Petrus, si-Andreas, si-Jakobus dohot si-Johannes. Dijou nasida sian “Sijala Dengke” gabe “Sijala Jolma”. Mangihuthon Si Josephus (ahli sejarah Jahudi) jala mantan Gubernur di Galilea, didok ia Tao Galilea ima tao inganan ni dengke dohot pardengke (Bdk. Kampung Nelayan). Godang disi dengke jala dengke do na gabe makanan pokok ditingki i. Sandok tarbarita do huta na ditopi Tao Galilea kota industri ikan. Tarsongon Tanjung Balai mai molo di Sumatera Utara. Ditopi Tao Galilea, adong do huta namargoar BETSAIDA (lapatanna: Jabu Dengke), adong muse huta TARIKHAEA (lapatanna: Jabu ikan asin). Sian huta na ditopi Galilea on do ninna dieksport dengke tu Jerusalem dohot tu Roma di tingki i.
2. Ro Jesus mardalani tu topi Tao Galilea (ro Jesus tu inganan pardengkean i), lapatanna: ro Jesus tu inganan parkarejoan ni Si Petrus, Si Andreas, Si Jakobus dohot Si Johannes). Jemput bola, ndang tunggu bola, lapatanna: ro Jesus tu parkarejoanta, ro Jesus tu bagasta, ro Jesus tu kantorta, ro Jesus tu balinanta/ladangta, ro Jesus tu inganan partigatigaanta. Dijou hita mangihuthon ibana asa marhite inganan parkarejoanta i pangkeon ni Jesus gabe inganan parjamitaanNa. Asa marhite ulaonta siganup ari tapatandahon sintong do Jesus i parholong.
3. Huria ni Tuhanta, nahinaholongan dibagasan goar ni Jesus Kristus! Haroro ni Jesus mandapothon pardengke na diturpuk on mangalehon pemahaman na imbaru di hita taringot tu rumangni panjouonNa di hita. Panjouonna di hita gabe siseanNa ndang marlapatan ingkon sude hita mamelehon diri gabe Pandita manang parhalado. Alai secara umum, na dijou do hita marhite pangulaonta (parkarejoanta) siganupari mamaritahon Jesus. Lapatanna, molo pangulaula (partani) hita, tapangke hapartanionta i gabe langgatan parjamitaan mamaritahon Jesus. Molo partigatiga hita, tapangke hapartigatigaonta i mamaritahon Jesus. Molo PNS manang Karyawan Swasta hita, tapangke hapegawaionta i mamaritahon Jesus Sipalua i. Sandok parngoluanta siganup ari gabe jamita na mangolu tu nahumaliang hita,ido na ginoaranna “Jemaat na missioner”
4. Namangihut taida diturpuk on, ia angka na jinouna i gabe siseanNa, ima angka jolma na biasa, na lea, ndang parsingkola na timbo (partitel), ndang jolma na terpandang (nasangap), ndang paradongan manang parhuaso. Pardengkedengke do nasida. Jolma na so pola dianturehon ala so adong sipangasahonna sian dirina. Hape angka nasida do dijou, dipilit jala dipangke Tuhan i laho mangula ulaon ni Debata na Sangap i. Dijou Jesus na so mardihadiha i, asa unang adong sipangasahonna mangihuthon Jesus.
5. Hamu angka dongan, na jotjot masa diportibion, molo pogos sada halak, ndang mardihadiha tung soadong do naparduli tusi. Jotjot do ndang parduli halak dipenderitaan ni jolma na pogos jala na lea. Isarana: tenaga kerja indonesia (TKI) di Arab Saudi dohot di Malaysia, torop na disiksa majikanna, alai ndang adong na parduli disi. Hape, ala disiksa polisi Malaysia do na di bulan September taon 2007 i wasit ni Indonesia, ima si Donald Piter Luther Kolopite, pintor gaor sude lapisan masyarakat Indonesia, DPR, Pamarenta dohot masyarakat. Asing sian i do Tuhanta Jesus, peduli do Ibana tu napogos, dijou do siseanNa naso pinardulihon ni portibion. Ala ni i molo taparhatopot hita na pogos, na so mardihadiha, boto ma dihaholongi Jesus do ho, jala dohot do ho di jou Jesus gabe siseanNa.
6. Didok: “Ihuthon ma Ahu”, ninna Jesus mandok si-Simon Petrus, si-Andreas, si-Jakobus dohot si-Johannes. Dijou Jesus siseanNa na opat (halak) i mangihuthon Ibana sian pudi. Hasomalan ni jolma do di Timur-Tengah mangihuthon manang mardalan sian pudi ni guruna. Sahalak sisean/murid ingkon mardalan dipudi ni guruna, ndang boi sejajar pardalanna. Molo dihalak Israel, ndang tama sisean mardalan di jolo manang disiamun dohot dihambirang ni guruna. Dipangantusion ni halak Israel (dipadanNarobi), mangihuthon sada halak marlapatan doi: mangoloi/manghaholongi manang maneahon diri tu na ni ihuthon i. Songon si Elisa na mangihuthon si Elia (1 Raja raja 19:20), manang songon si Rut na mangihuthon si-Naomi (Rut 1:14).
7. Nahinaholongan ruas ni huria ni Tuhan Jesus! Molo ni ihuthon sada halak, dipauba i do ngolu niba, ido somalna. Manang boidohonon marpanghorhan do tu ngolu niba ngolu ni na niihuthon. Molo ni ihuthon na jahat, diela ido iba gabe jahat. Molo ni ihuthon na burju, diarahon ido iba gabe burju. Songon ima dipangido sian angka na mangihut Jesus i. Alana alo do tu roha, molo mardalan sada halak di pudi ni Jesus hape parngoluonna dos dohot parngoluon andorang so diihuthon Jesus (ima: parbada, panangko, pangalangkup, pamunu, parhosom, pamolamola). Alai mangihut Jesus/mardalan di pudi ni Jesus ingkon do marhamubaon (sian pangalo gabe pangoloi, sian parhosom gabe parholong, sian siginjang roha gabe na serep roha, sian sioloi begu gabe sioloi Jesus, sian parbada gabe pardame).
8. Targoar hita Kristen (siihuthon Kristus), hape toropnai sian halak Kristen na so mardalan mangihuthon Jesus. Torop na manabunihon haporseaonna, ala mabiar di jabatan, dipangkat dohot di arta portibion. Angka dongan, boi do maol pardalanan mangihuthon Jesus. Boi do godang parungkilon ni na manghaporseai dohot na mangihuthon Jesus, alai taingot ma, ndang loasanNa hita mardalan so mardongan (“Ai ida ma, sai na dongananku do hamu ganup ari, rasira saro ajal ni hasiangan on”, Mateus 28:206). DongananNa do hita, urupanNa do hita mangihut Ibana. Alani i, taihuthon ma ibana sian pudi. Amen

Kadep Marturia HKI

Pdt J. Simanjuntak, MTh, MM