PSALMEN 97:1-12

“Sosososo tu sandok portibion asa mamuji Jahowa do Raja”

Syalom !

Hamu angka dongan na hinaholongan dibagasan goar ni Jesus Kristus. Exaudi, i ma goar ni minggunta sadarion, na marlapatan “Tangihon ma Ahu”. Sada tangiang pangidoan ni angka na mangharingkothon asi ni roha ni Debata asa tung ditangihon p[angidoanna. Asa tung dialusi Debata joujouna. Songon na nidok ni hata ni Debata : Sai tangihon ma soarangki ale Jahowa molo joujou ahu, asi ma rohaM mida ahu jala alusi ahu. Tung mansai sonang jala las situtu do rohanta molo tongtong Debata rade tumangihon soaranta. Alai asa tangkas na marexaudi ingkon tongtong do rade hita manangihon soara ni Debata jala tongtong tapuji Ibana, di na tongtong do Debata rade tumangihon angka na niasianNa.

Laos hombar tusi do nang na pinasahat ni turpukta on : disosoi do hita rap dohot sandok portibion asa mamuji Debata, ala Jahowa do Raja na manggomgom saluhut portibion. Jahowa do Raja na mangarajai hita dibagasan huaso, holong dohot asi ni roha. Jahowa do Raja na tongtong paihutihuthon hita na tinompaNa asa tung marhasonangan jala marolopolop ngolunta.

Harajaon ni Debata manghukhupi sandok tano on, jala ingkon sahat  tu sandok angka pulopulo mangida, mananda dohot manghangoluhon harajaon ni Debata. Ombun jala holom namarimpotimpot api dohot sillam na jotjot boi gabe musu dohot sihabiaran ni hita jolma alai aggo di Debata gabe angka jadijadianNa diparhuasoi do i manghutur portibion. Angka dolokdolok ni hatimboan ni portibi on marhuaso do Debata mangalala songon pantis na malala (lili yang meleleh) dung manahan jonjong manadophon bohi ni Debata. Ai marhuaso do Debata dibagasan i saluhutna, ala Ibana do na manompa. Hiorhon ni i, laos gabe dohot ma muse angka langit mamaritahon habalgaon ni Debata, jala sude bangso marnida hamuliaon ni Debata, ala Ibana do sitiop huaso na tutu na so martingki jala na so marombas alai na hot na manongtong ro di saleleng ni lelengna.

Dang adong na tarpangasahon hita di adopan ni Debata na marhuaso i baliksa tahe ingkon unduk do hita jala serep rohanta asa tongtong margogo hita mangolu. Anggo angka si ginjang roha dohot na patimbotimbohon dirina tung so manahan do jongjong di adopan ni Debata.

Harajaon ni Debata marojahan di hatigoran dohot uhum. Dipatuduhon do tangkas na so taradop i jala na so tarpamenet portibion harajaonNa i, dang manahan portibion maradophon habadiaon ni harajaon ni Debata.anduk do marasing sian hasitongan dohot uhum ni jolma. Anggo hasintongan dohot uhum ni hajolmaon jotjot do di pasamak jala dihukhupi. Boi do na tigor i gabe dipabengkok, na bengkok i gabe dipatigor. Jotjot haporusan na dapot hombar tu hagiat ni jolma, lumobi ma angka na merasa dirina na gogo jala na sangap. Alai anggo hatigoran i, hasintongan i Debata tongtong do hot jala dang marubauba songon perubahan jaman on. Asa unang pala ganggu rohanta manang mabiar hita molo tung pe sipata tahilala dang jumpang uhum dohot hatigoran marhite angka na masa di portibi on. Ai ditingkina papataron ni Debata do dia uhum na sasintongna jala dia do hatigoran na sasintong na.

Hamuna angka dongan na hinaholongan dibagasan Yesus Kristus! Na mangihut muse taida di bagasan turpuk on dasor laho mamuji Debata ima : haurahon ni si somba ajiajian dohot halalas ni roha ni bangso ni Debata na manontongi. Tangkas do taida na jotjot do diela portibion torop jolma asa ganggu rohanta manghaporseai hagogoon ni Debata, gabe marbalik marsomba tu debata sileban, sumomba ajiajian na dihilala gumugo jala hatop mangalehon na pinarsinta ni rohana. Boi jumpang do haporseaon na songon i sian tongatonga ni bagas ni Debata nang sian huria ni Tuhanta di partingkian on. Songon Israel naung tangkas diida mata nasida, angka hahologan na pinatupa ni Debata, alai laos tung mura do muse nasida manimbil manghaporseai angka Debata sileban laos mangido pangurupion sian i. Suang songon i do nang dipartingkian nuaeng on tongtog dope torop nang sian tongatonga ni hita halak Kristen na mandok Yesus Kristus do huihuthon ham. Alai anggo dipraktekna torop dope hita dang segansegan mangulput tu hadatuon. Umbiaran tu debata jaman, mabiar keyinggalan jaman, mangalului ajimat, ilmu pelaris, dohot angka lan na asing. Boi do songon na sonang pangkilalaan, sai songon na taralus pangidoanta alai dang maniula jala dang manghorhon ketenangan na sasintongna hita disi. Marhite turpuk on dipaingot do hita tangkas paboa angka ulaon na so marlapatan do diulahon halak angka na manomba debata ajiajian i, angka na papujipuji dirina mida ganaganaon, ingkon marsomba tu Ibana sogot angka debata sileban.

Sai na loja jala maila do ujung ni halak angka na sai mardebata sileban. Ala dang disi jaminan pangurupion na sintong jala dang disi jaminan hasonangan. Jala dang marnosan nanggo sada sian angka i di adopan ni Jahowa. Alai anggo Debata dang hea muba i di angka bagabagaNa atik pe so pintor jalojalo dipatuduhon aha na tapangido. Sai tongtong do Debata mangigil sian hita asa manongtong manghaporseai so pala ganggu. Pangurupion ni Debata tepat do di tingkina lehononNa hombar tu na binuhulna. Ingkon pos do rohanta na sai tongtong do di dongani Debata hita, ditongos do pangurupion na dumenggan sian natapingkiri. Sotung mura hita manimbil manghaporseai angka hagogoon ni portibi na mambahen gabe marlaok haporseaonta. Sotung mura hita manuba ganaganaan ni jaman on. Anggo halak na porsea, ingkon tangkas do marningot na holan Jahowa sambig do na patut sisombaon jala sihatindanghononhon do goarna i. Ai tumimbul situtu do sian asa debata sileban. Ingkon umpos do rohanta tu Debata dohot hagogoonNa i sian nasa na adong. Margogo ma hita manghaholongi Debata sian nasa roha, ateate dohot gogonta.

Manghaholongi Debata tangkas ma tapatuduhon marhite na paholong dirinta sian nasa ulaon na marlaok hasipelebeguon.jorbut do uhum ni Debata muse tu angka halak na manghalomohon tu debata sileban, ajiajian disihabunian pe. Ai ang pe ingkon sai songon na marungkil hita di ngolu on laho mempertahanhon hasatiaonta tu Tuhan i, alai sai marbue tu las ni roha, sonang ni roha dohot ketenangan do ujung ni halak na songon i. Ala Jahowa do Raja, Ibana na manontong, na tigor jala sintong do angka uhumNa. Marlas ni roha angka na marnampuna Debata sisongon i, jala gok pujipujian tu Debata nasa ngoluna. Amen.

Pdt. Noderia Manalu, S.Th