JAMITA DI MINGGU TAON BARU ARI 1 JANUARI 2017

(JESAYA 63 : 7 – 9)

 MANGHATINDANGHON HOLONG SATIA NI TUHAN I

Huria ni Tuhanta, Ruas dohot Parhalado nahinaholongan dibagasan Kristus Jesus !

Parjolo ma hupasahat hami sian Pucuk Pimpinan ni Huria Kristen Indonesia (HKI) dohot sian sude Parhobas di Kantor Pusat HKI : “SELAMAT HARI NATAL 25 Desember 2016 dan SELAMAT TAHUN BARU 01 Januari 2017” tu sude Parhobas dohot ruas ni hurianta.

Songon jolma biasa, satolop do hita paboa mansai ringkot do hasation i. Talului jala tarparsinta do dongan saripe na satia, aleale na satia, parhobas na satia dohot angka na asing dope. Alai tasulingkit ma jolo dirinta paboa jotjot dope hasatiaon i taharingkothon saleleng mamboan paruntungan tu dirinta. Jotjot do tarparsinta asa satia donganta, alai hita sandiri belum tentu satia tu donganta lumobi ala tapingkiri ndang paro paruntungan tu hita.

Rata dope diparningotanta ari parningotan di hatutubu ni Tuhanta Jesus Kristus, Anak ni Debata naung gabe jolma. Barita taringot tu hajahaton ni jolma dohot balga ni holong ni roha ni Debata napinapatarNa dibagasan Jesus Kristus. Raja Herodes na marhuaso hatiha i tarrimas ala dihilala rohana ndang satia Parroha sian Purba, di rohana nungga ditipu ibana, mambahen tarancam huaso harajaonna ala hatutubu ni Sipalua i, ima mambahen tarrimas ibana, ndang adong tudosanna. Diparentahon si Herodes ma tentarana laho mamunu sude dakdanak na marumur dua taon tu toru di Huta Betlehem dohot na humaliangsa (Mateus 2 : 12, 16). Nunga di surathon hian i paboa Raja Herodes ima sada raja na mansai kejam jala raja na jumahat. Manang ise na naeng manggugai huasona dohot harajaonna ingkon disiaphon.

Suman tusi do namasa naniadopan ni panurirang Jesaya, uju manurirangi ibana taringot tu padan ni Debata marhitehite nanaeng ro ma Mesias anak ni Debata. Tung mansai jahat do parniulaaan ni bangso Israel ujui, isara ni korupsi, masiangkalan, masilatean, sahat tu na masibunuan. Borhat pe nasida tu Bagas Joro ni Debata holan sipaula nama i. Ndang mabiar be nasida mansoadahon Tuhan i. Alai atik pe songon i hatangkangon ni bangso i, tongtong do dipataridahon manang dipasahat Tuhan i padan holong ni rohaNa i. Di ombas na songon i do Tuhan i ro manopot nasida, paluahon nasida, manobus nasida . Pinuji ma Tuhan Jahowa Debatantai ala asi dohot holong ni rohaNa na so dung hea mansohot sahat ro di salelenglelengna.

Suang songon i do na tabolus dohot na masa naung taadopi di na sataon bolon on, marragam jala marsorin-sorin na masa jala taadopi saleleng  taon 2016 na salpu. Nahansit hinorhon ni hapogoson, haotoon, ala na so margira tudia, hahisapon ni pamatang, Korupsi, Pembunuhan, Narkoba, Pemerkosaan, Exploitasi, Penjualan anak, Parsahithon na mamboan hita talpe tu hamatean, rugi di usaha (tumpur), adong na hona PHK, ndang dapot parkarejoan, dohot angka lan na asing dope na so hagoaran hita marsadasada. Songon sungkun-sungkun ni bangso Israel i na so adong do asi dohot holong ni roha ni Tuhan i, manang na holan hata do i ? Sude namasa on mamboan hita unang satia tu Tuhanta i. Mandok: “Lulululu do rohangki, didia do Debatangki, boasa tung pasombuonMu au, boasa tung tadingkononMu au ? Maoto di sitaonon i”, gabe sai songon na mago hamuliaon ni Tuhanta sian ngoluna dohot haporseaonna.

Dibalik ni saluhutna i, mansai godang do asi ni roha ni Tuhan i na so tahatindanghon di ngolu ni haporseaonta, paboa Tuhan i luar biasa mangaramoti hita, mangalehon hosa hangoluan tu hita, mamongoti taon 2017 “taon asi ni roha ni Tuhan”, ndang ala ni hagogoon dohot alani  haboionta alai saluhutna i tung holan ala asi ni roha ni Tuhanta i do. Marhite na manjaha dohot na tumangihon hata ni  Debata, botoonta ma paboa na diparorot Tuhanta i do sude hita, manang songon dia pe hita bolus dohot na taadopi, na pasti di urupi jala di palua do hita. Lapatanna: Manang songon dia pe parsorionmu sai ditongos Debata do na hasea i di ho, asal ma manongtong ho di Tuhan Jesus. Pamanat jala patangkas ma di ngolum :

1. Balga Ni Holong Dohot Pangolani Ni Tuhan i

Boasa tung songon i holong ni roha ni Debata tu bangso Israel sahat tu na manaluhon angka musuna ? Holong ni roha ni Debata tu bangso i marhite padan asi ni roha, Debata gabe Sipalua di bangso i. Atik pe tarrimas Debata ala hajungkaton ni bangso Israel na manundalhon Debata alai anggo asi ni rohaNa naung pinadantonhoNa i uju ngolu ni si Musa dope ndang siunsaton i sian pinompar ni bangso Israel. Ala ni i do umbahen na manongtong nasida joujou tu Tuhan i mandok : “Ho do Ama nami jala Sipalua hami”.

