2 SAMUEL 12:1-16

Martua Ma Manang Ise Naung Sinesaan Pangalaosina, Naung Hinungkupan Dosana (Psalm 32: 1)

Pambonsiri

Somalna, panurirang sai jumolo do dipatandahon hadirionna, isarana sian horong manang marga dia ibana. Jala, sadihari manjalo panjouon gabe panurirang, laos songon dia proses panjouon tu ibana, huhut manurirang uju di harajaon ni raja dia. Alai ianggo panurirang Natan ndang apala dipatohon hadirionna, atikpe mangihuthon penelitian di tingki ni raja Daud ma ibana manurirangi.

Sasintongna, ulaon ni panurirang na sintong mansai balga resiko, tarlobi molo sedang mangadopi manang manegur hasalaan ni angka panggonggomi, ai boi do panggomgomi manuhashon laos manguhum angka na manegur i dohot tuduhan naeng merongrong sahala ni harajaon i (patudos uju di Orde Baru: molo adong na so setuju tu kebijakan ni panggonggami bage didok do nasida pengikut partai terlarang, dan paling tidak digoari Organisasi tanpa nama, na patut dihukum. Panurirang Natan termasuk panurirang na manurirangi na gok resiko. Alai ala sian Debata do dipahatopot ibana ulaon i, ndang hea sumurut ibana mangulahonsa. Patar do i, uju marsangkap Raja Daud naeng pajongjong Bagas Joro di Debata. Di mulana ditumpahi Panurirang Natan do sangkap ni raja i. hape di borngin na i, tarbege ma soara ni Debata marsuru ibana tu Raja Daud, pabotohon paboa na so diloas Debata ibana pajongjong bagas joro, alai pomparanna pe muse paulihonsa (pat. 2 Samuel 7; 1 Khronika 17). Na mangihut muse uju marsangkap si Adonia (anak ni si Daud) manggulut harajaon sian amana si Daud i, disi ma jongjong si Natan paingothon si Bersyeba (nanioli ni si Daud), asa dipahot padan paboa si Salomo do na patut gabe raja singkat ni raja Daud.

Apala na tarbarita si Natan ima di habaranionna ima di tingki maminsang Raja Daud uju na tarrobung tu dosa. Alana dosa na binahen ni raja i, ndang apala paltak di parnidaan ni jolma, alai nang pe holip sian parnidaan ni jolma, ianggo di Debata patar do saluhutna. Alani i do disuru Debata panurirang Natan paingothon raja i. Laho mangoloi parsuru ni Tuhan dibahen panurirang Natan do strategi na uli asa saat tu tujuan na sinangkap ni Tuhan i, ima turpuk jamita on.

Hatorangan

1. Jorbut do panghorhon ni Ginjang ni roha (ay 1- 4)

Songon panurirang si Natas, pasti do godang jumping diida matan angka pangalaho masa di bangso na humaliang ibana. Adong do angka na uli na patut sitruon, laos adong do angka na hurang. Sian angka pangalaho na marragam i, sipata dipangke ibana do laho mambahen tari-turian na mura antusan jala mangonai tu roha.

Diboto Panurirang Natan do mansai maol laho patolhas soara ni Debata, tarlobi ala marisi pinsang-pinsang. Ai molo dihatahon di sihapataran, olo do gabe tarrimas raja i; molo dihatahon secara “andar” (langsung), boi pintor sintahon ni raja i podangna mamunu panurirang i. Ala ni ima, dipungka panurirang Natan do marturi-turian tu raja i. Ia turi-turian i, taringot tu sahalak na mora na torop biru-biru dohot lombuna.

Di bangso Israel holan dua do bentuk ulaon nasida ima marpinahan dohot martini. Jadi molo didok torop biru-biru dohot lombuna, na patuduhon status na timbo di masyarakat. Hinorhon ni arta nang status na timbo, patubu ginjang  ni roha. Haginjangon marroha ni na mora i, uju ro tamuena.

Somalna molo ro tamue, dirade do angka na ringkot, tarlobi sipanganon, ai tartanom do di roha ni bangso i, atik suru-suruan ni Debata na ro i, sai diusahahon do mambahen na dumenggan tu tamue.

Sasintonga, ndang apala boban na borat haroro ni tamue i, ai adong do di ibana, alai nangpe torop biru-biru dohot lombuna, ndada sian angka i dibuat bahen parjuhut manamue tondong na i, pulut do rohana mambuat biru-biru ni napogos di hutana i. Ian a pogos na nidokna di turpuk on, mansai pogos situtu, ai holan sada do biru-biruna, jala mansai denggan do dibahen na pogos i mangurus biru-biruna na sasada i, pola sapanganan, sapanginuman dohot sapodoman nasida. Marnida i nian, ingkon tubu ma asi ni roha ni na mora i, tambaanna ma biru-biru di na pogos i, asa umpala pahananna. Alai balikna do na masa, ai biru-biru ni napogos i do diseat panganon ni tamuena.

