EPISTEL MINGGU ROGATE – MINGGU14 MEI 2023

Unang Holsoan Hamu Agia Aha

Jona 2: 1-10

I. Pamuhai
Di ngolu ni jolma ndang boi tarsirang sian hukum sebab akibat. Boasa boi masa na masa dingolunta on, tontu adong sibonsirina. Jala, marhitehon i boi ma idaonta angka naung itaulahon di angka ari naung salpu, i do na mambahen hita boi sahat tu posisinta si nuaeng on.

Songoni ma na masa di Panurirang Jona. Tangkas do itaboto marhite buku na badia taringot tu Panurirang Jona, na dibondut ihan raya ibana dipardalananna na maporus tu Tarsis maradophon Jahowa, gabe tuat si Juna tu Joppe. Ala manimbil panurirang i sian parsuruon na pinasahat ni Debata tu ibana. Disuru Debata do Panurirang i laho martingting dompak Ninive ala nunga pola maungaung hajahaton ni bangso i sahat tu jolo ni Debata. Astuanna, asa malua bangso Ninive sian uhum dohot rimas ni Debata. Alai, dimula na ndang tarjalo roha ni si Jona sangkap ni Debata. Ndang satolop si Jona di angka naung tinontuhon ni Debata. Alani parulaon ni si Jona i, gabe mangontak do tu humaliangna na adong di parau i, ima na ditompuhon Jahowa Jahwoa habahaba siapalautus tu laut i. Alai, dipahindat jala direonghon angka na di parau i ma si Jona tu laut i asa malua nasida na parau i. Laos, so ma laut i sian gunsangna. Laos, dung dipahindat dohot direonghon si Jona tu laut i dibondut ihan raya ma ibana. Alani, adong ma hamubaon na masa tu si Jona.
Marhite na masa di si Jona on, aha do sangkap ni Debata dingolunta? Molo ro hagogotan tu hita, lumobi ma alani parulaonta ingkon songon dia do hita? Aha do hamubaon na adong di si Jona? Jala, aha do na boi idaonta sian hamubaon ni si Jona i tu hita na mangolu dipartingkian sinuaeng on? Aha do alus ni Jahowa di hamubaon i? Ra, angka sungkunsungkun i ma na boi mangurupi hita laho manghangoluhon dohot mangauhon turpuk on di parngoluanta sinuaeng on.

II. Hatorangan ni turpuk
Ay. 1-7. Pangarimangon na mamparbuehon panolsolion. Dung dibagasan butuha ni ihan raya i si Jona migor martangiang do ibana tu Jahowa, jala molo itabereng do di turpuk i tung tangkas do pangarimangion di si Jona, joujou do ibana dibagasan hagogotanna i tu Jahowa pola sampe mangangguhi . Dirimangi ibana do na Jahowa do mangareonghon ibana tu bagasan pusupusu ni laut i, diauhon ibana do nunga bali ibana sian jolo ni mata ni Jahowa. Dihaliangi aek i do si Jona, pola tos hosanna, jala lung i pasampaksampakhon ibana. Marungkor do ibana sahat tu bona ni angka dolok, ransangransang ni tano pe tarsordak humaliang ibana salelenglelengna.

Sian angka na pinajojorna ondeng ditangiangna i, ima na patuduhon adong pangarimangion di ibana di angka naung ni ulahonna i; na manimbil ibana sian parsuruon ni Debata do ibana. Alai, dung dipajojor ibana pangarimangonna i, migor udut do patuduhon panolsolion di ibana, ima marhite angka pandohan ni tangiangna na mandok: “ditangihon Ho do sorangki (ay. 2); alai tahe ulahananhu dope mamereng dompak joro habadiaonMi” (ay. 5); Alai dipanangkok Ho ngolungku sian godung ale Jahowa (: 7)”. Molo sian secara kejiwaan, boi do ra itabayangkon boha do hancur ni jiwa ni si Jona di pambahenanna na manimbil sian Debata. Alai, ndang olo ibana larut dikehancuran ni jiwana i, tung manolsoli do ibana, pola sampe mangangguhi. Astuanna, molo pea dong pangarimangon di hita, molo itabereng do si Jona, ndada holan pangarimangon i na ingkon adong di hita, ingkon dohot do tutu panolsolion i. Astuanna, molo adong pangarimangon di angka hasalaanta, ingkon saurdot do dohot panolsolion. Alani, ndang marlapatan pangarimangon molo ndang adong panolsolion. Jala, ndang boi masa panolsolion molo so jumolo adong pangarimangion di angka hasalaanta. Laos, ndada holan sahat tu tahap, ingkon adong dope udutna. Ima marhite ay. 8-10.