Ndang pola dao pangalaho ni bangso Israel i dohot pangalaho ni angka anak ni Debata ditingki on. Mansai mura hita lupa di denggan basa dohot asi ni roha ni Tuhanta naung sahat tu hita mambahen marsak jala maheu Tuhan i. Sian na so tarjua ingkon lalu muruk ni Tuhan i mambahen hita humasusa. Alai mauliate ma di Debata, ndang hea mansohot asi ni rohaNa, di urupi do hita di pardangolanta i, di dasarihon di nasa hahurangan, ditogutogu huhut dipasabam rohanta, dipatongon tu jampalan na lomak ditogutogu sahat tu aek na tio.

Tumangkas asi ni roha ni Debata marhite mudar ni anakNa Tuhan Jesus Kristus, mudarNa manesa saluhut dosanta asa tarjalo hita haluaon mangkilalahon asi ni rohaNa didok do : “Ai songon on do holong ni roha ni Debata di portibi on, pola do anakNa nasasada i dilehon, asa unang mago ganup na porsea di Ibana, asa hangoluan na salelenglelengna di ibana”.  (Johannes 3 : 16)

2. Satia Jala Bonar Do Tuhanta I

Digoar Debata do bangso Israel bangsoNa. Tarida do sian pambahen ni Debata tu nasida, mangangkat dohot mandongani bangso i, manogunogu huhut mangalehon Tondi Parbadia tu ateatenasida. Molo tung mangalo/mamberontak nasida, Debata sandiri paluahon dohot manobus nasida marhite asi ni roha. Panurirang Jesaya patandaphon tu bangso Israel paboa haluaon na jinalo nasida i ndada ala ni pambahenanna, alai tung holan ala asi roha ni Debata na balga i do.

Atik pe tung jotjot bangso Israel mangulahon dosa, laos mulakulak do tongtong Debata papatarhon asi ni roha tu nasida. Marulak loni bangso i manundalhon Debata marhite na mangulahon dosa, laos songon i do Debata papatarhon holong ni rohana tu nasida, Didok do tung so lomo rohaNa mida hamamate ni bangso i di hajahatonna, alai mulak ma tumadingkon dalanna na jahat i, asa mangolu. Lapatanna : Songon dia pe pangalahonta, tarehei, taparsipal, tasoadahon sahat tu na taparsilanghon, ndang mambahen mansohot asi ni rohaNa. Ai ninna do “Tongon do, bangsongku do nasida, anak angka na so olo paotootohon, Ahu do Sipalua nasida”. Sian pandohan i, tangkas ma taboto jala tahaporseai, parasi roha jala pardenggan basa do Tuhan Debata, lambat tarrimas jala parasi roha na godang, ndang di bahen tu hita hombar tu dosanta, ndang dibaloshon angka hajahatonta, songon asi ni roha ni amaama tu angka anakna songoni ma holong ni roha ni Debata tu hita. (Psalm 103:8, 10, 13)

3. Dihindat Jala Diompa Tuhan I Do Hita Ganup Ari

Dipatandap Panurirang Jesayas do muse tu bangso i paboa : “Saluhutna holan ala asi ni roha ni Tuhan i do” na marpambahenan di ngolu ni angka na porsea salelenglelengna sahat ro di hasusuda ni hasiangan on. Saluhut halak na porsea umbotosa jala ingkon porsea paboa Debata na Sangap jala na sun Badia i paluahon ganup na porsea sian hamagoan dohot hamatean ala ni dosa. Tuhan i sandiri ro tu portibion, tu ngolu ni angka na porsea di taon 2017 on. Didok Ibana ro Ahu manopot hamu di si ganup tingki asa di nasa hagogotanmuna dohot Ahu targogot, sian holong ni roha ro Ahu paluahon, jala hindatonku, abingongku, hurdehonongku,  lapatanna parorotongku nasida ganup ari. Holong ni rohaNai tung na so halompoan do. Olo do hamu mulak tu Tuhan Jesus di taon 2017 on asa Ibana parorot ngolum?

Debata ni Israel jala Debatanta na mangolu huhut jala na mangula dibagasan sejarah dohot Tuhantai, khusus di sejarah ni bangso na pinillitNa. Mansai godang asi ni roha dohot hinauli na denggan na pinatupa ni Debata di ngolunta saleleng mardalan hita di taon 2016. Songon huria ni Debata na mamolus godang sitaonon dohot parungkilon, nunga di patimbo Debata hita marhite haluaon na pinatupaNa. Marhite pasupasu na godang i, marhite asi dohot holong ni rohaNa na so habogasan i nungga gabe bangsoNa hita, malim na raja, gabe anakhonNa huhut na sumarihon hita. Antong sai olo ma hita diparulosi Tuhanta parasi roha i di taon 2017 on.