Haginjangon marroha ni na mora i, ndada holan mambuat biru-biru ni na pogos i, alai sasintongna nunga “merampok” holong dohot las ni roha ni na pogos i.

2. Suhat-suhat mi do suhathonanona tu ho (5-12)

Di ombas ni raja Daud, Raja marhobas songon uluan (Pemimpin) dohot panimbangi (hakim). Di ulaonna songon panimbangi i, dipatangkas panurrang Natan ma tu raja Daud pandapot taringot tu na Mora na Ginjang Marroha i. Umbege panuturion dohon panindangion ni panurirang Natan i, tarrimas ma raja i, laos didok: “songon sintong na mangolu Jahowa, ingkon marutang hosa baoa na mambahen songon i.angkup ni i ingkon lompit opat hali gararonna anak ni biru-biru i ala binahenna songon i, ala so alang rohana”

Pandohan ni raja  Daud, ndada holan pandohan boti, alai mansai arga jala mengikat. Ai sangkababa hata na haruar sian Raja tarlobi muse merangkap panimbangi, mansai marpanghorhon do i, jala ingkon dipatulus. Tarlobi muse, ndada holan jolma manisia na dipadohot di haputusan i, alai lao dohot do Debata Jahowa.

Dung dapot haputusan, dipatuduhon Panurirang Natan ma Terdakwa ima Raja Daud sandiri. Dipandar do disi, paboa nas na binahenna tu si Uria dohot na binuatna si Betseba (oroan ni si Uria) gabe ripena. Tarsonggot do raja Daud umbege naung terdakwa ibana, alai ndang tuk ibana membela diri, ala sude na tinuhashon dohot na pinajojor ni panurirang Natan ndang adong na lipe nanggo sada. Hasalaan na mansai balga di Si Daud, ndada holan na mambuat si Betseba gabe ripena dung disuru oroanna si Uria tu tontangan dohot maksud asa mate di tontangan i si Uria, alai sekaligus do nunga digulut (dirampas) si Daud, holong dohot las ni roha sian si Uria dohot si Betseba.

Uhum naung niputushon ni raja i, ingkon masa ma tu ibana, ima:

1. Si Uria mate hinorhon ni podang ni halak Heti, ala ni godung (strategi) ni raja Daud, gabe ndang sumurut podang sian pomparan ni raja Daud.
2. Ala dibuat si Daud ripe ni si Uria dohot ripe ni si Saul, lobi sian i masa di rumatangga ni si Daud, apala di jolona dipangke halak angka ripena.
3. Panolsolion mangalap hasesaan ni Dosa (13-16)

Nangpe si Daud na mangganti si Saul, ndang diwarisi si Daud deba sian pangalaho ni si Saul. Sada na andul lumobi ima, molo si Saul, uju di paingot (ditegur) hasalaanna, sai dilului ibada do dalan (pembelaan) pasintong na ni ulana i. Ianggo si Daud, terus terang diakui ibana do hasalaanna huhut disolsoli dosana.

Marningot nanilumbahon Debata marhite panurirang Hesekiel na mandok: tung tagamon ma marlomo ni roha Ahu mida hamatean ni parjahat i… nda tagonan nian molo muba rohana i sian dalanna angka na sai laon, asa mangolu ibana (Hesekiel 18: 23), panurirang Natan pabotohon tu raja Daud Hasesaan ni dosana. Nang pe naung didabu si Daud uhuman mate tu dirina sandiri, ala disolsoli dosana, gabe taruli hasesaan ni dosa ibana.

Siputikputikan gabe jamita

1. Disuru Debata do hita jolma pararat hataNa. Ndang mardia imbar na martohonan nang na so martohonan pe. Dijou do hita tapararat hatana marhite hinaragam ni cara, isara ni hata poda, pangalaho, pambahenan hombar tu silehon-lehon ni Tuhan i tu hita.
2. Na pararat hata ni Debata, ndada ditujuhon tu na torop, alai ingkon jumolo ma jamita I itahonahon tu diri sandiri. Alani i, ndang jadi haruar sian angka parjamita na mandok: holan pansur do hami, unang diringku ida hamu, alai hata i do. Ingkon jamothononta do hadirionta, unang gabe muntul hata ni Tuhan i, ala ni pangalhonta na marasing sian jamitanta.
3. Di ngolu on, marragam do angka suhat-suhat ditotophon, isara ni di pasahutaon, parmargaon dohot parhuriaon nang di tonga-tonga ni Ngeranta. Naeng ma angka na unduk di aturan hita, niihot ni holong dohot na mangargahon angka dongan, dao haginjangon marroha, alai masijoloanan papatarhon holong i.

Ndang adong jolma na so mardosa, alai molo tatoipoti dosanta, haposan do Debata jala Bonar manesa dosanta jala paiashon hita sian nasa hageduhon (Patudos: 1 Johanes 1: 8-9). (oleh : MBW)