Ay 8-10. Padan hamubaon ni roha tu Debata. Dung sahat si Jona tu tahap panolsolion i, migor dipatupa ibana do padan tu Debata marhite hamubaon ni roha. Ima na mandok: “Jahowa do na diingot Ibana, Debata do na pinuji ni si Jona, Jahowa do nampuna hatuaon”. Ia padan hamubaon ni roha tu Debata na nidok ni si Jona, marharoan do i dung masa pangarimangion dohot panolsolion. Astuanna, sian angka na masa si Jona on, ingkon 3P do na masa molo itahilalaon hagogotan alani hasalaanta ndang unduk tu parsuruon ni Debata di hita, ia 3P i, ima: pangarimangion, panolsolion, padan. Astuanna, ndada boi tarsirang na ‘tolu P’ i. Ndang boi itadok padanta tu Debata, molo so adong na dua nari i.
Alani, boi do itajalo haluaon sian Debata molo marsala hita? Sian si Jona on, idaonta ma: boi do jaloonta haluaon i, alai itaargahon huhut itaulahon ma ‘na tolu P’ asa dapotta i.

III. Haonahan (Aplikasi)
• Ra, itaingot do logu uju di Singkola Minggu hita molo taringot tu Panurirang Jona, ima: Yunus di perut ikan, pom…pom…….. Karena dia dikasihi Tuhan maka dia dibebaskan, dst. Sian ende i boi ma itabereng boha panghaholongan ni Debata tu si Jona, nang tu hit na mangolu dibagasan tingki on.
• Molo pe ro hagogotan i, jala hita sandiri do na gabe sibonsiri ni hagogotan i, songon si Jona. Hatop ma ro hita tu Tuhan Jesus marhite tangiangta i. Jala, itaingot ma: unang adong pembelaan diri di tangiangta i. Itabereng ma pola ni tangiang si Jona na so olo ibana membela dirina di adopan ni Debata, ala tangkas do ulaonna do na mambahen ibana gabe dibondut ihan raya i.
• Unang manimbil patupahon parsuruon ni Debata. Angka ragam ni ulaonta siganup ari i ima na gabe dalan di hita laho patupahon parsuruon ni Debata tu hita. Na ingkon boi itahangoluhon, ima: adong be do hatandianna marningot parsuruon ni Debata. Astuanna, ndang sarupa parsuruon ni Debata antara ianakhon dohot natoras, ndang sarupa parsuruon ni Debata molo antara na mangula ulaon di balian dohot na diperkantoran. Adong be do kehususanna dipasahat Debata. Alani i, sotung manimbil hita di angka parsuruon naung pinasahatNa i hita. Ae molo manimbil hita sian parsuruon naung pinasahatNa tu hita, sotung ro rimas ni Tuhan i tu hita. Las ma rohanta, jala dibagasan hahipason ma hita mangulahon parsuruonNa i di angka ragam ni ulaonta i.
• Molo tung itahilalahon do na godang dosanta, unang mandele hita alani i, ndang gabe pangambati i laho manjalo asi ni roha na sian Tuhan Jesus i. Alai, na ingkon itaingot: ingkon adong “tolu P” di hita: Pangarimangion na marparbuehon Panolsolion jala Padan tu Debata asa marhamubaon ni roha. Laho mangurupi hita mangauhon pandoahan on, itaingot ma logu ni BE. No. 174: 2 “Pardosa ho didok roham, na so tama be dohot, d.u”. Marpardomuan tusi, itaingot ma: marhite haheheon ni Jesus sian hamatean naung itapestahon di ari naung salpu (itaingot pesta Paska i), nunga sae dosanta i. Alani i, ingkon adong hamubaon ni roha.
• Itaingot huhut itahangoluhon ma pandohan: Tuhan itu tolerir kepada pendosa yang menyesali dosanya.

Pdt. HERMAN TAMPUBOLON, M.Th