Sipahusorhusoron Ni Roha :

Huria ni Tuhanta, Ruas dohot Parhalado nahinaholongan dibagasan Kristus Jesus !

Tung so tuk do pingkiran manang pangantusion mamilangi denggan basa ni Debata mandongani ngolunta di taon 2016 i. Godang ni na masa, na hansit nang na bernit, sitaonon dohot parungkilon jotjot sonson di ngolunta mambahen hita humasusa. Boi masa saluhutna i ala ni dirinta sandiri, laos olo do masa i di luar ni dirinta sandiri gabe tubu sungkunsungkun, aha do namasa on ? Apalagi molo manosak sitaonon i ala ni dokdokna nihilala ndang adong be tudosanna ro ma pandelean, ro ma sungkunsungkun lulululu do rohangku di dia do Debata ? Lumobi molo masa parsahiton na renge diparhatopot do habalgaon dohot hahomion ni Debata, alai sabalikna laos ro do soluk sungkunsungkun tutu do adong huaso habalgaon dohot hahomion ni Debata ?

Molo manat tajaha tarenunghon hata ni Debata, botoonta ma tontong do dirohahon, ditangkasi songon dia hita, jala pasti Tuhan i mangurupi dohot paluahon. Sian na robi dohot sian mula ni panompaon, ndang hea muba, ndang dung hea mansohot asi ni roha ni Tuhanta i di hita dipabaorhon do sian habangsaNa sahat ro di salelenglelengna. Atik pe torop jolma marsangkap manulak laho mangambati asi ni rohaNa i, anggo sangkap ni Tuhan i ingkon saut do manogu huhut mangompa jolma i asa mulak tu Tuhan Jesus. Dibagasan Tuhan Jesus do sihar ni pamatang, dibagasan Tuhan Jesus do pandaonion, dibagasan Tuhan Jesus do apulapul, dibagasan Tuhan Jesus do haluaon, di bagasan Tuhan Jesus do hamoraon dohot hagabeon, mulak ma tu Tuhan Jesus, Ibana do Sipalua ngolum dohot tondim.

Songon alus sian hita naung ni asian ni Tuhanta i, diigil do sian hita habuluson ni roha dohot hasatiaonta songon parbue ni haporseaonta di pangurupion ni Tuhanta i, alai sabalikna do na terjadi jotjot tarmuruk do Tuhanta i marnida parulan dohot pangalahonta na so hombar tu lomo ni rohaNa. Satia jala bonar do Tuhanta i paihutihut pardalanan ni ngolunta nang pe jotjot manimbil hita sian lomo ni rohaNa.

Uli na i marningot denggan basa ni Tuhan i, lumobi molo parningotan i tubu ndang ala na pinaingot ni Tuhan i hita ala ni dosa na ta ula, alai marningot hita di tingki rap hita dohot Tuhan Jesus di pardalanan ni ngolunta tung mansai sonang diiringiring langkanta i sahat ro di ujung ni pardalananta di togu hita jonok, mansai jonok tu lambungNa.

Taon 2017 taon pelayanan Ama di tongatonga ni Huria Kristen Indonesia (HKI) di igil do disi asa sude ama ditongatonga ni huria gabe “Malim na raja”, mamaritahon angka denggan basa ni Jahowa di tongatonga ni rumah tangga maradophon ianakhon, sisolhot, nang maradophon dongan. Asa nganup ama gabe palito di tongatonga ni keluarga, gabe sulu na marsinondang manogu/mamboan pardalanan ni ianakhon tu silas ni roha jala gabe hagogoon na imbaru laho mandapot ngolu na dumenggan. Taingot ma angka dongan, lumobi angka ama aha ma na boi jumpang hita molo so mardonganhon Tuhan i ? Boi do hita mangolu manuturi ianakhonta asa dao sian hajahaton, haotohon dohot hapogoson molo so mardonganhon Tuhan i ? Marhite jamita di bona ni Taon 2017 on, tagotaphon ma sian rohanta halosohon, parjujion, parmabuhon, togel, parbadaan di tonga ni keluarga, tapareak ma silas ni roha dohot hadameon nang haholongon i huhut tadok “Anggo ahu dohot donganku saripe, holan Jahowa do oloannami”

Di na mardalan ahu di taon parasirohaon ni Debata di taon 2017 on, “Sai baritahonongku ma angka denggan basa ni Jahowa, angka pujipujian ni Jahowa, ai ido na tama marningot sude na binahen ni Jahowa tu hita…”

SELAMAT TAHUN BARU, TUHANTA MA MAMASUMASU HITA SALUHUT DOHOT PANGHOBASION NI HURIANTA NA GABE TAON BAPAK (AMA) HKI DI TAON 2017 ON. Amen

Pematang Siantar, 01 Januari 2017, Ephorus HKI : Pdt.M. Pahala Hutabarat, S.Th, MM